Мәселен, қызылжарлық Ерік Әзеновтің Солтүстік Қазақстан облысы әкімдігімен алысып келе жатқанына биыл үш жылдан асты. Қос тарап 2016 жылы жер қойнауын пайдалану жөнінде арнайы келісімшартқа отырған. Сол бойынша кен орнында 6 млн АҚШ долларына ас тұзын өндіретін зауыт ашып, 100 адамды жұмыспен қамту көзделген еді. Алайда теріскейдегі әкім-қаралар тиісті жер телімін бермей, шаруаны жүргізуге кедергі келтіруде дейді кәсіпкер.
– Бұл мәселеге қатысты Солтүстік Қазақстан облысы сотының шешімі бар. Онда әкімдіктің заңға қайшы әрекеттері көрсетілген. Облыстық сот жіберілген олқылықтарды толық көлемде түзетуге қаулы шығарды. Үш сотта да жеңіп шықтым, алайда әкімдік тиісті міндеттерін орындауға асығар емес. Мемлекетпен келісімшарт жасастық, бірақ атқарушы органдар жауапсыздық танытып отыр, – дейді Е.Әзенов.
Парламент Мәжілісінің депутаты Кеңес Абсатиров мұндай фактілерден кейін кейбір мемлекеттік органдарға деген сенімсіздік пайда болуы ықтимал екендігін жасырмады.
– Мемлекеттік органдардың «Бизнестің жол картасы-2020» бағдарламасы бойынша орындамаған міндеттемелерін мысалға алуға болады. 2015 жылы бизнес нысандарына инфрақұрылым тарту бойынша жақсы бастама қолға алынды. Бұл іс тоқтап қалған соң келісімшарт жасасқан тұлғалар құралақан қалды. Осы ретте жобалық-сметалық құжаттаманы дайындауға жеке және қарызға алынған ақша жұмсалғанын айта кету керек. Кезінде «Семей Инжиниринг» АҚ мен Қорғаныс министрлігі арасында осыған ұқсас жағдай тіркелген еді. Зауыт министрліктің тапсырысын толық көлемде орындап шықты. Әйтсе де жауапты ведомство атқарылған іске қаражатты аудармай әлек қылды. Салдарынан ақшаны сот арқылы алуға тура келді, – деп нақты деректерді келтірді халық қалаулысы.
Отырыс кезінде спикерлер Есеп комитетінің деректерін де баян етті. Мәселен, өткен жылы 9 млрд теңге көлеміндегі бір мың атқару құжаты орындалмаған. Жоғарғы соттың Азаматтық істер жөніндегі сот алқасының төрағасы Мейрамбек Таймерденов бүгінде мемлекеттік қызметкерлерді заңды бұзғаны үшін жауапкершілікке тарту күн тәртібіндегі мәселелердің қатарында екендігін айтады. Әзірге келісімшартты бұзған тарапқа айыппұл салу немесе мүлікке шектеу қою заң жүзінде қарастырылмаған.
Кеңестің нәтижесінде Әділет министрлігі, Жоғарғы сот және Бас прокуратура жүктелген міндетті бұзған жауапты тұлғаларды қылмыстық, әкімшілік, сондай-ақ тәртіптік жауапкершілікке тарту жөнінде ұсынысты қарастыруға уәде етті.
Жақсылық МҰРАТҚАЛИ,
«Egemen Qazaqstan»
