Бүгінде оның алдыңғы тізбегінде Еуразиялық топ (Еurasian Resources Grop) кәсіпорындары тұр. Бұл табиғи ресурстарды өндіру мен өңдеу энергетика, логистика және маркетинг салалары бойынша әлемдегі әртараптандырылған жетекші компаниялардың бірі екенін айта кеткен жөн. Төрт құрлықтағы 15 елде орналасқан топ кәсіпорындары өз салалары бойынша ірі жұмыс берушілер бола білуімен ерекшеленеді. Еліміздегі жоғары маркалы алюминий өндіретін баламасы жоқ жалғыз кәсіпорын да Еуразиялық топтың құрамында екені мәлім. Мыс пен кобальт өндіру мен өңдеу ісінде де ERG-дың үлесі жоғары. Сондай-ақ бүкіләлемдік экономикалық форум тұғырнамасында құрылған аккумуляторлы батареялар секторына арналған жаһандық альянстың құрылтайшы-серіктесі болуы да оның зор әлеуетін аңғартады.
Трансұлттық компания құрамындағы «Қазхром» АҚ металлургия, тау-кен ісі, құрылыс, автомобиль және жол қозғалысын ұйымдастыру мамандықтары бойынша Қ.Жұбанов атындағы Ақтөбе өңірлік мемлекеттік университетінің 50 түлегін қызметке алу жөнінде шешім қабылдады. Компанияның президенті Арман Есенжоловтың айтуынша, екіжақты келісімге сәйкес түлектерді жұмысқа қабылдаудың арнайы бағдарламасы жасалған. Артықшылығы, ақысы төленетін тәлімгердің тағайындалуы. Оның басты қызметі – жас кадрларды өндірістік тәжірибеге баулу. Бұған қоса түлектерді жұмысқа орналастыру, олардың қызметте өсу мен өрлеу жолдарының жоспарын әзірлеу және кадрлар легі мен резервін енгізу жөнінде де тиісті іс-шаралар белгіленген.
– Біз жоғары өндірістік межеге кәсіби біліктілігі жоғары мамандарға арқа сүйеген жағдайда ғана жете алатынымызды жақсы түсінеміз. Әрі мыңдаған адам қызмет ететін іргелі кәсіпорынға мақсаткер, өршіл, талабы биік, жауапкершілігі жоғары жастарды қабылдауға қашан да әзірміз, деді «Қазхром» АҚ президенті Арман Есенжолов. Компанияның ең басты құрылымдық бөлімі 4300 адам жұмыс істейтін Ақтөбе ферроқорытпа зауыты болса, оның 800-ден астамы Қ.Жұбанов университетінің түлектері екен. Бұл – қызметкерлердің 20 пайызы осы жоғары оқу орнын бітіріп, жұмысқа орналасқандар деген сөз, дейді зауыт директоры Жалғасбек Мұсабеков. Тіпті Жалғасбек Берекетұлының да Жұбанов университетінің түлегі екенін айта кетелік. Ол 2002 жылы аталған жоғары оқу орнын инженер-металлург мамандығы бойынша үздік дипломмен аяқтапты. Содан соң еңбек жолын осы өндірістік ұжымда ферроқорытпа балқыту қызметінен бастап, өз шеберлігі мен біліктілігін көтере отырып, кәсіпорын басшысына дейін көтерілді. Бұл мысалдың өзі де түлектерге ой салары анық. Сондай-ақ өндіріс жетекшілерімен ой-пікір алмасу кезінде қызметке қабылданған түлектер тиісті әлеуметтік жеңілдіктермен қамтылатыны жөніндегі деректерге қанықтық. Бұл олар үшін аса маңызды артықшылықтардың бірі болмақ. Атап айтқанда, медициналық сақтандыру, тамақтандыру, арнайы бөлінген көлік пен тұрақты мекенжайы жанынан жұмысқа тасымалдау жыл қорытындысы бойынша бонустар беру, өндіріс ерекшелігіне сәйкес кезекті еңбек демалысына қосымша күндер қосу, санитарлық-курорттық карталарды жеңілдетілген бағамен ұсыну кіреді екен. Сондай-ақ Еуразиялық топ құрамындағы кәсіпорындарда қызметке қабылданған жас кадрлардың тұрғын-үй бағдарламасына қатысу мүмкіндіктері жоғары екені де атап айтуға тұрарлық мәселе.
АҚТӨБЕ
