Сала басшысы экспорттық әлеуетті арттыру басты назарда екендігін атап, осы бағыттағы көрсеткіштерді жіпке тізді. Атап айтқанда, арпа экспорты 2 есеге, рапс майы мен қызанақ 1,4 есеге және соя 2 есеге өскен. 11,7 млн тонна астық экспортталды. Бұл 2017 жылғы деңгейден 33%-ға көп.
Минералды тыңайтқышты қолдану қажеттілігі 18%-ға жетіпті. Былтыр бұл көрсеткіш 10-14%-дан аспайтын. Өткен жылы тыңайтқыштарды субсидиялау процесі толықтай автоматтандырылды, сондай-ақ бөлінетін қаражат көлемі 24%-ға көбейген.
Бұған қоса министр сүтті мал шаруашылығын дамыту үшін 2018 жылы 25 тауарлы-сүт фермасы пайдалануға берілгенін баяндады. 6 мың бастан астам мал бағылатын бұл фермалардың 7-еуі өнеркәсіптік, 18-і отбасылық фермалар. Тек ұйымдастырылған шаруашылықтардың өзінде 1, 5 млн тонна сүт өндірілген. Бұл 2017 жылмен салыстырғанда 7,6%-ға артық дейді Ауыл шаруашылығы министрі. Салыстырмалы түрде алсақ, 2015 жылы ол 900 мың тоннаның мөлшерінде болған.
– Құс шаруашылығында 5,6 млрд дана тауық жұмыртқасы өндіріліп, 2017 жылдағы деңгейден 10%-ға жоғарылады. Алғаш рет 671 млн дана жұмыртқа экспортталды. Ақмола облысында ең үлкен бройлерлік құс фабрикасы іске қосылды. Былтыр мал шаруашылығы өнімдерінің индексі 2,0 трлн теңгеге өсіп, 2017 жылдың көрсеткішінен 3,9%-ға артты. Мемлекеттік бағдарламаның негізгі міндетінің бірі – өткізу нарықтарына жол ашу әрі экспортты дамыту. Бүгінгі күннің өзінде 13 тауар тобы (балық өнімдері, асыл тұқымды жылқы, мұздатылған қой еті, бал, бидай, бидай кебегі, соя бұршақтары, сойыс жылқылары, рапс күнжарасы, сиыр еті, ұн, өсімдік майы, арпа, жүгері) бойынша Қытай нарығы ашық. Иранмен тірідей ұсақ мал, мұздатылған және салқындатылған қой және сиыр етімен қатар тағамдық жұмыртқа жеткізуге арналған келісім бар. Сол секілді Сауд Арабиясы Корольдігімен мал сою және өсіру үшін отандық ірі қара мен ұсақ малды экспорттауға арналған ветеринарлық сертификатқа қол жеткіздік. Нәтижесінде агроөнеркәсіптік кешен өнімдерін Қытайға шығару 30,4%-ға (барлық экспорт – 258,2 млн АҚШ доллары), Парсы шығанағы елдеріне экспорттау (Қатар, Кувейт, БАӘ, САК, Оман, Бахрейн) 4,1 есеге, Иранға – 2,1% (328,9 млн АҚШ доллары), Еуроодаққа саудалау 14,6%-ға (303,6 млн АҚШ доллары) артты. Жалпы, агроөнеркәсіптік кешен өнімдерін сыртқа шығару динамикасы 24,5%-ға ұлғайып, өңделген өнім экспорты 3,5%-ға көбейді, – деді спикер.
Шетелдік нарыққа шығу мақсатында Израиль, Түркия, Кувейт, Оман, Жапония және Оңтүстік Корея сынды мемлекеттерден басқа Еуроодақ елдерімен де келіссөз жүргізу жоспарлануда. Осы орайда Қытай тарапымен 2018 жылы экспортқа бағдарланған қазақстандық ауыл шаруашылығы өнімдеріне қойылатын импорттық талаптарды келісу жөніндегі жол картасына қол қойылды. Былтырғы жылдың жалпы кестесіне сәйкес ауыл шаруашылығы өнімдерінің көлемі 3,5%-ға және тамақ өнімдерінің мөлшері 1,6%-ға жоғарылағанынан хабар етті сала министрі.
Жақсылық МҰРАТҚАЛИ,
«Egemen Qazaqstan»
