Әлемді ақпарат билеуі бүгінгі заманның сипатына айналды. Мемлекеттің жан-жақты дамуына, елдің бірлігіне бұқаралық ақпарат құралдарының қосар үлесі қомақты. Облыс өңірінде 117 электрондық және мерзімді баспасөз құралы жұмыс істейді. Солардың арасында 35-і қоғамдық-саяси сипатқа ие. «Қазақтелеком», «Қазтелерадио» АҚ облыстық филиалдары халыққа теле және пошта байланысын, телерадиохабарын тарату қызметін көрсетеді. Облыста мерзімді баспасөзді басып шығаратын ірі 4 баспахана бар. Облыстық департаменттер мен басқармалар басшылары жанындағы 16 ресми баспасөз қызметі және 23 жауапты қызметкер мемлекеттік органдар мен БАҚ-тың өзара тығыз байланысын нығайта түседі. Өңірдегі 57 ресми сайт жергілікті атқарушы мемлекеттік билік органдары қызметінің ашықтығын қамтамасыз ету үшін олар мен халық арасындағы интерактивті байланыс құралы міндетін атқарады.
Өркениеттің, интернет технологияларының жылдам дамуы мемлекеттік органдар мен халық арасындағы ақпараттардың ашықтығын қамтамасыз етуді талап етумен қатар, демократиялық қоғамдағы заманауи ақпарат кеңістігін кеңейте түсті. Сондықтан Президент Қасым-Жомарт Тоқаев тұрғындардың әлеуметтік тынысын сезіп, сұранымын дер уақытында біліп отыру үшін әлеуметтік желіде облыс әкімдерінің парақшаларын ашуды, мессенджерлерде топтарын құруды тапсырған болатын.
– Облыстағы аудандар мен қалалар әкімдері, тіпті басқармалар басшыларына дейін Фейсбук, Инстаграм, В контакте, Одноклассники, Твиттер әлеуметтік желілерінің барлығында 144 ресми аккаунт ашты. Инстаграм желісінде менің парақшам бар, онда қостанайлықтармен ашық сұхбаттар жүргіземін. Маусым айында 152 азаматтың сұрағына жауап бердім. Алдағы уақытта мемлекеттік органдар мен қоғамның мұндай форматтағы қарекеті кеңейе беретініне сенімім мол, – деді облыс әкімі Архимед Мұхамбетов.
Облыс өңіріндегі бұқаралық ақпарат құралдары уақыт ағымына ілесіп, цифрлы технологияны енгізіп келеді. Газеттер мен телеарналардың әлеуметтік желілерде парақшалары, мессенджерлерде топтары бар. Мысалы, «Алау» телеарнасының әлеуметтік желілерде 200 мың, «Костанайские новости» газетінің 112 мың, «Наша газетаның» 76 мың пайдаланушысы бар.
Шілде айынан бастап облыс цифрлы эфир таратуға көшті. Енді Қостанай қаласының тұрғындары отандық 26 телеарнаны, аудандар мен қалалар 11 телеарнаны еркін көре алады. Уақыт талабынан туындап отырған осындай игілікті жұмыстар бұқаралық ақпарат құралдарының экономиканы, әлеуметтік саланы дамыту үшін жүзеге асырылып жатқан мемлекеттік бағдарламалар, маңызды реформалар барысы және елдегі орын алған қоғамдық-саяси оқиғалар туралы әлеуметті сапалы ақпаратпен қамтамасыз етуіне жағдай жасайды. Өңір басшысы бұл орайда журналистер қауымына, газет-телеарналар редакцияларына да артылар жауапкершіліктің мол екендігін еске салды. БАҚ уақыт тынысын тап басқанда ғана халықтың сұранысын өтейді. «Алау» телеарнасы латын графикасын үйрететін видеосабақтар жүргізе бастады. «Сана серпіні», «Ұлы дала тұлғалары», «Ұлы дала мұрасы» хабарлары және «Туған өлкеге шағын сапар» атты жоба көрермен көзайымына айналды. Өңірдегі Қостанай аудандық «Арна», Қарабалық аудандық «Айна», Жангелдин аудандық «Біздің Торғай», Амангелді аудандық «Амангелді арайы» газеттері оқырмандарына жол табу үшін жұмысты жаңаша ұйымдастырады, түрлі тәсілдерді пайдаланып, ізденістерге барады. Жергілікті атқарушы билік пен жұртшылықтың арасына алтын көпір болып отыр.
Форумда мемлекеттік органдардың қоғаммен кері байланыс орнатуда әлеуметтік желілердің, интернеттік технологиялардың тиімділігі, бұқаралық ақпарат құралдарының бәсекеге қабілеттілігі, қазіргі журналистиканың трендтері туралы сөз болды. Бұл жөнінде медиафорумға арнайы шақырылған Қазақстан Республикасының Тұңғыш Президенті Қорының баспасөз хатшысы, журналист Оксана Лоскутова, «Blackand White Goup» медиа агенттігінің директоры Ринат Балғабаев айтып берді. Жергілікті «Алау» телеарнасының директоры Алмат Сүлейменов көпшіліктің назары интернет ресурстарға ауғанын жеткізді. Оның зерттеуінше, бір айдың ішінде еліміздегі рейтингі бар 176 сайттың жаңалықтар бөлімі арасында қостанайлық сайттар 17,19 және 22-орын алған. Қостанайлық сайттар республикалық Тенгриньюс, Закон.кз, Информбюро және басқалары секілді «алпауыттарға» ғана жол берген.
Ал мерзімді баспасөз құралдарының «бас ауруы» аз емес, олардың болашағы билікті де, журналистерді де, газет басшылығын да ойлантқандай. «Костанайские новости» газетінің редакторы Олег Гурский ақпарат кеңістігінде газеттер өзінің сайты мен әлеуметтік желілерге орын бергендей, жылдан-жылға тиражы азайып келетінін, әр оқырман үшін күресетінін, форматын өзгертіп, барынша уақытқа икемделгісі келгенмен, жеделдіктің жеткізбесіне мойынсұнғандай, көбіне талдау, болжау, сараптау материалдарын ыңғайлайтыны туралы айтты. Газет тігіндісін қай уақытта болсын кітапханаға барып, парақтау мерзімді баспасөздің электронды бұқаралық ақпарат құралдарынан артықшылығы болып қалды. Ақпарат кеңістігіндегі мүмкіндіктер туралы әріптестердің пікірлері саналуан болғанымен де интернеттік технология өркениет жемісі. Бұл жөнінде Журналистер одағы облыстық филиалының төрағасы, журналистика ардагері Сергей Харченконың пікіріне жүгінуге тура келеді.
– Ең бастысы, билік бұқаралық ақпарат құралдарын мойындайды, өз жұмысында онымен санасып отырады. Ал біздің жұмысымыздың басты бағыттарының бірі бұқаралық ақпарат құралдарын бүгінгі әлеуметтік желілеріне, басқа да интернет резервтеріне қарсы қоймау, қайта ортақ мақсатта бірін-бірі қолдау, бірге әрекет ету болмақ. Ортақ мақсат – елдің, экономиканың дамуы, әлеуметтік саланың гүлденуі, өмірдің тыныштығы екені белгілі, – деді Сергей Васильевич.
Биылғы мерекенің ерекшелігі бар – кәсіби мерекені Президент белгілеп берді. Форум соңында мерекеге орай ақпарат саласындағы еңбек торылары марапатталды.
ҚОСТАНАЙ
