Алқалы жиынға ҚХА Төрағасының орынбасары – хатшылық меңгерушісі Жансейіт Түймебаев, ҚХА Төрағасының орынбасары Юсуп Келигов, Шерзод Пулатов және Парламент Мәжілісі Төрағасының орынбасары Владимир Божко, сондай-ақ Парламент Мәжілісінің депутаттары мен ҚХА Кеңесінің мүшелері, қоғам қайраткерлері, зиялы қауым өкілдері қатысты.
Басқосуда алдымен Жансейіт Түймебаев сөз бастап, Қасым-Жомарт Тоқаевтың Қазақстан Республикасының Президенті болып сайлануы еліміздің жаңа тарихи кезеңінің бастауы болғанын айтып, ұлықтау рәсімінде Мемлекет басшысы белгілеп берген даму бағыттары Ассамблеяның да назарында болуы керектігін мәлімдеді.
– Мемлекет басшысы Қасым-Жомарт Тоқаев ұлықтау рәсіміндегі сөзінде жаһандық мақсаттарын ғана емес, сондай-ақ оларға қол жеткізудің негізгі тәсілдерін де атап көрсетті. Бұл бір формуламен тұжырымдалды: күшті, өкілетті Президент, ықпалды, әрекетке қабілетті Парламент, халыққа есеп беретін Үкімет. Алайда жүргізіліп жатқан экономикалық өзгерістерге сәйкес болуы үшін саяси трансформация процесі белгіленген. Және де бұл процесс биліктің халық алдындағы жауапкершілігін арттыру, азаматтық қоғамды дамыту, билік пен қоғамның диалогы, сондай-ақ пікірлер плюрализмі векторы бойынша құрылады. Ал Мемлекет басшысы атап көрсеткен10 міндеттің қатарында көптеген маңызды мәселе бар, – деді Ж.Түймебаев.
Келелі кеңеске қатысушылар Ұлттық қоғамдық сенім кеңесінде ел арасында жиі талқыланатын қандай мәселелер күн тәртібіне қойылуы керектігі туралы пікірлерін ортаға салды. ҚХА Төрағасының орынбасары Ю.Келигов бұл жиынның сыртында айтылмаған әлі қаншама мәселе барын, ең болмаса осында сөз етілген критерийлер бойынша Ассамблеяның жұмысын жандандыру қажеттігін атап көрсетті.
Ал «Жаңғыру жолы» жастар қозғалысының төрағасы Максим Споткай Ұлттық қоғамдық сенім кеңесі жастар мәселесіне де көңіл бөлетініне сенім білдірді.
– Сайлау арқылы Қазақстан халқы, әсіресе жастар қазіргі таңда бүкіл әлем құрметтейтін тәуелсіз еліміздің құрылуындағы Тұңғыш Президентіміздің аса көрнекті рөлін мойындап отыр. Бұл сайлаудың нәтижесін Елбасына көрсетілген зор құрметпен, оның саясатына деген сенім деп қабылдауға толық негіз бар. Қасым-Жомарт Тоқаев қоғамдағы түрлі пікірлерді және мемлекеттегі түйінді мәселелерді зерделеу үшін Ұлттық қоғамдық сенім кеңесін құруды ұсынды. Бұл ішкі саяси ахуалдың жақсаруына, қоғамның демократиялануына және сабақтастықты, әділеттілік пен өрлеуді іске асыруға септігін тигізеді, – деді М.Споткай.
Жиын соңында жиналған қауым Президент алға қойған мақсаттарына сай жұмыс істегенде ғана Ассамблеяның ісі одан әрі ширай түсетінін айтып, ойларын қорытындылады.
Динара ӨМІРТАЕВА,
ЕҰУ-дың журналистика факультетінің студенті
