Аргентина мен Бразилия арасындағы жартылай финалдық ойыннан кейін футбол сүйер қауым екіге жарылды. Бірі «альбиселестені» жеңіске жетелей алмаған Лионель Мессиді айыптаса, келесісі төреші әділ болмағанын айтады.
Екі тарапты да түсінуге болады. Енді ше, «жатжерлік», әлемнің ең үздік футболшысы саналатын Месси ұлттық құрама сапында әлі бірде-бір рет чемпион атанған жоқ. Оның үстіне, «не бел, не белбеу кетер» сәтте шабуылшының ойыны жүрмей-ақ қойды. Сенбейсіз бе? Футбол жылнамасына үңіліп көріңіз.
Лео Месси ұлттық құрама сапында алғаш рет дүбірлі доданың дәмін 2006 жылы татыпты. Германияда өткен әлем чемпионатында «альбиселестенің» алтын алсам деген арманына ширек финалда немістер тұсау салды. 2010 жылы Оңтүстік Африкада өткен байрақты бәсекеде Аргентинаны тағы да «бундестим» тоқтатты. Құрамында «Алтын доптың» иегері бар «альбиселесте» ширек финалда 0:4 есебімен оңбай ұтылған-ды. 2014 жылғы бәсекеде Месси бастаған команда финалға дейін жеткен-тұғын. Бұл жолы да Аргентина Германиядан айласын асыра алған жоқ. Ал былтыр Ресейде өткен турнир әлі есімізде. 1/8 финалда Франция құрамасы «альбиселестеден» бір бәс жоғары екенін дәлелдеді.
Бұдан бөлек, Латын Америкасының кубогында да Аргентинаның жолы болар емес. Месси ұлттық құрамаға келгелі бері «альбиселесте» 5 мәрте «Копа Америкаға» қатысып, 3 мәрте күміс, бір қола медаль жеңіп алды. 2011 жылы ғана ширек финалда Уругвайға пенальтиден есе жіберген-тұғын.
Жалпы, Аргентина сапында жүріп Месси кубок алмады деу ағаттық болар. Ол 2005 жылы жастар арасында әлем чемпионы атанды. 2008 жылы Олимпиада ойындарында топ жарды. Әйтсе де, бұл екі турнирдің әлем чемпионаты мен «Копа Америкамен» иық теңестіре алмайтыны айтпаса да түсінікті. Бұл екі бәсекеде бас жүлде иеленбеген футболшының бәсі бір мысқал кем түсіп тұратыны бар.
Бір жағынан Аргентинаның нәтижелері соншалықты жаман емес. Соңғы өткен 10 турнирдің алтауында «альбиселесте» жүлделі орыннан көрінді. Кез келген құрама мұндай жетістікпен мақтануы тиіс. Кейбір командалар балықшылар мен құрылысшыларды жеңіп жүргенде, бұл үлкен жетістік емес пе?!
Бірақ Месси, Агуэро, Ди Мария секілді таланттары бар құраманың деңгейін алтынмен есептейді емес пе? Ендеше ала допты ұршықша иіретін таланттары бар команданың жолы болмауының сыры неде? Бар кінәні командасын жеңіске жетелей алмаған Мессиге артып қоюға болатын шығар. Бірақ мәселеге тереңірек үңілгенде, біраз жайдың беті ашылады.
Негізі, Аргентина құрамасының сәтсіздіктеріне басты кінәлі футболшылар емес, елдегі футбол федерациясының тізгінін ұстаған азаматтар. Бұған дейін батыстың бұқаралық ақпарат құралдарында федерациядағы былық, жемқорлық туралы талай жазылған-тұғын. Аргентина футболының тізгінін 35 жыл ұстаған Хулио Грондонаның пара алғаны жөніндегі ақпараттар шыққан-ды.
Грондона 2014 жылы қайтыс болды. Алайда федерациядағы жемқорлықтың салдары бүгінге дейін жалғасып келеді. Қазіргі таңда АФА әлемдегі ең кедей футбол федерациясының бірі саналады. Мәселен, Diario Uno газеті федерация күзет қызметіне беретін қаржы таппай, олардың жалақысын Лионель Месси төлеп бергенін жазған еді.
Бұдан бөлек, бапкерге төлейтін ақшаның жоқтығы да жиі сөз болады. Мәселен, тегі аргентиналық Симеоне мен Почеттиноның қай-қайсы да ұлттық құраманы жаттықтыруға лайық. Алайда оларға 15-20 миллион еуро жалақы тауып беруге Аргентина футбол мекемесінің шамасы келмейді.
Федерация, тіпті ұшақтан да үнемдейді. Сондықтан бағасы арзан, қауіпсіздікті сақтай бермейтін әуе компанияларына жүгінеді. Нәтижесінде футболшылар әуежайда сағаттап күтуге мәжбүр. Қайбір жылы Лионель Месси инстаграмдағы парақшасына бұған наразылық танытып, «Тағы да ұшақты күтуге мәжбүрміз. О құдай, Аргентина футбол федерациясы соншалықты байқұс» деп жазғаны есімізде.
Айтпақшы, 2016 жылы ұлттық құраманы Белу-Оризонти қаласынан әкету үшін федерация чартерлік компания іздеп, ең арзанын таңдапты. Футболшылар өз еліне аман-есен қонған-тұғын. Екі апта өткеннен кейін боливиялық La Mia компаниясына тиесілі дәл сол ұшақ апатқа ұшырады. Әуе кемесінің бортында «Шапекоэнсе» клубының ойыншылары болған еді...
