Бұл бастамаға Екібастұздағы Болат Нұржанов атындағы Екібастұз ГРЭС-1 стансасы алғашқылардың бірі болып қолдау көрсетті. Кәсіпорын жанынан ашылған «Greenhouse KZ» ЖШС жылыжай кешенінде 2016 жылы раушан гүлін өсіру қолға алынса, өткен жылы қызанақ өсірудің жаңа өндірістік қуаты іске қосылды. Бүгінде кәсіпорында 175 жұмысшы еңбек етуде.Негізі, жылыжайдың құрылысын гүл өсіруде өркениетті тәжірибесі бар голландық «VAN DER HOEVEN» компаниясы жүргізді. Жылыжай шыныдан тұрғызылған.
Жобаға 3 млрд теңгеден астам инвестиция салыныпты. Инвестициялық жоба голландық инвесторларға тиесілі. Қазір «Greenhouse-Qaztomat» ЖШС биыл 11,5 гектар, ал 2020 жылдың наурызында 10 гектарлық көлемде қсмыа жылыжайды іске қосуды көздеп отыр.
Ал, жұмыс істеп тұрған жылыжай кешені 2 модульден тұрады. Оның 5 гектарында раушан гүлі, екінші 5 гектарлық модульде қызанақ өсіріледі. Былтыр 2,2 мың тонна өнім алынған. 2019 жылы 2,7 мың тоннаға жеткізілмек.
Қызанақтың 90 пайызы Ресейге сатылады. Кәсіпорын ресейлік «Лента» ЖШС ірі дүкендер желісімен келісімшарт жасаған. Қызанақтан бөлек екібастұздық раушан гүлі шетелге экспортталуда. Биыл 10,1 миллион дана раушан гүлдері алынбақ. Жылыжайда 91,3 пайызы әйелдер еңбек етуде.
