Мейірхан Мүбәракұлы ӘБДІЛДИН
Сейсенбі, 10 қаңтар 2012 7:37
2012 жылдың 9 қаңтар күні 74 жасқа қараған шағында ұзаққа созылған науқастан Қазақстанның көрнекті ғалым-физиктерінің бірі, ҚР ҰҒА академигі, физика-математика ғылымдарының докторы, профессор, адал жар, абзал азамат Мейірхан Мүбәракұлы Әбділдин дүниеден озды.
Ол 1938 жылы 16 наурызда Алтай өлкесі, Троицк ауданында Зигаиново ауылында дүниеге келген. 1959 жылы С.М.Киров атындағы Қазақ мемлекеттік, қазіргі Әл-Фараби атындағы Қазақ ұлттық университетінің физика факультетін бітірген.
Сейсенбі, 10 қаңтар 2012 7:37
2012 жылдың 9 қаңтар күні 74 жасқа қараған шағында ұзаққа созылған науқастан Қазақстанның көрнекті ғалым-физиктерінің бірі, ҚР ҰҒА академигі, физика-математика ғылымдарының докторы, профессор, адал жар, абзал азамат Мейірхан Мүбәракұлы Әбділдин дүниеден озды.
Ол 1938 жылы 16 наурызда Алтай өлкесі, Троицк ауданында Зигаиново ауылында дүниеге келген. 1959 жылы С.М.Киров атындағы Қазақ мемлекеттік, қазіргі Әл-Фараби атындағы Қазақ ұлттық университетінің физика факультетін бітірген.
Еңбек жолын инженер-лаборанттықтан бастап, бар ғұмырын Қазақстанның ғылымы мен білім саласына арнады. Ол әр жылдары А.А. Жданов атындағы Ленинград университетінің аспиранты (1961-1965 жж.), кіші ғылыми қызметкер (1966 ж.); Қазақ КСР ҒА Астрофизика институтының аға ғылыми қызметкері (1967-1979 жж.) болды. 1966 жылы кандидаттық диссертация, 1985 жылы «Теориялық және математикалық физика» мамандығы бойынша докторлық диссертация қорғады.
Мейірхан Мүбәракұлы 1970 жылдан бастап Әл-Фараби атындағы Қазақ ұлттық университетінде 40 жылдан астам табан аудармай қызмет істеді. 1970-1981 жылдары және 1986 жылдан өмірінің соңына дейін теориялық физика кафедрасының меңгерушісі болды. ҚазМУ-дың ректоры болып жұмыс істеген 1988-1991 жылдары білімнің қара шаңырағының беделі бұрынғыдан да артып, білім, ғылым саласында тың өзгерістер пайда болды. Ол осы қызметке оқытушы-профессорлардың қолдауымен және жабық дауыста сайланған алғашқы ректор болатын.
Мейірхан Мүбәракұлы Эйнштейннің салыстырмалылық және гравитациялық теориясы бойынша бұрынғы ТМД елдері ішіндегі білікті де білгір, мықты мамандардың бірі еді. Қазақстан Республикасындағы іргелі зерттеулердегі басым бағыт «Теориялық физиканың» негізгі ұйымдастырушысы, «Гравитациялық, электромагниттік, күшті және әлсіз өзара әрекеттестікті теориялық зерттеу» атты іргелі зерттеулер бағдарламасының жетекшісі. Оның ғылыми жетекшілігімен бірнеше кандидаттық және докторлық диссертациялар қорғалды. Оның 150-ден астам ғылыми мақаласы, 2 монографиясы жарық көрді.
Мейірхан Мүбәракұлынан тәлім-тәрбие алған мыңдаған шәкірттер бүгінде тәуелсіз республикамыздың түкпір-түкпірінде болашақ ұрпақ үшін еңбек етуде.
Ол теориялық физика саласындағы Қазақстандағы алғашқы доктор және профессор. М.Әбділдин Ресей гравитациялық қоғамының, Халықаралық физикалық журнал редакциялық алқасының мүшесі болып табылады.
Мейірхан Мүбәракұлы «Қазақстан Республикасы ғылымының дамуына қосқан үлесі үшін» төсбелгісімен, мерейтойлық медальдарымен, жаратылыстану-техникалық ғылымдар саласындағы іргелі зерттеулері үшін «2001 жылғы үздік ғылыми-зерттеу жұмыстары үшін» дипломымен, ғылым мен мәдениеттің дамуына қосқан үлесі үшін Халықаралық шығармашылық академиясының Құрмет белгісімен марапатталған.
