Биік парасат иесі
Жұма, 27 қаңтар 2012 7:25
Тәуелсіз Қазақстанның индустриялық-инновациялық бағытта даму жолына негіз болған ғылыми ізденістерге толы ерен еңбегімен танылған академик Әбдіғаппар Әшімұлы Әшімовтің ғылыми шығармашылық өмірі бүгінгі ұрпаққа үлгі. Саналы ғұмырын ғылымның заманға лайық жаңа салаларын жолға қоюға арнаған, азаматтық өмірі өнегелі істерге толы Әбдіғаппар Әшімұлының сәби шағы соғыстың ауыр жылдарына тұспа-тұс келді. Әкесінен ерте айырылып, балалар үйінде тәрбиеленуге мәжбүр болды. Cоған қарамастан Шу стансасының орта мектебін озат бітіріп,
Жұма, 27 қаңтар 2012 7:25
Тәуелсіз Қазақстанның индустриялық-инновациялық бағытта даму жолына негіз болған ғылыми ізденістерге толы ерен еңбегімен танылған академик Әбдіғаппар Әшімұлы Әшімовтің ғылыми шығармашылық өмірі бүгінгі ұрпаққа үлгі. Саналы ғұмырын ғылымның заманға лайық жаңа салаларын жолға қоюға арнаған, азаматтық өмірі өнегелі істерге толы Әбдіғаппар Әшімұлының сәби шағы соғыстың ауыр жылдарына тұспа-тұс келді. Әкесінен ерте айырылып, балалар үйінде тәрбиеленуге мәжбүр болды. Cоған қарамастан Шу стансасының орта мектебін озат бітіріп, 1954 жылы Ленин атындағы Қазақ политехникалық институтының автоматтандыру және металлургия факультетіне оқуға түсуі болашақта қызығы да, қиындығы да мол ғылымның жаңа саласына баруына жол ашқан. Шындығында, институтты 1960 жылы үздік тәмамдаған жас түлек ұстаздарының ұсынысы бойынша әйгілі ғалым Д.И.Лисовский басқарған Мәскеудегі Болат және қорытпалар институтының «Түсті және сирек кездесетін металдарды автоматтандыру» кафедрасында аспирантураға қабылданды. Осы сала бойынша бұл ғылыми ортаның беделі Одаққа ғана емес әлемге белгілі болатын. Сонау Мәскеуге барып жоғары оқу орнынан кейінгі ғылым жолына қабылдануы қарапайым ауыл баласы – Әбдіғаппар Әшімұлының ізденімпаздығының, алғырлығының, білімге деген ұмтылысының және жаңалыққа деген құштарлығының дәлелі еді. Ғылымға біржола ден қойған Әбекеңнің ғалым ретінде қалыптасуына аттары әлемге белгілі академиктер С.В.Емельянов, А.А.Красовский, Г.С.Поспелов, Я.З.Цыпкин секілді ғұлама ғалымдардың үлкен ықпалы болды әрі осындай орасан ғылыми әлеуеттің әсерімен Қазақстанда әлі зерттелмеген тың тақырыптарды игеруге бел буды. Бойындағы дарындылық пен еңбекқорлық және табандылықтың арқасында ол қышқылданған никель қазбаларын шахталық қорытуды математикалық модель көмегімен зерттеу мәселелерін кандидаттық диссертациясы арқылы бірінші болып ғылыми айналымға қосты. Еліне оралған соң өзі оқыған политехникалық институтта металлургиялық үдерістерді автоматтандыру кафедрасын және техникалық кибернетика кафедрасын басқарды. Осы кафедралар жанында ғылымның бұл бағыттары бойынша елімізде жаңа мектептің іргетасы қалана бастады. Сонымен қатар өзі ашқан автоматтандырылған басқару жүйесінің проблемалық және салалық зертханасына ғылыми жетекшілік жасап, жаңашыл идеяларға бастамашы болды. 1972 жылы Мәскеу Болат және қорытпалар институтында докторлық диссертациясын түсті және қара металдарды өндіру саласындағы автоматтық басқару және реттеу мамандығы бойынша қорғаған Әбдіғаппар Әшімұлының есімі сол кезде-ақ Одақ көлеміне дүркірей танылған. Одан кейін интеллектуалдық тұғыры мықты жас ғалым Қазақ политехникалық институтына ректор болған жылдары жоғары оқу орынында білім беру саласына үлкен жаңалықтар әкелген еді. Әбекеңнің жетекшілігімен әрі тікелей араласуымен жоғары білімді мамандарды даярлау сапасын кешенді басқару жүйесі және нормативті-әдістемелік база қолданысқа енгізілді. Бұл шын мәнінде жоғары оқу орнында маман даярлау ісіне соны серпін әкелген үлкен жаңалық еді. Осы жаңалығы үшін 1985 жылы Мәскеуде БХШЖ (ВДНХ)-ның күміс медалін жеңіп алғандығын, ол басқарған жоғары оқу орнының қатарынан үш жыл бойы (1981, 1982, 1983) маман даярлау саласында ең жоғары