Ардақты адамның аты өшпейді
Бейсенбі, 12 қаңтар 2012 8:04
Әр елде халқының шынайы ықыласына бөленіп, ұлтының мақтанышына айналған тұлғалар болады. Қазақ халқы үшін, елі, жері үшін бүкіл саналы ғұмырын сарп еткен Дінмұхамед Қонаев сондай ардақты адам. Ол ширек ғасырға жуық билік басында болған уақыт қаншалықты күрделі, қарама-қайшылықта болғанымен, елдің экономикасын, әлеуметтік саласын, ғылымын, өнері мен мәдениетін дамыту ісінде айтулы еңбек сіңірді.
Бейсенбі, 12 қаңтар 2012 8:04
Әр елде халқының шынайы ықыласына бөленіп, ұлтының мақтанышына айналған тұлғалар болады. Қазақ халқы үшін, елі, жері үшін бүкіл саналы ғұмырын сарп еткен Дінмұхамед Қонаев сондай ардақты адам. Ол ширек ғасырға жуық билік басында болған уақыт қаншалықты күрделі, қарама-қайшылықта болғанымен, елдің экономикасын, әлеуметтік саласын, ғылымын, өнері мен мәдениетін дамыту ісінде айтулы еңбек сіңірді. Сондықтан да оның жарқын бейнесі бүгінге дейін үлгі-өнеге. Бүгін біз аса көрнекті қайраткерлік, күрескерлік қасиеттерімен халқының жадында қалған Димаш Ахметұлымен ұзақ жылдар тағдырлас, қызметтес болған мемлекет және қоғам қайраткері, жиырма бір жыл аупарткомның бірінші, облпарткомның екінші хатшысы, Қазақ КСР Жоғарғы Кеңесі Президиумы Төрағасының орынбасары қызметтерін атқарған Социалистік Еңбек Ері Вера СИДОРОВАМЕН дидарласудың сәті түскенде, ол кісінің көпшілік біле бермейтін біраз қырларына қаныққандай болдық.
– Вера Васильевна, әңгімеміздің желісін бүгінде аты аңызға айналған Димекеңмен таныстықтан бастасаңыз.
– Димаш Ахметұлымен жеке таныстығым 1967 жылы мамыр айынан басталды деп ойлаймын. Сол жылы Қостанай облысындағы Таран аупарткомының бірінші хатшысы болып тағайындалған едім. Көктемгі далалық жұмыстар жүріп жатқан. Мені Николаев совхозының егіс даласында жүргенімде рациямен тауып алып, осы шаруашылықтың бір бригадасына облпарткомның бірінші хатшысы А.М.Бородин мен республика басшысы Д.А.Қонаевтың келе жатқанын хабарлады. Қалай болады екен деп қатты қобалжыдым. Әрине, бірінші хатшының облысқа келуі сол өңірдегі өнеркәсіп пен ауыл шаруашылығын дамытудың ең маңызды жұмылдырушы факторы болса, ал мен үшін ол кісімен танысудың жауапкершілігі жоғары еді. Сол жылғы оның ауыл, аудан басшыларымен, еңбеккерлермен іскерлік кездесуі, кесімді ұсыныстары, кеңестері, соған орай қатаң талап қою білуі – ауыл шаруашылығы өндірісінде басты бағыттағы жұмыстарды атқаруда үлкен көмегін тигізді.
– Димаш аға – бүкіл халыққа ортақ, қасиетті де қадірлі адам ғой. Ендеше, халқы, жұрты неге жақсы көрді, осы уақытқа дейін неге қадірлейді деген сауалға жауап іздеп көріңізші?
– Біріншіден, Димаш Ахметұлын халықтың бәрі білді. Жалпы ол кісіні қарапайым адамдардан бастап облыс, кәсіпорын басшылары, мемлекет қайраткерлеріне дейін көруге талпынатын. Жиындарда, кеңседе, далада болсын, қашанда бірқалыпты, еш өзгермейтін. Әр іске асқан жауапкершілікпен, ал адамдарға өте ілтипатпен, ықыласпен қарайтын. Ешқандай тәкаппарлық, айбын көрсетпейтін, қара басын ойламайтын. Еңбекті бағалайтын, талантты танитын. Қарапайым, ашық жүзді, жұмысқа қабілетті, патриот, интернациалист-тін. Сондықтан Димаш Ахметұлын әлі бірнеше ұрпаққа үлгі-өнеге болатындай дара азамат дер едім.
– Димекеңмен кездесудің өзі бір ғанибет шығар. Есте қалған әңгімелеріңізден сыр шерте отырсаңыз?
