Өткен жұмада бас қаладағы ең үлкен сахналардың бірі – Орталық «Қазақстан» концерт залында жас талант, ресейлік «Голос. Дети» жобасының жеңімпазы Ержан Максим өзінің алғашқы шығармашылық кешін зор табыспен өткізді. Залға ине шаншар орын қалдырмай жиналған халықтың ыстық ықыласынан-ақ концерттің көпшілік көңілінен шыққанын байқауға болады.
Бұл кешке Ержан уақыт аз болса да, барынша тыңғылықты дайындалыпты. Симфониялық оркестрдің және белгілі композиторлар – Ұлықпан Жолдасов пен Ринат Гайсиннің сүйемелдеуінде орындалған Ержанның жекелей және Сәкен Майғазиев, Айқын Төлепберген, Мөлдір Әуелбекова бастаған эстрада әншілерімен дуэт болып қосыла шырқаған әндері маусымның мамыражай кешін шын мәнінде өнердің үлкен думанына айналдырып жібергендей. Астана аспаны жас таланттың әнімен бірге тербеле толқып, бұлттар билеп кеткендей әсер сыйлағанын өнерді түсініп, ән әсемдігі мен орындау шеберлігін бағалай білетін кез келген тыңдарман жоққа шығармайды деп ойлаймыз.
Отандық белгілі дизайнер Қайролла Әбішевтің осы кеш үшін арнайы тіккен ұлттық нақыштағы алтын түстес авторлық киімімен кеш шымылдығын түрген дүлдүл дарын екі сағатқа созылған концертті үлкен шоуға айналдырды. Кеште Ержан ресейлік «Голос. Дети» жобасында шырқаған әндерінен бөлек, Арыстанбек Мұхамедиұлының «Жайна, елорда», Ринат Гайсиннің «Туған өлкем» туындыларын кемеліне келтіре орындады. Сондай-ақ әншінің репертуарындағы орыс, ағылшын, итальян тілдерінде шырқалған әндер де концертке жиналған тыңдарман көңілінен шығып, кеш соңында Ержанға толассыз қошемет көрсетілді. Бүгінде атағы елден асып, танымалдылығы төрткүл дүниеге тарап үлгерген дарынның қайталанбас қуатты үні оның талант қарымын халық алдында тағы бір мәрте әйгілегендей. Шымылдық жабылған соң да залдан ұзақ уақыт үзілмей естіліп тұрған көпшіліктің ыстық қошеметі мен шапалақ үні тек Ержанға емес, күллі қазақ өнеріне көрсетілген құрмет пен ықылас еді...
