Бесаспап
Жұма, 22 ақпан 2013 7:02
Кентау қаласында кеудесіне тас қойып, балғамен ұрғызып сындыртатын, маңдайымен жаңғақ шағатын Жеңіс Берікқара деген қария тұрады. Әрдайым саламатты өмір салтын насихаттап жүретін Жәкең күнделікті турникке тартылып, жүгіруді әдетке айналдырған. Сондай-ақ, ол қала тұрғындарына ақындығымен және халық әндерін нақышына келтіре орындайтын серілік өнерімен де етене таныс. Қалалық соғыс және еңбек ардагерлері хорына қосылғанына да біраз жыл болып қалыпты.
Жұма, 22 ақпан 2013 7:02
Кентау қаласында кеудесіне тас қойып, балғамен ұрғызып сындыртатын, маңдайымен жаңғақ шағатын Жеңіс Берікқара деген қария тұрады. Әрдайым саламатты өмір салтын насихаттап жүретін Жәкең күнделікті турникке тартылып, жүгіруді әдетке айналдырған. Сондай-ақ, ол қала тұрғындарына ақындығымен және халық әндерін нақышына келтіре орындайтын серілік өнерімен де етене таныс. Қалалық соғыс және еңбек ардагерлері хорына қосылғанына да біраз жыл болып қалыпты.
– Мен бұл ортада жанға рахат табамын. Мұнда пікірлес, сыйлас адамдар көп. Хорда көпшілікпен бірге және жеке дауыспен халық әндерін айтамын, – дейді Жеңіс Берікқара.
Ал саламатты өмір салтын ұстануға бел буған кезін қария былайша еске алады:
– Мен 11 жыл бойы «Мырғалымсайда» кенші болып жұмыс істедім. Ондағы жұмыстар ауыр болды. Кейіннен организмімді тазалау үшін спортпен шұғылдануым, саламатты өмір салтын ұстануым қажеттігін түсініп, осы жолды таңдадым. Қазір таңертең ерте тұрып, төрт-бес шақырым жүгіріп келіп, дене жаттығуларын жасаймын. Өз бастамаммен «Сегіз сері» деген клуб аштым. Оның мүшелерінің көпшілігі зейнет жасындағы жандар. Арасында жастар да бар. Бекзат Саттарханов атындағы балалар және жасөспірімдер спорт мектебінде аптасына үш күн жиналып, әртүрлі жаттығулармен шынығып тұрамыз.
Жәкең өткен жылы өзі өсірген түрлі табиғи гүлдер мен үйіндегі кітаптардың барлығын жинап мәдениет сарайы мен орталық кітапханаға өткізіпті. Олардың ішінде «Абай жолы», «Сырым батыр», «Манас» эпосы, «Батырлар жыры», Мұхтар Әуезов, Сәбит Мұқанов, Тахауи Ахтанов, Әнуар Әлімжанов, Бауыржан Момышұлы, Әзілхан Нұршайықов секілді ақын-жазушылардың кітаптары мен спорт, медицина тақырыбындағы өте сирек кездесетін, бағалы еңбектер бар.
Бұдан бөлек, ақсақал қарапайым құрылыс материалдарынан түрлі композициялар жасаумен айналысады. Мәселен, Қазақстан ЕҚЫҰ-ға төрағалық еткен жылдары ескерткіш балбалтасты құрастырса, Ұлы Жеңістің 65 жылдығы қарсаңында майдангерлердің ерлігін бейнелейтін композиция жасады.
Қайрат ЗАЙНИШЕВ.
Оңтүстік Қазақстан облысы.