жетістіктері үшін КСРО Жоғары және орта білім министрлігінің ауыспалы Қызыл туы мен 1 дәрежелі дипломын иеленгендігін еске ала кеткен орынды. Ғылыми дарындылық, басқарушылық, ұйымдастырушылық, іскерлік пен ілкімділік секілді қабілеттер мен қасиеттер бір бойында тоғысқан Әбдіғаппар Әшімұлы 1989 – 1991 жылдары Ғылым академиясының математика және механика институты директорының орынбасары, 1991-1994 жылдары ҚР ҰҒА Информатика және басқару проблемалары институтының директоры қызметтерін атқарған жылдары да ғылымның жаңа көкжиектеріне соны соқпақ салуға күш салды. Жоғары Аттестациялау комиссиясына төрағалық етті. Ғылыми жаңашылдық мүмкіндігі мен жоғары парасат-пайымы және басқару ісі мен ғылыми ұйымдастыру жұмыстарындағы мол тәжірибесі кибернетика, автоматика, информатика, жүйелі басқару ғылымдары бойынша жаңа ізденістерді саралау, сараптау жұмысына зор көмегін тигізгені рас. Осы жылдары ғылымның бұл саласы бойынша жаңа зерттеулер мен тың еңбектер дүниеге келгені де, жаңа талпыныстарға жол ашылғаны да ақиқат еді. Әбдіғаппар Әшімұлы Әшімовтің есімін атағанда ең қиын және аса қажетті мамандықтарға қатысты «кибернетика», «автоматика», «информатика», «жүйелі басқару» атаулары мен ұғым-түсініктері қатар жүреді. Өйткені, ол – автоматтық басқару жүйесінің теориясы мен техникалық кибернетика теориясының және жүйелерді модельдеу теориясының отандық мектебінің негізін қалаушы; сонымен қатар, металлургиялық үдерістерді болжалдау және тиімдендіру түйіндерін математикалық модельдеу әдістерін қолдана отырып шешуді Қазақстанда ғылыми жолға қойған алғашқы және бірегей маман. Қара және түсті металдарды өндіру саласында автоматтық басқару мен реттеуді қазақстандық ғылымға енгізу жолындағы ұшан-теңіз еңбегі де ауыз толтырып айтарлық.
Ол – осы салалар бойынша мамандар даярлау ісін де жүйелі түрде жолға қоюды бастаған және ұйымдастырған, басшылық жасаған қайраткер. Сонымен қатар, ғылым өрісін одан әрі кеңейтер шәкірт тәрбиелеген ұлағатты ұстаз. Үлкен парасат иесі. Бүгінге дейін Ә.Ә.Әшімовтің жетекшілігімен 10 докторлық және 50 кандидаттық диссертация қорғалды. Жаңа заманға лайық ақпараттық технология дамыған уақытта ең бағалы да аса қажетті ғалым-мамандар дайындап шығарған тағылымы мол тәлімгер. Қ.Ш. Асаубаев, Б.А. Жаппаров, Г.З. Қазиев, Қ.С.Сағынғалиев, Д.Ж.Сыздықов, С.П.Соколова, Ғ.М. Тоқтабаев, Ө.А. Түкеев, Д.Н. Шукаев және басқа да шәкірттерімен бірге бірдейлендірудің теориялық негіздерін және ұйымдастыру жүйелері мен автоматтық басқарудың қазіргі теориясын зерттеуді жүзеге асырды. Оның одан кейінгі жетекшілігімен автоматтық басқару теориясы бойынша жиілікті-үдемелі жүйелердің стохастихалық теориясының негізі жасалды. Әсіресе, өзгермелі конфигурациясы бар жүйелерді анализдеу мен синтездеу саласындағы ғылыми ізденістері де аса бағалы. Сонымен бірге деректерді өңдеудің модульді жүйелерін саралау және сараптау әдістері мен нұсқаларын әзірлеуі де ғылыми құнды жұмыс. Осылайша Ә.Ә.Әшімовтің тікелей көшбасшылығымен әр жылдарғы шәкірттерінің ерен еңбегінің нәтижесінде Қазақстанда кибернетика, автоматика салаларының ғылыми мектебі қалыптасты.
Әрине, ғылыми жұмыстың құндылығы теориялық қорытындылардың өндірісте қолданылып, өз нәтижесін беруінде. Осы бағытта да Әбдіғаппар Әшімұлы қыруар іс тындырды. Мысалы, ол Шымкент қорғасын зауытында, Өскемен қорғасын-мырыш, Балқаш кен-металлургия, Жезқазған тау-металлургия комбинаттарында және «Ақтөберентген» бірлестігінде өндірісті, сондай-ақ технологиялық үдерістерді басқарудың бірнеше автоматтандырылған жүйесін жасап қолданысқа енгізді. Жезқазған мыс балқыту зауытындағы газ желісі мен шаңтұтқышта технологиялық үдерістерді басқарудың автоматтандырылған жүйесін жасап, оны өндіріске енгізгені үшін Қаз ССР Министрлер Кеңесі сыйлығының лауреаты атағын иеленген болатын.
