Қазақстан • 04 Маусым, 2019

Садақ атудан әлем чемпионаты аяқталды

1127 рет
көрсетілді
1 мин
оқу үшін

Елорда төрінде «Nur-Sultan Ethno Fest» мерекесі аясында ұйымдастырылған ат үстінде садақ атудан әлем чемпионаты аяқ­талды.

Садақ атудан әлем чемпионаты аяқталды

«Қолына алып толғанып, Қозы жауырын жебені, Ат үсті­нен шіреніп, Сонда тұрып тартады» деп батырлар жырында ай­тылғандай, елорда төріне жиналған әлем мергендері үш күн бойы «Алтын жебе» жүл­десін сарапқа салды. Яғни, же­бесі жерге түспейтін сайыскер­лер сапында: түркиялық қос мерген Альперен Алкан мен Явуз Аяз, сириялық Уалид Хауаж­ки, иран мергені Али Гурмани, болгариялық Дими­тар Труканов, америкалық са­­дақ­шылар Ходлей Хал­сон мен Франк Сихлер, оңтүстік­кореялық  Парк Беом Нам және Ли Сунг Хо, моңғолиялық мық­тылар Эрденесувд Эрдене, Ган­тумур Иденбаатар, ресейлік Хон­гр Уладаев, Мороко Любовь, украин азаматтары Виталий Гудын  мен Виталий Янченко, румыниялық венгр Михай Козмей,  қырғыз са­йып­қырандары Аку­нов Алмаз­бек пен Қадырбекова Аяна, т.б. сынға түсті. Мәрте­бе­лі жа­­­­­­­­рыс­­ты өткізуші ел ре­тін­де Қа­­­зақ­стан атынан бес мерген қа­­­тыс­ты.

Чемпионат «Түрік стилі» және «Қазақ стилі» бойынша­ өтіп, бас бәйге қазақ сұр­мер­­гені Ералхан Айкөзге бұ­йыр­са, келесі жүлде моңғол мер­гені  Эрденесувд Эр­де­ненің қанжығасын майла­ды, ал үшінші орын­ға оңтүстік­кореялық Ли Сунг Хо ие болды.