Спорт • 08 Сәуір, 2019

Дзюдо: Италиядан үш жүлдемен оралдық

1093 рет
көрсетілді
1 мин
оқу үшін

Италияның Линьяно қаласында дзюдодан жастар арасында өткен Еуропа кубогы жолындағы жарыс өз мәресіне жетті. Бұл сапардан Қазақстанның қыздар құрамасы үш жүлдемен оралды.

Дзюдо: Италиядан үш жүлдемен оралдық

48 кило салмақта белдескен қос сұлумыз да ақтық сынға дейін алқынбай жетті. Ғалия Тынбаева Ресейдің екі және Венгрияның бір спортшысын ұтса, Ақмарал Науатбек Ұлыбритания, Австрия және Германия балуандарынан басым түсті. Қос қазақ қызының өзара тартысы алғашқысының пайдасына шешілді. Осылайша, Ғалия алтын алса, Ақмарал күміс медальді мойнына ілді.

70 кило салмақта белдеске Мөлдір Нарынова қола жүлдені иеленді. Алғашқы айналымдарда Бельгия мен Италия өкілеріне сан соқтырған ол үшінші франциялық дзюдошыға есе жіберді. Одан кейінгі бәсекелерде Мөлдір өзінің командалық әріптесі Аяла Мереке және Словения мен Швейцария балуандарына шаң қаптырды.

Қыздар арасындағы жарыстың жеңімпаздары: 48 кило – Ғалия Тынбаева (Қазақстан), 52 кило – Мартина Кастагнола (Италия), 57 кило – Силвия Пелитерри (Италия), 63 кило – Лия Людвик (Словения), 70 кило – Лара Клиба (Хорватия), 78 кило – Рена ван Нарсеелар (Голландия) және +100 кило – Лия Фонтайин (Франция).