Теория мен практиканы ұтымды ұйымдастырудың шебері атанған ғалым ғылыми ізденістерден туған ойларын, қорытындыларын, айқындамалары мен анықтамаларын үнемі жүйелеп, жариялап халық игілігіне ұсынып отырады. Оның 400-ге жуық ғылыми жұмысы бар. Солардың ішінде 12 монографиясы еселі еңбегінің ең жоғары көрсеткіші саналады. Ә.Ә.Әшімов ғылыми ізденістерінің нәтижелері сан рет халықаралық деңгейдегі ғылыми жиындарда әлем назарына ұсынылған. АҚШ, Болгария, Франция, Италия, Германия, Жапонияда әр жылдары өткен форумдар мен симпозиумдарда, конгрестер мен конференцияларда басқару және автоматтандыру саласы бойынша Қазақстан атынан озық ойларын ортаға салып, ел мәртебесін көтергеніне әлем ғалымдары талай мәрте куә болған. Менің де куә болған кезім бар. Ана жылдары Мәскеуде Әбекең аспирант болған, докторлық диссертация қорғаған кафедрада ғылыми-зерттеу мақсатындағы ізденістермен жүрдім. Сондағы кибернетика, информатика, автоматизация саласындағы аттары әлемге әйгілі ғалымдардың Әбдіғаппар Әшімұлын аузынан тастамай, үнемі мойындап отыратындығы және осы саладағы ең озық ғалымдардың қатарында санайтындығы мақтаныш сезімімді оятты және ол сезім әлі күнге менен арылған жоқ. Кейін 1993 жылы Мәскеудің белгілі ғалымдары – академиктер В.А.Горбатов, Е.Н.Юзвишин, В.В.Редкозубов, т.б. Халықаралық ақпараттандыру Академиясын Қазақстанда кім басқарады дегенде олардың Әбдіғаппар Әшімұлы Әшімовке тоқтағаны да қайраткер ғалымның халықаралық салмағының жоғары екендігін дәлелдейді.
Әбекең шын мәніндегі жаһандық кеңістікке шыққан ғалым екендігін әлі күнге ірі-ірі ізденістерімен дәлелдеп келеді. Қазірде математикалық модельдеу және жүйелі инжиниринг саласында ғылыми пікірлері ең жиі пайдаланылатын және тілге тиек етілетін, әлем ғалымдары ғылыми ойларына тірек ететін санаулы ғалымдар қатарында. Тек соңғы жеті-сегіз жыл ішінде Ә.Ә.Әшімовтің жетекшілігімен авторлар ұжымы жасаған 50-ден астам ғылыми нәтиже АҚШ, Канада, Ұлыбритания, ҚХР, Австрия, Ресей және басқа мемлекеттердегі журналдар мен форумдарда жарияланды. Бүкіләлемдік жүйелер мен кибернетика ұйымының ХV Халықаралық конгресінде Ә.Ә.Әшімовтің телавторлармен бірге жасаған ғылыми баяндамасы «Аса үздік мақала» деген жоғары марапатқа ие болды.
Жоғары кәсіби мамандарды даярлағаны және үздік ғылыми жетістіктері үшін «Еңбек Қызыл Ту», «Халықтар достығы», «Парасат» ордендерімен наградталған, ерен еңбегінің нәтижесінде «Қазақ ССР-нің еңбек сіңірген ғылым қайраткері» деген атаққа ие болған Ә.Ә.Әшімов 1997 жылдан Білім және ғылым министрлігі Информатика және басқару проблемалары институтында «Жүйелі анализ және басқару» зертханасының меңгерушісі, Қ.И. Сәтбаев атындағы Қазақ ұлттық университетіндегі «Ақпараттық технологиялар» кафедрасының профессоры қызметін атқарып келеді. 2003 жылдан ҚР ҰҒА академигі.
Бүгінге дейін тынымсыз еңбек етіп келе жатқан әлемдік ауқымдағы қайраткер ғалымның осыншама жетістіктерінің сыры, меніңше, оның арының тазалығы мен өз кәсібіне деген адалдығында, еліне, жеріне деген перзенттік сүйіспеншілігінде. Осы қасиеттер бойына ерте дарыған Әбдіғаппар Әшімұлы Әшімов әлі талай асуларды бағындырары сөзсіз.
Ғалым МҰТАНОВ, Әл-Фараби атындағы Қазақ ұлттық университетінің ректоры, академик.