– Ондай оқиғалар көп қой, бір-екеуін айтайын. Жас кезім. 1965 жылы СОКП Орталық Комитетінің ауыл шаруашылығын химияландыру мен мелиорациялауды күшейту мәселелері бойынша пленум өткен болатын. 1967 жылы көктемде Николаев совхозында кездескенімізде Димаш Ахметұлы ауданнан қанша минералды тыңайтқыш жеткізілгенін сұрады. Мен аудан қорынан бөлінген санды айттым да, қанша әкелінгенін білмедім. А.Бородин мені құтқарып қалғанмен, қатты ұялдым. Сосын сабырлы үнмен: «Сіздің аупарткомның бірінші хатшысы болғаныңызға екі апта болса да, бұл сандарды білуіңіз керек еді», деді. Маған бұл ескерту өмір бойына сабақ болды. Көрдіңіз бе, ол кісі қолында сондайлық билік бола тұра, ешкімді беделімен баспайтын, бұйырып сөйлемейтін, кемітпейтін және ешқашан дауыс көтермейтін.
Бізге өте тәжірибелі, әрі ақылман партия жетекшісін тыңдау өте қызық-тын. Солтүстік облыстарға ұлттық кадрлар дайындап, жоғары лауазымды жұмыстарға қоюды өзі бақылап отырды.
Тағы бірде Қостанай облысына келгенде бірінші хатшы А.Бородинге: «Андрей, неге сіздің облыста аупарткомның бірінші хатшылық қызметінде жергілікті бірде-бір ұлт өкілі жоқ?» – деп сұрады. А.Бородин үнсіз тұрып қалды да: «Қазақтар – ақылды халық. Олар барлық жерде бас есепші, ауылдық, аудандық кеңестің төрағалары. Олардың бірінші хатшылыққа тағайындалмайтыны – дастарқан басында жайланып отырып шәйді көп ішеді. Ал астық, жем-шөп дайындау науқаны оны көтермейді», – дегені. Жауапты асықпай тыңдаған соң жәйімен: «Андрей, сен дастарқан басында көп отырмайтындарын іріктеп ал», – деді. Біраз уақыттан кейін А.Бородин бірінші хатшылыққа жергілікті ұлт өкілдерін қоя бастады.
Менің өмірімде мынадай да жағдай болған. 1979 жылы кеңес әйелдерінің құрамында Америкаға жол түсті. Кездесулер Нью-Йорк және Оклахома-Ситиде өтті. Сондай бір кездесуде американдықтардың біреуі: «Сіз Еңбек Ерісіз, бір басыңызда қаншама марапатыңыз бар, Жоғарғы Кеңестің депутатысыз, Қазақстан КП ОК мүшесісіз. Сізді осылай көтермелеп отыратын «түкті қолыңыз» бар ма?» – деген сауал қойды. Олар Ресейде туып өскен басқа ұлт өкілінің Қазақстанда туыстары болмаса да осындай дәрежеге қол жеткізуіне сенімсіздікпен қараған ғой. Ал мен болсам: «Иә, менің «түкті қолым» бар», – дедім. Зал сілтідей тынды. Сосын: «Ол – аса мәртебелі еңбек, Қазақстан Компартиясы және оның басшысы Димаш Ахметұлы Қонаев» дедім. Маған ду қол шапалақтады.
– Қазақстанда Еңбек Ері атағын алған санаулы әйелдер қатарынансыз. Бұл марапат қандай еңбегіңіз үшін берілді?
– Ол кезде Қостанай аупарткомының бірінші хатшысымын. 1976 жылғы астықты жинап жаттық. Димекең келіп, А.Бородинмен егіндікті аралады. Егіс даласы тап-таза – арам шөптен ада. Сол жылы ауданда керемет астық шықты. Бұл шаруашылық басшыларының, мамандардың өз ісіне деген жауапкершілігінің, техникалық базаның жақсаруы мен механизаторлардың шеберлігінің, еңбеккерлердің ерен еңбегінің арқасы еді. Жайқалған егінді көрген Димаш Ахметұлы дала батырларының еңбегіне қатты сүйсініп, ендігі жерде қалайда астықты төкпей-шашпай жинап алудың оңай шаруа еместігін түсінді. Өйткені, аудандағы көлемді дәнді дақыл танаптарының арасы он екі күн айырмашылықпен себілді. Бірақ ауа райының жағдайына байланысты егіс даласындағы астық жинау мерзімі бір уақытқа келді. Сондықтан барлық техника және адам күші егінді дестеге түсіруге жұмылдырылды. Димаш Ахметұлы агрегаттардың егін сабақтарын жарым-жартылай алып жатқанын көрді. Көптеген алқаптарда егін жатып қалғандықтан жаткаларды бір бағытта жүргізе отырып, масақ көтергіштерді пайдалануға тура келді. Бір кезде Димекең егіннің масақты сабақтарын құшақтап тұрып: «Мемлекетке қанша астық өткізесіздер?» деді. Мен: «25 млн. пұт» деп жауап бердім. «Өте жақсы. Егер сөздеріңізде тұрып, осыншама астық өткізсеңіздер, Қазақстанға бір Еңбек Ері жұлдызы бөлінсе, ол – сіздікі», – деді. Басшымыздың еңбегімізді жоғары бағалағанына рахмет айттым да: «Сол жұлдыздың орнына аудан орталығына Мәдениет үйін салуды жоспарға енгізуді сұрауға бола ма?» – дедім. «25 млн. пұт болса, жұлдыз да, Мәдениет үйі де болады» деді. Сөйтті де, көмекшісін шақырып өтінішімді қабылдауға тапсырма берді.
