Сол үйден пәтерлі болған жас мамандар Ләззат Өскен мен Ерболат Дүйсенбаев ауданға келгенде алдынан жаңа баспана дайын тұрады деп ойламапты.
– Біз Ө.Сұлтанғазин атындағы Қостанай мемлекеттік педагогикалық университетіне «Серпін» бағдарламасы бойынша Шымкент қаласынан келіп түскен едік. Төрт жыл оқып, математика пәнінің мұғалімі мамандығын алдық. Енді өз қалауымызбен Амангелді ауданына келдік. Алдымыздан жап-жаңа баспана дайын тұр екен, қатты қуандық. Бір бөлме болғанмен іші кең, ыстық су, суық суы ағып тұр, орталықтан жылытылады, қыста от жақпаймыз, – дейді Ләззат Өскен. Айтпақшы, Ләззат пен Ерболат бұл баспанаға тамыз айында жас отбасы болып оралады, оған дейін Шымкентке ата-аналарына барып, үйлену тойын өткізіп келеді екен. Жас мамандар үшін жастықтың қуанышы осылай жалғасын таппақ.
Жасыратыны жоқ, бүгінде облыс орталығынан шалғай жатқан Амангелді ауданында мамандар тапшылығы қатты білінеді. Аудан бойынша 8 пәннен 23 мұғалім жетіспейді. Ал жалпы, дәрігер, ветеринар секілді басқа мамандықтарды қосқанда ауданға әлі 40-тан аса маман керек. Бір бюджеттің желкесіне міне бермей, жұмыла кіріспесе жоқ табыла ма? Жас мамандарға арналған 8 пәтерлі үйді аудан кәсіпкерлері жұмылып, небәрі 2 айдың ішінде салып берді.
Жастар жылына орайластырылып салынған жас мамандарға арналған үй мен Жастар саябағына 47 миллион теңге демеушілер қаражаты тартылды, сонымен қатар 15 миллион теңге бюджет қаражаты жұмсалды. Ауданда «Рухани жаңғыру» бағдарламасының «Туған жер» арнайы жобасы аясында игі жұмыстар қолға алынған. «Мектепке тағзым» акциясымен мектеп түлектерінің ауыл мектептеріне қолғабысы ұйымдастырылды. Амангелді орта мектебінің түлегі Әбілхан Боранбаев 2,5 миллион теңгеге ІТ кабинет алып берсе, Ы.Алтынсарин атындағы орта мектептің түлектері 1 млн теңгеге география алаңының жабдығын әкеліп берді. Ауданда мұндай мысалдар жеткілікті. Ақсай ауылындағы Бүйректал орта мектебінің түлегі Александр Павловский мектепке 900 мың теңгеге көмек көрсетті. Амантоғай орта мектебінің түлектері және жеке кәсіп иелері Өмірзақ, Дүйсен Ілиясовтар, Дархан Шакыманов сынды азаматтар мектептің жөндеу жұмыстарына 6 миллионнан астам теңге қаржылай көмек көрсетті. Үрпек ауылындағы Жаңауыл орта мектебінің әр жылдардағы түлектері білім ұясы мен ауылды абаттандыру мақсатында «Үлесім саған, Үрпегім!» атты қор ашып, 12 миллион теңгеге жуық қаражат жинады. Осылайша ауданның мектеп түлектері биыл өз ауылы мен мектебіне 45 миллион теңгенің демеушілік көмегін көрсеткен.
Аудан орталығындағы бұрын шаңы шығып бос жатқан жерде Жастар саябағы орнады. Жобаның құны 30 миллион теңгені құрады.
– Бұл аудан үшін аз қаржы емес, саябақтың салынуы аудандағы кәсіпкерлердің арқасы. Енді жас кәсіпкерлер осы саябақ ішінен өз бизнесін ашқалы отыр. Мұнда пицца, донер, кәуап орталықтары, сусындар және қымыз сататын орындар және балаларға арналған ойын алаңдары жұмыс істейтін болады. Саябақ аудан
тұрғындарының мәдени-демалыс орны болумен қатар, он шақты адамды жұмыспен қамтиды. Жастардың спортпен, денешынықтырумен айналысуына да мүмкіндік жасалған.
Қазақстанның Тұңғыш Президенті Нұрсұлтан Назарбаевтың «Қазақстан халқының кем дегенде 30 пайызы спортпен шұғылдануы керек» деген тапсырмасы ауданда көп жұмысқа мұрындық болды. Әсіресе спортқа балалар мен жастардың қамтылуы айрықша назарда. Аудан орталығындағы Б.Қолдасбаев атындағы мектепте заманауи шағын футбол алаңының ашылуы соның жарқын мысалы, – дейді аудан әкімі Әмірхан Асанов. Оны Б.Қолдасбаев атындағы қазақ орта мектебінің түлегі, кәсіпкер Серік Қапапин өзінің 12 миллион теңге қаржысына салып берді.
Амангелді ауданындағы осындай әлеуметтік нысандардың көбеюі ауыл шаруашылығының да, ауылдың да нығайып еңсе көтеріп келе жатқанына дәлел. Соңғы жылдары мал өсіру үшін жастардың ауылға келе бастағанына да жақсы мысалдар бар. Жас мамандар да жыл құсындай ауылға қайтса, туған жерді гүлдендіретін де солар болады.
Қостанай облысы,
Амангелді ауданы
