«АЗМК» ЖШС бас директоры Шухрад Шардиновтың айтуынша, шпал шығару өндірісі өнімнің термоылғалдану кестесін бақылайтын автоматты бағдарламамен қамтамасыз етілген. Автоматтандыру жүйесі уақытты екі есеге дейін қысқартып, өнімділікті екі, өндіріс алаңдарын төрт есе арттыруға мүмкіндік береді.
Алматы көпір конструкциялары зауытындағы темір жол шпалдарын шығаратын өндіріс орнының ашылуына қала әкімі Бауыржан Байбек қатысып, қаладағы 1,5 мың өндіріс орындарының жұмысы жайында, сондай-ақ бүгінде АЗМК саласында еңбек етіп жатқан бес жүзден астам жұмыс күшінің әлеуетіне тоқталды. Қала басшысының айтуынша, бүгінде «Нұрлы жол» бағдарламасы аясында көлік инфрақұрылымы қарқынды дамып келе жатқанына байланысты кәсіпорын өнімдеріне сұраныс жоғары. Ал жұмысшы мамандығына қашанда құрмет жоғары, деп атап өтті қала басшысы.
Қазіргі кезде мегаполисте «Бизнестің жол картасы-2020» және «Жібек жолы» қалалық бағдарламасы арқылы отандық кәсіпорындарға қолдау көрсету аясы барынша артып келеді. Инвестициялық ахуалдың жақсаруымен байланысты ағымдағы жылдың үш айы ішінде ғана шетелдік инвестициялар 21,4 пайызға артып, 111,1 млрд теңгені құрады. Осының дәлеліндей, Алатау ауданындағы Индустриялық аймақта құны 144 млрд теңгені құрайтын 39 жоба жүзеге асуда. Жапония, Гонконг, Қытай, Ресей, сондай-ақ неміс капиталының қатысуымен 5 зауыт ашылды. Оның ішінде жылына қуаты 550 мың тонна тұрмыстық қатты қалдықтарды сұрыптайтын кешен, электравтобустардың үшінші буынын жасап шығаратын зауыт, т.б. бар.
АЛМАТЫ
