Білікті мамандар іріктеледі
Сенбі, 14 сәуір 2012 7:39
Еліміз Конституциясында әр адамның жеке басының бостандығына құқы бар және адамның қадір-қасиетіне қол сұғылмайды, деп атап көрсетілген. Демек, осы міндеттерді басшылыққа ұстауға тиісті құқық қорғау органдарының қатарын кәсіби білікті, адам құқығы мен заңды мүдделерін жоғары деңгейде қорғауға лайықты мамандармен толықтыру аса қажет.
Сенбі, 14 сәуір 2012 7:39
Еліміз Конституциясында әр адамның жеке басының бостандығына құқы бар және адамның қадір-қасиетіне қол сұғылмайды, деп атап көрсетілген. Демек, осы міндеттерді басшылыққа ұстауға тиісті құқық қорғау органдарының қатарын кәсіби білікті, адам құқығы мен заңды мүдделерін жоғары деңгейде қорғауға лайықты мамандармен толықтыру аса қажет.
Елбасының «Қазақстан Республикасы құқық қорғау органдарының қызметкерлерін кезектен тыс аттестаттаудан өткізу» туралы Жарлығынан кейін сала мамандарының жауапкершілігі одан әрі күшейетіні айтпаса да түсінікті. Облыстық ішкі істер департаменті құрамындағы 4000-ға жуық қызметкер жоғарыдағы талаппен аттестациядан өткізіледі. Осы мәселеге байланысты қазіргі кезде ұйымдастыру жұмыстары басталды. Әрине, аттестациялау кезінде құқық қорғау қызметкерлерінің кәсіби дайындығы мен бүгінгі өскелең талаптарға сәйкестігі алдыңғы орынға шығады. Осылайша жоғары кәсіптік, азаматтық, моральдық-психологиялық қасиеттерге басымдық беріліп, жалпы мәдениет, қызметтік борышын орындауға саналылықпен қарау, елжандылық деңгейін көтеру мәселелері де басты назарда болатынын айтқан жөн. Қызмет кезінде жемқорлық әрекеттерден аулақ болу шарт. Осындай талаптардан шыға алмағандардан тазарту аттестация кезінде басшылыққа алынбақшы.
Департаментте көп жыл қызмет атқарған аға буын өкілдерінен құралған ардагерлер алқасы жұмыс істейді. Тәжірибе жинақтаған, саланың ыстығы мен суығына төзген жандардың жастарға берер ақыл-кеңестері мол. Өзім облыстық ішкі істер департаментінің тергеу саласы бойынша жедел іздестіру лауазымында көп жыл қызмет атқардым. 1987 жылы зейнет демалысына шықтым. Содан бергі кезеңде әріптес ардагерлермен бірге қиындығы жетіп, артылатын құқық қорғау қызметкерлерінің өз жұмысын адал, кәсіби деңгейде атқаруына ағалық ақыл-кеңес беріп, жиі бас қосып отырамыз.
Бүгінгі күні департаментте 500-ге жуық жас полиция қызметкерлері жұмысқа кіріскен. Олардың теория жүзінде алған білімдерін тәжірибемен ұштастыруына, білмегендерін үйретуге ұжымдағы өз ісін жетік білетін қызметкерлерден тәлімгерлер бөлінген. Осылайша олардың тапсырылған жұмысқа деген жауапкершілігін арттыру басты назарға алынған. Нәтижесінде соңғы кездері жетісулықтар тарапынан сала қызметкерлеріне деген реніш азайып, қылмысты ашу деңгейі көтерілді.
Адам құқығын қорғау – абыройлы міндет. Демек, егемен еліміздің әр күнінің тыныш, азаматтардың заңды мүдделерінің қорғалуы үшін полиция қызметкері ерекше белсенділікпен тәртіпті орнықтыруға күш салады. Ал аттестация қызметкердің жауапкершілігін одан әрі арттыруға негіз болады деп ойлаймын.
Болат ҚОЖАҚОВ, Алматы облыстық ішкі істер департаменті ардагерлер кеңесінің төрағасы, запастағы полковник.
ТАЛДЫҚОРҒАН.