Аймақтар • 23 Мамыр, 2019

Атырауда бұрын-соңды болмаған нысандар салынуда

693 реткөрсетілді

Өткен жылы Атырау облысында тұрғын үй құрылысын салу көрсеткіші рекордтық деңгейге жетті. Алып құрылыс алаңына айналған аймақта пайдалануға берілген әлеуметтік нысандардың да қатары көп. Қос құр­лықты жалғаған Жайық жағасы әдемі келбетке ие болды, заңғар көкпен таласқан зәулім ғимараттар, жаңа саябақтар мен алаңдар мұнай­лы шаһардың шырайын келтірді. Бұл бағыттағы жұмыстар биыл да жалғасын табуда. Облыс орталығында салынып жатқан жаңа нысандар­ды аралау барысында оң өзгерістерді көріп, көзіміз де, көңіліміз де қуанды.

«Сасықсай» жабылады

«Атыраудың нөмірі бірінші проблемасы не?», десек, әрине, бұл – экология. Қалаға тым жақын орналасқан ірі кәсіпорындардың ауаны таза сақ­таудан айыппұл төлеуді қолайлы көретін деректері аз кездеспейді. Жер­гілікті жұртшылықты ел арасында «Сасықсай» аталып кеткен бу алаңынан шығатын күлімсі иіс те жиі алаңдатады. Тазартылмаған кәріз суы талай жылдан бері жерасты сулары мен топырақты, ауаны ластап келді. Енді бұл мәселе шешімін табады деген үміт бар. Биыл облыс орталығының сол жағалауында жаңа кәріз тазарту кешені іске қосылады. Бас кәріз стансасы мен кәріз таза­лау нысандарының алаңынан, био­логиялық тоғандар мен булану ал­қап­тарынан тұратын кешеннің құ­рылысына 10 млн теңге бөлінген. Жаңа нысанда тәулігіне 70 мың текше метр кәріз суы тазаланады. Облыстық құрылыс басқармасының басшысы Мәлік Аманов: «Қаладағы кәріздік желілер осы қондырғыға қосылады. Атырауда бұрын-соңды мұндай тазарту қондырғысы болмаған. Басты мақсат – экологиялық ахуалды жақ­сарту, халықтың денсаулығын сақ­тау. Кешеннен техникалық су шы­ғарылады, ал қатты қалдықтардан тыңайтқыш дайындалады», дейді. Соңғы жылдары облыс орталығында қолға алынған жақсы жобаларды аудан­дарда да жалғастыру дәстүрге айналып келеді. Аудан орталықтарында да көпқабатты тұрғын үйлер мен заманауи әлеуметтік нысандар салынып жатыр. Соның айғағындай, жаңа үлгідегі кәріз тазарту кешені Құлсары қаласында, Махамбет, Құрманғазы, Доссор, Аққыстау ауыл­дарында бой көтереді.

Атыраудағы кешен іске қосыл­­ғаннан кейін «Сасықсай» жабылады. 1978 жылы салынып, содан бері бірде-бір рет күрделі жөндеу жүргізілмеген булану алаңы туралы әңгіме осымен тәмамдалады. Алдағы уақытта оң жақ жағалаудан да осындай кәріз тазалау жүйесі мен тұрмыстық қалдықтарды қайта өңдеу орнын салу жоспарда бар.

 

Жайық жағасында – жайлы демалыс

Атырауға келген қонақтың Жайық жағасына бармайтыны кемде-кем. Қала тұрғындары да жылдың төрт мезгілінде демалуға осы жерді қолай­лы көреді. Өзен жағасын абаттандыру туралы облыс әкімі Нұрлан Но­ғаев өткен жылғы халық алдын­да бер­ген есептік кездесуінде айтқан бо­ла­тын. «Тұрғындар тарапынан Жайық өзені жағалауының жағдайына байланысты көп шағым түседі. Аты­раулықтар жағалауды абаттандырып, жақсартуды сұрайды» деген аймақ басшысы жаңа жағалау қаланың бас­ты символына айналатынын атап өткен еді. Қазір Бейбарыс даңғылынан Жастар саябағына дейінгі жағалауда айрықша демалыс орнын жасау бағытында жұмыстар жүріп жатыр. Мердігер мекеме өкілі Мөңке Шлы­қовтың айтуынша, жағалау үш учас­кеге бөлінген. Бұл жерде жағажай, суға түсетін орындар мен балалар ала­ңы, веложолақтар, халықтың ты­нығуына қажет барлық жағдайлар жасалады. Жайық жағасына 155 кө­ше шамы орнатылады. Шағын сәу­лет мүсіндері мен гүлдер, жасыл алаңқайлар, тал-теректер де қарас­тырылған. Келісімшарт бо­йынша құрылыс 2020 жылдың сәуір айында аяқталады. Келер жылдың көктемінде атыраулықтар тамаша демалыс орнында қыдыруға мүмкіндік алады.