2003 жылдың қазан айында ол Қазақстан Республикасы Ұлттық ғылым академиясының академигі болып сайланды.
Әріптестерінің ықылас-ниетіне бөленген көрнекті ғалым, ұлағатты ұстаз, тәлімді әке Мейірхан Мүбәракұлы Әбділдиннің жарқын бейнесі оны білетіндер мен ұстаз-ғалымдардың, сондай-ақ, шәкірттерінің есінде әрдайым сақталады.
Қазақстан Республикасы Білім және ғылым министрлігі,
Қазақстан Республикасының Ұлттық ғылым академиясы,
Әл-Фараби атындағы Қазақ ұлттық университеті.
Бар ғұмырын ғылымға арнаған
Маған бүгін суық хабар жетті. Сенер-сенбесімді де білмедім. Құйрықты жұлдыздай Қазақстан ғылымының көгінен тағы бір жарық жұлдызымыз ағып түсіпті. Кеше ғана арамызда аңқылдап жүрген, жаны жайсаң, жүрегі абзал нағыз ғалымымыздан айырылып қалыппыз. Сұм ажал кімді аяған. 74 жасқа қараған шағында физика-математика ғылымдарының докторы, профессор, Ұлттық ғылым академиясының академигі, Қазақстан Республикасының еңбек сіңірген қайраткері, көрнекті ғалым-физиктерінің бірі, адал жар, абзал азамат, ғұлама ғалым Мейірхан Мүбәракұлы Әбділдин дүниеден озды.
Түркілердің тегі тараған Ресейдің Алтай өңірінде дүниеге келген Мейірхан Мүбәракұлы тегіне тартса керек, бірбеткей, қайсар, ғылымға адал жан болып өтті өмірден.
Елін, жерін сүйетін бір жан болса, ол осы – Мейірхан Мүбәракұлы. Ғұлама ғалым жан-жақты болатын. Тек жаратылыстану ғылымдарын ғана емес, барлық ғылымды да бір-бірімен ұштастыра алатын. Ол қазақ елінің ауыз әдебиетін жатқа білетін. Әл-Фараби философиясынан ой толғап, Асан қайғы, Бұқар жырау, Абай өлеңдерін түйдектей айтатын. Жаны лирикаға жақын болғандықтан да болар, ғалым ағамыз достыққа адал, ағалыққа берік болатын. Ол өзінен бұрынғы ұлылардан үлгі ала жүріп, кейінгі буынға өзіндік өнеге көрсете білді. Ол кісінің тіліп түсетін уытты да өткір тілі өзгелерге айбар болатын. Сондықтан да ол өз айналасына білім, ғылым саласына шын берілген, нағыз білімдар, адал жандарды топтастырды.
Тағдырдың барлық қиындықтарына төзе білген Мейірхан Мүбәракұлы отбасында да нағыз азамат ретінде ғұмыр кешті. Аяулы жар, мейірімді әке, әулеттің ақылгөй данасы болды. Өмірдің ағысына өзгелердей ілесіп емес, қарсы жүзіп, өнеге көрсетті.
Тәуелсіз республикамыздың іргесі бекіп, экономикалық нығаюына, оның ішінде білім, ғылым саласының әлемдік деңгейге көтерілуіне ол кісінің қосқан еңбегі ұшан-теңіз. Мейірхан Мүбәракұлынан тәлім-тәрбие алған мыңдаған шәкірттер бүгінде егемен еліміздің түкпір-түкпірінде еңбек етуде.
Оның аса мақтауды жаны сүймейтін. Ғылымның тазалығы үшін талай тартысқа түскен қайсар мінезді академик 150-ден астам ғылыми мақала, 2 монография жазса да оны өзіне көп санайтын, ғылымдағы саннан гөрі сапаға баса назар аударатын.
Ол көп жылдар еңбек еткен ұжымы ҚазҰУ-да әл-Фараби Алтын медалімен марапатталған алғашқылардың бірі.
Әріптестерінің шын ықылас-ниетіне бөленген көрнекті ғалым, ұлағатты ұстаз Мейірхан Мүбәракұлы Әбділдиннің жарқын бейнесі оны білетіндер мен ұстаз-ғалымдардың, сондай-ақ шәкірттерінің есінде мәңгі сақталады.
Бақытжан ЖҰМАҒҰЛОВ, Қазақстан Республикасының Білім және ғылым министрі.
