Қоғам • 21 Маусым, 2019

Бас педагог ақ жол тіледі

219 реткөрсетілді

Ұлттық бірыңғай тестілеудің екінші күні өтуде. Оған респуб­лика бойынша 13 мың үміткер қатысып жатыр. Кеше Білім және ғылым министрі Асхат Аймағамбетов Еуразия ұлттық университеті ғимаратындағы тестілеу пунктіне келіп, талапкерлерге сәттілік тіледі.

Еліміз бойынша барлығы 169 тес­ті­леу пункті жұмыс істейді. Елор­дадағы жоғары оқу орнына ат басын бұрған ведомство басшысы: «Биылғы ҰБТ-ны бастайтын бірін­ші лекке сәттілік тілеп келіп отыр­мын. Мен 10 жыл бойы тестілеу өткізу рәсі­міне қатыстым. Байқасақ, балалар жылдан-жылға байсалды болып ке­ле­ді. Биыл тексерістен өткізу бары­сынан бастап бақыладым, сонда олар­дың салмақты, көңілді болды. Бұл – ҰБТ өткізуді жетілдіруге бағыттал­ған 4 реттік тапсыру мүмкіндігінің нәтижесі. Үміткер санасындағы бір емес, бірнеше мүмкіндіктің барына деген сенімділік психологиялық жай-күйін реттеуге ықпал ететіні сөзсіз», деді.

Оның айтуынша, биыл бітірген барлық 134 мың мектеп түлегінің 115 мыңы қаңтар, наурыз айларында өткізілген ҰБТ-да бақ сынады. Олардың алған сертификаты елі­міздегі ЖОО-лардың ақылы оқу бөлі­міне түсуге де мүмкіндік береді.

Еліміздің бас педагогы: «Бұл – үлкен емтихан. Сондықтан қобал­жымай, асықпай, мектепте 11 жыл бойы үйренгендеріңізді ойлап, еш­қандай тыйым салынған заттарды пай­даланбай, шын білімді көрсетіп, абыроймен алып шығады деп сенемін. Биік шыңдарды бағындырып, еліміз­дің дамуына үлес қосатын азамат болу­лары­ңызға тілектеспін!» деді талапкерлерге.

Айта кетейік, маусымдағы ҰБТ-да шекті балл жинай алмағандар тамыз айын­дағы тестілеуге қатыса алады, бі­рақ бұл мүмкіндік сертификатты жөн­деп алуға ғана берілген. Ондағы нәти­жемен, мейлі ол маусымдағы қо­ры­тын­дыдан екі-үш есе жоғары болсын, тек ақылы негіздегі оқуға түсе алады.

А.Аймағамбетов биыл мемлекет бакалавриатқа 53 758, магистратураға 13 000, докторантураға 2312 грант бөлінгенін айтты. Біз газетіміздің өткен санында бакалавриатқа 51 мыңнан аса грант бөлінгенін жазғанбыз. Оған медицина мамандықтарын­дағы орын санының әлі қосылмаға­нын естеріңізге саламыз. Болашақ дәрі­герлерге мемлекеттік білім беру грант­­­тарын кейінірек Денсаулық сақ­тау министрлігі белгілейді.

«Баласы атқа қонса, анасы тақы­мын қысады», деген сөз бар қазақта. Бүгінгі қоғам арасында, әсіресе ата-аналар үшін ҰБТ білім бәйгесі сынды. Дина Бердібекқызының баласы астанамыздағы №54 мектепті бітірген. ҰБТ-дан баласының жақсы нәтижеге қол жеткізуін күтетінін айтқан ана: «Баламның білімге деген құштарлығы жоғары. Кішкентай кезінен білім сайыстарына қатысып, мақтау қағаздарымен марапатталып келеді. Баламнан үлкен үміт күтемін, тестілеуден жақсы нәтиже көрсетуін қалаймын. Бастысы, егемен Қазақстанымыздың дамуына үлесін қосатын азамат болса екен деймін. Балам ҰБТ-ға ерекше ден қойып дайындалды. Ол ағылшын, қытай тілдерінен қо­сым­ша курстарға да қатысты», дей­ді. Оның айтуынша, баласы актер маман­дығын, яғни өнер саласын таңдап отыр. Мектеп қабырғасында жүргенде түрлі рөлдерді сомдаған көрінеді. Ата-ана баласының басқа салаға бет бұрғанын қалағанымен, перзентінің қалаған мамандығын өзі таңдауына ерік беріпті. Өйткені әркім ертеңгі өміріне өзі жауапты болуы керек.

Ал болашақта заңгер болуды қалайтын Оралбай Жанат 11-сыныпқа көшкелі бері ҰБТ-ға тұрақты түрде дайындалғанын айтады. Барлық білім қорын жинақтап, тестілеуге келіпті. Сондықтан ең жоғары 140 балл алудан үмітті. «Өзіме сеніп келдім. 11 жыл жинаған білімімнің нәтижесін бүгін білемін. Келешекте құқық қорғау саласында қызмет еткім келеді. Бар­лық үміткерлерге сәттілік тілеймін!», дейді Оралбай.

Соңғы жаңалықтар

Шымкент: Цифрлы отбасының бір күні

Оңтүстік Қазақстан • Кеше

Ұқсас жаңалықтар