Аралдағы елге де араласы бар
Бейсенбі, 16 мамыр 2013 1:39
Ерлі-зайыпты Храпуновтардың Кипр банктерінен қаржысы табылды
Бірқатар шетелдік БАҚ-тардың мәлімдеулерінше, Алматы қаласының бұрынғы әкімі Виктор Храпунов пен оның зайыбы Лейла Храпунованың Кипр банктерінде сақтаулы тұрған ақшаларының деректері табылған. Бұл қаржыларды олардың «әлдеқандай күн туа қалған жағдай үшін» апарып жасырып қойғандарын «Номад» жазды.
Бейсенбі, 16 мамыр 2013 1:39
Ерлі-зайыпты Храпуновтардың Кипр банктерінен қаржысы табылды
Бірқатар шетелдік БАҚ-тардың мәлімдеулерінше, Алматы қаласының бұрынғы әкімі Виктор Храпунов пен оның зайыбы Лейла Храпунованың Кипр банктерінде сақтаулы тұрған ақшаларының деректері табылған. Бұл қаржыларды олардың «әлдеқандай күн туа қалған жағдай үшін» апарып жасырып қойғандарын «Номад» жазды.
Ерлі-зайыпты шонжарлар бұл депозитті Виктор Храпунов Алматы қаласының әкімі болып тұрған кездің өзінде-ақ ашып қойған екен. Соған қарағанда, бұлар мұғаджырлыққа кетуді күні бұрын жоспарлап алған сияқты. Сол мақсаттары үшін аралдағы мемлекетті де бекер таңдамағандары көрініп тұр. Әлемге офшорлық аймақ ретінде танылған елдің ақша қоймаларына қазына жасыру арқылы олар өз іздерін білдірмей кетеміз деген болса керек. Алайда, аяқ астынан пайда бола қалған «табыскер» бизнесвумен, яғни әйел-бизнесмен келешек Кипрде қаржы дағдарысының орын алатынын және оның ешкімді де аямайтынын, осы арқылы қырық қабат торқаның астында тығылып жатқан ұры-қары байлардың таза судың бетіне қалқып шығатынын, сосын қолдарынан сусып кетіп бара жатқан ақшаларын сақтап қалу үшін адвокаттардың қалың армиясын жалдауларына тура келетіндерін алдын ала пайымдай алмаса керек.
Басылым сонымен қатар, Храпуновтардың Швейцариядағы негізгі активтері – өздерінің ұлдары Ильяс Храпунов негізін қалаған Swiss Development Group (SDG) компаниясын сатқандарын еске түсіріп өтеді. Ол Швейцарияның беделі биік аудандары мен шетелдерде элиталы жылжымайтын мүліктер құруға мамандандырылған компания біраз қаржы да тапты.
Осыған орай, басылым Ильястың жеке өзінің тірліктері туралы да шолу жасай кетеді. «Осы бір 28 жасар жас жігіттің Швейцариядағы жүріс-тұрысы туралы қазір мұнда шын мәнінде шындыққа бергісіз аңыз тарап жүр», деп жазады ол. Ал Ильяс Храпунов өзінің қарындасы Эльвирамен бірге Швейцарияда 14 жасынан бері тұрып келе жатыр. Ол Женевадағы элиталы үйде тұрды, сонда жиі шулы кештер ұйымдастыратынымен аты шықты. Басылымның жазуынша, Ильяс сол сияқты көптеген жол-көлік оқиғаларын жасауы арқылы жергілікті полицияға да әбден танымал болып үлгерген көрінеді. Алайда, ол полицияға жол ережесін бұзған өз анасы басқаратын компанияның қызметкерлері екенін айтып, ұдайы солардың аттарын атап тұрған. Сондықтан ірі көлемдегі айыппұл қағаздары ешқашан Швейцарияға барып көрмеген қазақстандық азаматтардың аттарына біздің елімізге жөнелтіліп келген. Осыдан-ақ, оның балақай күнінде қалай қалыптасқанын анық байқауға болады.
2008 жылы Ильяс Храпунов қазақстандық паспортын швейцариялық құжатқа айырбастауға әрекет жасап көреді. Алайда, бұған келісім ала алмайды. Сол кезде оның жол тәртібін бұзғандары айғақталып шыға келеді. Осының негізінде Храпуновқа айтарлықтай ірі мөлшердегі айыппұл сомасын өзінің төлеуіне тура келді. Бұл жолы ол тиесілі төлемін ешбір қиналмастан бірден төлейді. Себебі, келешекте Швейцария азаматтығын ала алмай қалу қаупінен қорыққан. Ол сондай-ақ, өзінің ірі активтердің иесі екенін, сол арқылы Швейцария экономикасына инвестиция әкеліп жүргенін де айтып салады.
Осы жерде айта кетейік, Виктор және Лейла Храпуновтар қазіргі күндері 20 қылмыстық іс бойынша тергеліп жатыр. Тергеу мәліметтеріне қарағанда, бұл отбасы 2003 жылдан 2007 жылға дейін Швейцария мен оффшорлық аймақтардағы шетелдік банктерге 48 млн. доллар мен 7,7 млн. еуро аударған. 2012 жылғы қазан айында Лейла Храпуноваға ірі көлемде алаяқтық жасағаны үшін іздеу жарияланды. Ал желтоқсан айында ол Женева прокуратурасымен жұмыс жасасуға дайын екенін мәлімдеді. Содан бастап Храпуновтар отбасы мүшелерінің ақша айналдыру жөніндегі әрекеттерін тексеру басталып кетті.
Руслан ИГІЛІК.
