Жиынға Қазақстан халқы Ассамблеясының мүшелері, республикалық және өңірлік этномәдени бірлестіктердің төрағалары, қоғамдық келісім, аналар кеңестерінің, ғылыми-сараптамалық кеңестің, кәсіпкерлер қауымдастығының, ҚХА жанындағы «Жаңғыру жолы» республикалық жастар қозғалысының, ғылыми және шығармашыл зиялы қауымның өкілдері қатысты.
Ж.Түймебаев алда болатын кезектен тыс президенттік сайлауды аса маңызды саяси оқиға деп атады. «Мемлекет басшысы Қасым-Жомарт Тоқаев 2019 жылдың 9 маусымында Қазақстан Республикасы Президентінің кезектен тыс сайлауын тағайындау туралы Жарлыққа қол қойды. Бұл өте маңызды, еліміздің дамуына қажетті қадам.
Қазақстанның Тұңғыш Президенті – Елбасының арқасында біздің тәуелсіздігіміз нығайды. Қазақстанды экономикасы қуатты, саяси жүйесі тұрақты мемлекет ретінді бүкіл әлем мойындады. Өткен айда болған жоғарғы билікті ауыстыру заңды және бейбіт жолмен өтті. Алдағы сайлау болса, еліміздің тұрақтылығын нығайтуға, әлеуметтік-экономикалық жаңғыруды лайықты жүзеге асыруға ықпал ететіні айғақ. Бұл еліміздің келешегі үшін қажетті сайлау болмақ.
Президент Қ.Тоқаев айтқандай, еліміздің келешегі, әр отбасы мен әр азаматтың тағдыры қазақстандықтардың шешімдеріне тікелей байланысты. Сондықтан Қазақстан халқы Ассамблеясы осы маңызды шешімге қатысты өз ұстанымын жеткізіп, қолдау көрсеткені жөн деп есептеймін», деген ол алдағы сайлауды соңғы саяси өзгерістердің қисынына қарай уақыттың өзі талап етіп отырғанын жеткізді.
Жансейіт Түймебаев, сондай-ақ биліктің орнықтылығы жоғары деңгейде екенін, демократиялық институттардың жұмыс істеп отырғанын, саяси мәдениет пен азаматтардың бірлігін атап көрсете отырып, ол бұл сайлаудың елдің ішкі және сыртқы саясатының сабақтастығы мен ашықтығын растауға мүмкіндік беретініне сенім білдірді.
«Біз, Ассамблеяның өкілдері, Президент сайлауының қоғамдық келісім мен жалпыұлттық бірлікті нығайтуға ықпал ететініне сенімдіміз. Ол еліміздің алдында тұрған міндеттерді табыспен іске асыру үшін халықты шоғырландыруға қуатты серпін береді», деп қорытындылады өз сөзін ҚХА Төрағасының орынбасары Жансейіт Түймебаев.
Кеңестің отырысында ҚХА Төрағасының орынбасары, «Lituanica» қоғамдық бірлестігінің жетекшісі Виталий Тварионас: «Енді бүкіл ішкі саяси процестің барлық сатылары нақтыланып, уақыттары белгіленді», деді. В.Тварионастың пікірінше, президенттік сайлау бір жағынан ел дамуының түйінді мәселелері бойынша жаңа қоғамдық келісімді тұжырымдауға мүмкіндік береді.
Қоғамдық қолдау туралы Қазақстан халқы Ассамблеясы Ғылыми-сарапшылық кеңесінің мүшесі Әділ Ахметов, «Қазақстан ұйғырларының республикалық мәдени орталығы» ҚБ елордалық филиалының басшысы Рустам Абдусаламов, «Вайнах» чешен және ингуш халықтарының мәдениеттерін дамыту қауымдастығы» ҚБ мүшесі Белла Газдиева, «Қарағанды облыстық поляктар қоғамы «Polonia» ҚБ төрағасы Виталий Хмелевский өз ұсыныстарын айтты.
Талқылау нәтижесі бойынша Ассамблея Кеңесі сайлаушыларға үндеу қабылдап, оны «Болгар мәдени орталығы «Злата» ҚБ төрағасы Ольга Андриевская оқыды.
Онда: «Біз болашақ ұрпақ алдындағы жауапкершілігімізді түсіне отырып, халық пен елдің биік мүдделеріне сүйеніп, өзіміздің азаматтық және патриоттық парызымызды орындай отырып, Қазақстан Республикасы Президентінің кезектен тыс сайлауы өткізілуін қолдаймыз» делінген.
