Жалпы, өзіне ұнаған сөздер мен тұрақты сөз тіркестерін, мақал-мәтелдер мен өлең жолдарын арнайы қойын дәптер арнап ерінбей жазып жүру – көбіне ыждағатшыл, шығармашыл адамдарға тән дәстүр. Мұның өзі олардың ой теңізін кешіп, одан інжу-маржан сүзіп, үнемі ізденіс үстінде жүретінін айғақтайды. Елдің мұңы мен мұратын, тілі мен тілегін, үрейі мен үмітін, аңсары мен арманын 93 жыл бойы үздіксіз жүрегінде тербетіп, былтыр ғана дүниеден өткен қазақ сөз өнерінің алыбы, академик Шора Шамғалиұлы Сарыбаев өзінің ұзақ ғұмырында артына осындай бірнеше қойын дәптер қалдырған нағыз парасат иесі болатын. Бүгін оқырманға жол тартқан бұл жинақ солардың ішінен іріктеліп, сұрыпталып алынып, топтастырылып, алғаш рет көпшілікке ұсынылып отыр.
Кітаптың алғысөзін жазған Майра Шорақызы былай дейді: «Поэзия – әкеміздің өмір бойғы ең сүйіп оқитын жанры еді және оның ұзақ ғұмырының бөлінбес бір бөлшегіне айналды. Ол осы бір әдеби жанрды жанымен сүйді және оның шабытты оқырманы, жанкүйер тыңдаушысы және нағыз зерттеушісі бола білді. Оның жеке кітапханасында жүздеген өлең топтамалары, газеттен және журналдан қиып алынған поэзиялық туындылар көптеп сақталған. Оны ғылыми және педагогикалық жұмысына деректі материал ретінде өзінің филологиялық шеберлігін арттырудың импульсі және поэтикалық шығармашылығын насихаттаудың бірден-бір құралы ретінде пайдаланды. Поэзияның ұлттық құндылық ретіндегі рөлін жанымен ұғынып, сол арқылы өмірдің ақиқи мәнін түсінуге ұмтылды».
Сондай-ақ кітапшада Шора Шамғалиұлының өз қолымен қағазға түсірген қолжазбалары архивтік құжат ретінде қосымша берілген. Бұл құжаттардың тіл білімі мен ғылымы саласында жан-жақты жемісті қызметі мен ғұмырбаяны туралы зерттеу жүргізгісі келетін жас ізденушілерге негізгі құжат көзі болып табылады деп ойлаймыз.
