Онкоаурулар күткен нысан ашылады

Аймақтар • 18 Маусым, 2019

Онкоаурулар күткен нысан ашылады

Ақмола облысы қатерлі ісік ауруларына шалдығу жөнінен республика бойынша алғашқы бестікке кіреді. «Nur Otan» партиясы Орталық аппаратының партиялық бақылау қызметі Көкшетау қаласына ресми іс сапары барысында «Құтты мекен» жобасына енген онкологиялық емхананың құрылысымен танысты.

Анар ТӨЛЕУХАНҚЫЗЫ

Орталық партия аппаратының Партиялық бақылау қызметінің өкілдері Дәурен Бижуманов және Нұрлан Баймұрзаев құрылыс барысымен танысып, бөлінген қаражаттың нақты жұмсалуын тексерді. 2020 жылы аяқталып, қатерлі дертті жеңуге көмектеседі деген ғимараттың құрылысы бүгінде қарқынды жүріп жатыр, 4 қабатты ғимараттың ішкі әрлеу жұмыстары басталып кеткен екен.

Жоғарыда көрсетілгендей Ақмола облысында онкоаурулар көрсеткіші жыл сайын арта түсуде. Мәселен 2014 жылы онкологиялық аурулардың электронды регистрінде 8036 адам тіркелсе, биылғы жылдың басында ол 8888 адамға жетіп отыр. Онкодиспансерде қабылдауды 5 маман жүргізетініне қарамастан дәрігердің қабылдауына кіру үшін пациенттерге сағаттап кезек күтуге тура келеді. Бұл емделушілерге де, медицина қызметкерлеріне де үлкен ыңғайсыздық туғызып отыр. «Сондықтан, қатерлі ісік ауруын анықтайтын скринингтік тексерулер жүргізу үшін қосымша емхана қажет Әрі облыстың түкпір-түкпірінен келген науқастар диспансердің тар кабинеттерінде сағаттап кезек күтіге мәжбүр», дейді көкшетаулық мамандар.

Онкологиялық науқастарға көмек беру мақсатында 2018 жылы республикалық бюджеттен 2 млрд.теңге қаржы бөлініп, тәулігіне 150 адамды бір мезетте қабылдауға мүмкіндік беретін емхананың құрылысы басталып қана қоймай, оның қарқынды салынуы көңілдеріне үміт ұялатқан Ақмола облыстық денсаулық басқармасының мамандары 4 қабаттан тұратын диспансер жаңа медициналық құрал-жабдықпен қамтамасыз етіледі деп есеп берді.

Партияның орталық аппараты партиялық бақылау қызметі құрылыс нысанына оң бағасын беріп, бұл өз кезегінде скринингтік тексеру арқылы қатерлі ісіктің алдын алуға мүмкіндік беретіндігін жеткізді. Сонымен қатар медицина құрылғылары мен кадрлармен қамтамасыз ету мәселесі сөз болды.