Соңғы екі жылда Атырауда өлім-жітім көрсеткіші төмендеді. Ал өмір сүру ұзақтығы – 73,22 жасқа жетіп, бұрынғы деңгейден біраз өсті. Соның ішінде аналар өлімінің 52 пайызға азайғаны халық денсаулығын жақсартуға бағытталған шаралардың нәтижесіз емес екенін көрсетеді. Облыстық денсаулық сақтау басқармасының басшысы Мәншүк Аймұрзиева: «Медициналық мекемелерді қазіргі заманғы технологиямен қамтамасыз ету жұмысы жалғасын табуда. Биыл жергілікті бюджеттен арнайы қаржы қаралып, аудандық ауруханаларға жылжымалы медициналық кешен, наркозды тыныс алу аппараты, цифрлы рентген, фетальды монитор аппараттары секілді басқа да заманауи құрал-жабдықтар сатып алынды. Оңалту және медбикелік күтімді дамыту, фтизиопульмонологиялық санаторий ашу да биылғы жоспарда бар. Төрт ауданда ерекше балаларды оңалтуға арналған бөлімдер ашылады», дейді.
Медициналық мекемелердің жаңа жабдықтармен толығуы қашанда назарда. Бүгінде Атыраудағы емдеу ұйымдарында соңғы үлгідегі құрал-жабдықтардың қатары көп. Күні кеше облыстық перинаталдық орталыққа тағы бір жаңа аппарат алынды. Елбасының бизнестің әлеуметтік жауапкершілігі туралы тапсырмасы аясында «ЭксонМобилҚазақстанИнк» компаниясы өкпеге жасанды желдету жасау құрылғысын сыйға тартты. Облыстық денсаулық сақтау басқармасының бөлім басшысы Гүлнафис Таңбаеваның айтуынша, перинаталдық орталықта орта есеппен айына 160 ота жасалады. Енді ота кезінде өкпені жасанды желдететін құрылғы дайын тұрады, бұл өз кезегінде ана мен бала денсаулығына оң ықпал ететін жайт. Жалпы, мұнайлы аймақта ірі өндірістік кәсіпорындар денсаулық сақтау мекемелеріне жиі демеушілік көрсетеді. Мысалы, жоғарыда аталған бір ғана компания бұған дейін шала туған нәрестелерді күтіп-бағу жабдығын, құрсақтағы сәбидің жағдайын бақылайтын фетальды мониторлар мен 11 жедел жәрдем көлігін сыйға тартқан.
Президент Қасым-Жомарт Тоқаев: «Біз мұғалімдер мен дәрігерлердің мәртебесін көтеретін жаңа заңдар қабылдаймыз. Олардың құқығын қорғап, материалдық жағдайын жақсарту үшін тиісті қолдау көрсетеміз», деді. Мемлекет тарапынан бюджеттік сала қызметкерлеріне көрсетілетін қолдау шараларының аясы кеңейетіні аймақтағы мамандардың да ертеңге деген сенімдеріне, адал жұмыс істеуге деген құлшыныстарының артуына оң ықпалын тигізері анық. Ал жергілікті деңгейде қандай жұмыстар атқарылады? Облыстық денсаулық сақтау басқармасының басшысы Мәншүк Құдайбергенқызы учаскелік медицина қызметкерлерінің еңбек-ақысын 20 пайызға өсіру көзделіп отырғанын айтады. Биыл ауылдардағы медициналық мекемелерді қаржыландыруға 6 949,2 млн теңге бөлінген. Жыл соңына дейін 5 амбулаториялық-емхана ұйымы, 1 аурухана пайдалануға беріледі. 2025 жылға дейін облыста 29 ауылдық амбулаториялық емхана ұйымы мен бір аурухана салу жоспарланған. Мұның бәрі шалғайдағы ауыл тұрғындарын сапалы, қолжетімді медициналық қызметпен қамтамасыз етуге бағытталған шаралар. Денсаулық сақтау ұйымдарында бір дәрігерге жүктелген жұмыс ауқымын азайту қолға алынуда. Талап бойынша бір дәрігерге белгіленген адам саны 1700-ден аспауы тиіс, ал аймақта бұл деңгейге қол жеткізу үшін әлі 88 жалпы тәжірибелі дәрігер қажет. Жасыратыны жоқ, Атырауда дәрігер тапшылығы мәселесі күн тәртібінен түспей келеді. Қазірдің өзінде алыстағы ауылдар 30 медицина маманына мұқтаж. Облыс әкімі Нұрлан Ноғаев жыл басында Индер ауданына барған іссапар барысында: «Медицина саласына тапшы мамандарды алдырайық және олар міндетті түрде баспанамен қамтамасыз етілуі керек. Жергілікті билік медицина қызметкерлеріне барлық жағдайды жасауға дайын» деп атап өткен болатын. Осы проблеманы шешу мақсатында облыстық әкімдік тарапынан нақты шаралар қолға алынды. Биыл еліміздегі медициналық оқу орындарының 214 түлегі Атырауға жұмысқа келеді деп күтілуде. Демек, ауруханалардың ақ халаттылармен толық қамтылатын күні де алыс емес.
АТЫРАУ