Дереу іске кірістік. Рудный қаласындағы Соколов-Сарыбай кен-байыту комбинатымен келісіп, олар ауыр салмақты көліктерін жүк тиейтін қондырғыларымен жіберді. Сөйтіп, олар егістік алқапты жалап-жұқтап, бір дән қалдырмай жинап берді. Әрине, біз де еңбеккерлердің дала қосында жұмыс жасауына барлық жағдай жасап, елдің бәрін шақырдық. Келген адам жылжымалы моншаға түсіп, демалып, тамақпен қамтамасыз етілді. Ең бастысы, егіс даласында астықты қалдырмау үшін адамдармен қалай жұмыс істеудің әдісін тауып алдық.
1976 жылдың күзінде Қазақстан диқандарының мемлекетке 1 млрд. 100 млн. пұт астық өткізуге арналған республикалық жиынына мен де шақырылдым. Онда Қостанай ауданы қазақстандық миллиардтың төрттен бір бөлігін, яғни 25 млн. пұттың орнына мемлекетке 39,4 млн. пұт тапсырғанын айттым. Димаш Ахметұлы қолын көтеріп, залды орнынан тұрғызды. Ұзақ ду қол шапалақтау!..
– Елбасы Н.Назарбаев: «Аса көрнекті мемлекет және қоғам қайраткері Д.А.Қонаевтың тарихтың төрінен орын алары дау тудырмайды. Димекең өз заманының перзенті болған тұлға. Қонаев есімі Қазақстан халқымен бірге жасары анық, ақиқат. Ол кісі бәрімізге ұстаз болған ұлы адам», деп жазады. Сіз де «Қонаев шекпенінен» шыққан кадрсыз. Яғни, Димекең ұлағатты ұстаз, үлкен тәрбиеші де ғой…
– Ол енді ақиқат. Бірде ол кісі өзіне шақырып: «Оралға облпарткомның екінші хатшысы болып барасыз», – деді. Ал мен: «Сізден әкем ретінде өтініп сұраймын, отбасым, балаларым бар. Бауыр басқан Қостанай облысында қала берсем. Оның үстіне облпарткомның екінші хатшысы күрделі, әрі жауапты қызмет. Сеніміңізден шыға алмасам қайтем», – дедім. Димекең болса: «Маған бәрі де белгілі жайт, ал сен қызым ретінде, өзіңе тапсырылған міндетіңді атқар», – деп жауап берді. Содан еш таныс емес облысқа баруыма тура келді. Ол облыста да бел шешпей адал қызмет жасадым. Одан кейін Димекеңнің ұсынуымен Жоғарғы Кеңес Президиумы Төрағасының орынбасары болып тағайындалдым. Бірақ, ол жұмысты Д.Қонаевпен емес, жаңадан тағайындалған бірінші хатшы Г.Колбинмен істеуге тура келді. Ол да М.Горбачев сияқты республика Жоғарғы Кеңесі Төрағасы қызметін қоса атқарғысы келді. Бірде маған: «Шамасы біздер («два русака») бір-бірімізге кедергі жасап жүрген сияқтымыз», деді. «Мен сізді түсінбедім. Егер мен сізге кедергі келтіріп жүрсем, қазір-ақ кетемін. Ал сіз маған қандай кедергі жасауыңыз мүмкін, жұмбақтамай ашық айтыңыз», – дедім. Содан бұл мәселеге М.Есенәлиев араласып, Колбинге: «Геннадий Васильевич, Қазақстан халқы, оның ішінде зиялы қауым қазақ емес ұлттың өкілі енді Жоғарғы Кеңестің Төрағасы болуын көтере алмайды. Оның шет жағын өзіңіз Желтоқсан оқиғасынан байқадыңыз», – деп шешіп берді. Міне, содан кейін Г.Колбин бюроның қай отырысында болсын мені әр мәселе бойынша орнымнан тұрғызбаған күні болмаған шығар. Оның үстіне оған Қонаевтың кадрлары керек емес еді. «Қонаевшылар» деген сөзді Колбин өте жиі қолданатын.
Аса көрнекті мемлекет және саяси қайраткер Димаш Ахметұлы – әрқашан халықтың есінде сақталады. Маған ол кісі дүниеден өткенде ұлы адамның табытының қасында құрметті қарауылда тұру құрметі бұйырды. Киров көшесінің бойымен жылжыған жерлеу шеруі кезінде Д.А.Қонаевтың денесі салынған көліктің астына қарапайым адамдар гүл дестелерін лақтырып жатты. Ал оларды ешкім де бағыттап, үгіттеп тұрған жоқ еді. Алматылық қазақ, орыс, ұйғырлар көздеріне жас алып, көпұлтты Қазақстан халқының көшбасшысына өз құрметтерін көрсетіп жатты…
Сөз соңында айтарым, Димаш Ахметұлы ұлы Адам болды, ұлы болып қала бермек.
Әңгімелескен Гүлзейнеп СӘДІРҚЫЗЫ.