Көрнекті ғалым, ұлағатты ұстаз
Біздің аса құрметті де қымбатты Мейірхан Мүбәракұлы дүниеден өтті. Бұған сену өте қиын, бірақ бұл айқын. Соңғы жылдары физика факультетінің рухын көтерген адамның жүрек соғуы тоқтады.
Мейірхан Мүбәракұлының бойынан көптеген қасиеттер табылатын еді, физик әрі лирик, дана, ойшыл, кемеңгер осындай кез келген қиын-қыстау кезеңнен тура жол таба алатын адамның ақылы мен нұсқауына әр адам тәнті еді. Ойын тура және тік жеткізе білетін, орнымен әр адамды ширата және шыңдай білетін.
Ұлағатты ұстаз, зерттеуге деген құлшынысымен және де жастарға білім нәрін сусындата білген Мейірхан Мүбәракұлы артына өшпес ғылым мұрасын қалдыра білді, гравитация мен салыстырмалылық теориясының қазақстандық мектебінің негізін қалаушы ұлы ғұлама ғалым өз ісін жалғастырушы көптеген шәкірттер дайындады.
Мейірхан Мүбәракұлы бойына қазақ интеллигенциясының ең озық дәстүрлерін жинаған, оған мақсаттылық, еңбекқорлық, ұшқырлық, қарым-қатынастағы жоғары мәдениеттілік пен қарапайымдылық, таңқаларлықтай сыпайылық, сонымен қатар әділеттілік және адамдарға деген қайырымдылық пен көрегенділік және орнымен әзілдей білетін қасиеттер тән.
Мұндай адамның мезгілсіз дүниеден өтуі еліміз үшін орны толмас қайғы. Мейірхан Мүбәракұлының бар өмірі ғылым мен адамзатқа қызмет етудің жарқын белгісі болды.
Осы ауыр сәтте марқұмның туған-туыстары және ағайын-жекжатының қайғысына ортақпыз. Ірі ғұлама ғалымның жарқын бейнесі жадымызда және жүрегімізде біржола қалмақ!
Мұрат ЖҰРЫНОВ, Қазақстан Республикасы Ұлттық Ғылым Академиясының президенті, академик.
Қош болыңыз, асыл ұстаз, ғұлама ғалым аға!
Қайран, Мейірхан аға! Асылдың сынығы едің-ау! Көрнекті ғалым, ұлағатты ұстаз, абзал ағамыз өмірден озды деген суық хабарды естігенде, суық су бойымды қарып өткендей болды. Алып тұлға, ғұлама аға туралы өткен шақта айтудың өзі оңай емес. «Өлді деуге бола ма айтыңдаршы, өлмейтұғын артында сөз қалдырған» деп ұлы Абай айтқандай, академик Мейірхан Әбділдиннің ғылымда ізі, артында өшпес мұрасы қалды. Ол қазақ топырағында бұрын-соңды болмаған физиканың жалпы салыстырмалы теориясы туралы ілімді бүкіл қазақ жұртшылығына таратып, аты мен заты әлемге жайылған ғылыми мектеп қалыптастырды. Мейірхан Мүбәракұлы энциклопедиялық білімді ғалым болатын. Өзінің сүйікті физикасын былай қойғанда, алыс-жақын шетелдің тарихы мен мәдениетін тарқата айтып, тұжырымдарымен тыңдаушысын таңғалдыратын. Батыс пен шығыстың әдебиетінен сөз сапырып, ақын-жыраулардың өлеңдерін жатқа соғатын. Табиғи опералық дауысымен ән шырқағанда, қазақтың сары даласының сазы мен күйін көз алдыңа әкелетін-ді. Осындай сегіз қырлы, бір сырлы өзгелерден оза туған біртуар қазақ ұлының өмірден өтуі өкінішті-ақ.
Біздің университет үшін, жалпы халқымыз үшін осындай ғажайып адамнан айырылып қалуымыз орны толмас қайғы. Амал не, жазмыштан озмыш жоқ деген, бәріне көнуге тура келеді. Біз тек сол ғұлама адаммен қатар өмір сүріп, біздің арамызда болғанын зор мақтаныш, мәртебе санаймыз.
Қош болыңыз, аяулы Аға. Сіздің жарқын бейнеңіз біздің жадымызда әрқашанда сақталады.
Ғалым МҰТАНОВ, Әл-Фараби атындағы Қазақ ұлттық университетінің ректоры, академик.