 

Орталық алаңда – мәрмәр домбыра

Атыраудың көрікті жерлерінің бірі – Исатай-Махамбет атындағы орталық алаң. Алаңды қайта жаң­ғыр­тудан өткізу жұмыстары жос­пар­ға сай жүруде. Облыстық құ­ры­лыс басқармасының басшысы Мәлік Амановтың сөзіне сүйен­сек, жаңартылған алаң биыл қа­зан айында өтетін Қала күні мере­ке­сінде пайдалануға беріледі. «БатысАльянсСтрой» ЖШС бас дирек­торы Әділ Жұбановтың айтуын­ша, жоба құрылысына алдыңғы қа­тарлы инженерлік технологиялар қол­данылған. «Алаңға 50 мың шаршы метр автоматты суару мүмкіндігі бар 2000-ға жуық гүлзар орнатылады, осылайша адам факторы толығымен алынып тасталады, суару жүйесі компьютермен басқарылады. Алты бассейн мен субұрқақ та осы технологиямен жұмыс істейді. Қазір қаптау, монтаждау жұмыстары жүруде», дейді Әділ Жұбанов.

Орталық алаңда, сондай-ақ алтын түстес әшекейлермен безендірілген мәрмәр домбыра түріндегі сәулет композициясы орын алады. Әуен ырғағына қарай түрлі түске боялатын ғажайып субұрқақ, қызыл-жасыл гүлге толы алқап қала тұрғындары мен қонақтарына жайлы демалыс сыйлары сөзсіз.

 

Жастарға жақсы мүмкіндік

Мемлекеттік саясаттың басты ба­ғыттарының бірі – жастардың сапалы білім, саналы тәрбие алып, азамат болып қалыптасулары. Осы ретте Елбасының 2019 жылды Жастар жылы деп жариялауы мұнайлы өңір­­дегі біраз игі істердің бастау алуы­на септігін тигізді. Биыл облыс орталығында оқушылар және жас­тар сарайы ашылады. Құрылыс жұ­мыстарымен танысу барысында төрт қабатты ғимараттың соңғы үлгіде және сапалы салынып жатқанына куә болдық. Жастардың бос уақытын тиімді өткізулеріне арналған орында спорт залдары, интернет-орталық, медиа-кітапхана, компьютерлік графика бөлмесі, көрме музейі, галерея, жаттығу, хореография залдары, мә­жіліс залы мен бассейн, теа­тр студиясы, биохимиялық зертхана, түрлі үйір­мелерге арналған бөлмелер болады. Ең қызықтысы, төртінші қабат. Мұнда балалар әуе мен зымыран модельдеу зертханаларында ғылым мен техника әлеміне, кеме модельдеу­ге, компьютерлік техникаға, электр және радиотехникалық зертханаларға, бейне, фото студияларға барып, жаңа дағдыларды меңгере алады. «ARSM» құрылыс компаниясының маманы Жәнібек Шәріповтің айтуынша, қазір құрылыс басында 120 адам жұмыс істеп жатыр. Ішкі сылақ жұмыстары аяқталған, ендігі кезекте ғимарат сырты абаттандырылады. Осылайша, аты­раулық оқушылар мен жастар бос уақытында тіл үй­реніп, спортпен шұғылданып, өнер-білім түрлерін меңгеретін болады.

 

Тутұғыр алыстан   көрінеді

Биыл құрылысы бітетін тағы бір ерекше нысан – тутұғыр мен мем­лекеттік рәміздер алаңы. Жан­гелдин – Құлманов көшелерінің қиылысынан орын алған тутұғыр кешенінің аумағы 57 шаршы метр, биіктігі 91 метр. Ту­тұ­ғырдың екі жағына субұрқақ са­­лынады. Ал артына мәрмәр тас­тан салынған сәулет композиция­сы Қазақстан картасы орнатылады. «Кастатор» ЖШС жобалық ин­женері Асхат Әлианов: «Қазір инженерлік коммуникацияларды жүргізудеміз. Құрылысқа бетон, топырақ, төсеу жұ­мыстарына гранит пен мәрмәр қол­данылады», дейді. Айта кетейік, тутұғыр Атыраудың ең биік нүктесі бо­лады. Қаланың барлық жағынан анық көрінетін рәміздер алаңы мұ­найлы шаһарға сән мен салтанат сыйлайды.

Елбасы «Төртінші өнеркәсіптік рево­люция жағдайындағы да­му­дың жаңа мүмкіндіктері» атты Жол­дауында құрылысқа және ком­муналдық сек­торға заманауи­ тех­нологиялар­ды ен­­гізудің ма­ңыз­ды­лығын айтқан бо­латын. Ғи­ма­раттардың сапасы, эко­логиялық та­залығы мен энергия­лық тиімділігі де баса мән беруді қажет етеді. Аты­рауда қарқын алған құры­лыстың қай-қайсында да қазіргі за­манғы игіліктер қолданысқа ие. Сәні мен сәулеті күн санап артып келе жатқан Жайық жағасындағы жасампаз істердің жалғасы осындай мысалдардан да көрінеді.

 

АТЫРАУ

 

Баннер
Соңғы жаңалықтар

ҰБТ сынағы қалыпты өтуде

Қазақстан • Кеше

БАҚ өкілдерін құттықтады

Қазақстан • Кеше

Көмек көрсетуге шақырды

Аймақтар • Кеше

Өткінші дүние

Руханият • Кеше

Төрлетіңіз, Би-аға!

Аймақтар • Кеше

Ұқсас жаңалықтар