Пайдасыз істен аулақ болу үшін күнделікті өмірін үшке бөледі. Бір бөлігін иесіне арнайды, оның тапсырмасын тиянақты орындайды. Екінші бөлігін Аллаға құлшылық етуге, үшінші бөлігін ілім үйренуге жұмсайды. Көзі тірі сақабалар дәрісіне қатысып, хадис іліміне қанығады. Меккелік әйел құлының ілімге деген ынтасына қызығып, «Сен бұдан былай ілім үйреніп ислам жолында қызмет қыл!» деп, құлдықтан босатып жібереді.
Осы күннен бастап Ата уақытын пайдасыз өткізуден сақтанды. Оның үнемі аузынан тастамай айтатын уағызы «Адамды жақсылыққа бастамайтын істің бәрі бос әурешілік және ауыздан шыққан әрбір сөз жазулы, демек бос сөздер үшін Алла құзырында ұялғаннан жаман нәрсе жоқ» дейді екен.
Тағы бірде аса оқымысты ғалым адам қажылық ету үшін Меккеге келеді. Барлық парыздарын өтеп болып, соңғы үкім шашын алдыруға шаштаразға келеді. Орындыққа отыра бергенде шаштараз:
– Құбылаға қарап отырыңыз? – дейді. Ғалым ұялып қалады да, үндемей құбылаға бұрылады. Содан кейін басының сол жақ бөлігін ыңғайлап ұсынады, шаштараз болса: «Басыңыздың оң жағын ыңғайлаңыз?» дейді. Шаштараз ғалымның шашын алуға кіріседі, ғалым үнсіз отырады. Шаштараз айтады: «Неге үнсіз отырсыз, тәкбір айтып отырыңыз?». Ғалым ұялғаннан тәкбір айта бастайды. Шашын алдырып болып кетпекке ыңғайланады. Шаштараз: «Алдымен екі ракағат намаз оқыңыз да, қалаған жағыңызға кете беріңіз!» дейді. Үлкен ғалым қарапайым шаштараздың мына ісіне қатты таңданады. Мұндай әдептерді білмегеніне өкінеді. Ақыры шаштараздан сұрайды.
– Бауырым, сіз мұндай жақсы әдептерді қайдан үйрендіңіз?
– Ұстазымыз Ата ибн Рабах осылай жасайды.
Заманында тақуалығымен аты шыққан Ата Рабақ байлық иеленуге мүмкіндігі бола тұра, өмірден 5 дерхам тұратын жалғыз көйлек киіп өткен. Патшалар мен ірі байлар бұл адамды өзіне жақын тартып, үнемі шақырған. Бірақ Ата бұларға жоламаған. Өйткені бұлардың ұсынысын қабылдасам, олар маған дүние-мал береді, ол менің дініме зиян дейді екен.
Жоғарыдағы Ата абыз туралы хорасандық ғалым Оспан әл-Хорасанидың естелігінде былай делінеді: «Менің бала кезім еді. Әкем екеуміз Дамаскіге сапарлап келе жатып, жолай есек мінген жұпыны сұрықсыз адамға жолықтық. Мен оның түріне қарап күле бастадым. Әкей «Балам, күлме, бұл күллі Хижазға әйгілі атақты ғұлама Ата Рабақ» деді. Екеуі құшақтасып амандасты. Патша сарайының сыртына келіп, үшеуміз жайғасып отырдық.
Үлкен ғалымның келгені жайлы сарайға хабар жетіп, бізді ордаға алып кірді. Патша ғалымнан «Нендей бұйымтайыңыз бар?» деп сұрады. Ғалым үш өтінішін айтып, соңында: «Уа, патша, сіз мынаны ескергейсіз, қазір сіз қаптаған уәзірлердің алқауында отырсыз, барлығы қолпаштауда, бірақ қияметте бұлардан қайыр болмайды, тек жалғыз өзіңіз жауап бересіз. Осыны ұмытпа!». Бұл сөзді естіген патша еңкілдеп жылапты.
Жақсы ісімен күллі жамағатқа үлгі болған Ата абыз ұзақ өмір сүріп, 100 жасқа жетіп, осы баянды ғұмырында 70 дүркін қажылық жасап, өмірден өткен екен.
