![Тегін дәрі-дәрмек жеткізілді](/media/2019/07/25/ca34f648d137cf466cbb50c89e9be897_xl.jpg)
«СҚ-Фармация» ЖШС басқарма төрағасының міндетін атқарушы Берік Шәріптің айтуынша, медициналық ұйымдардан түскен қате өтінімдерге байланысты жеткізуде іркілісті болдырмау мақсатында биыл Бірыңғай дистрибьютор ТМККК аясында қызмет көрсететін медициналық ұйымдармен жария офертаны жасады.
«Оферта аясында түпкілікті өтінімдерді медициналық ұйымдар қалыптастырады. Бірақ жөнелту бір рет мәлімделген көлемнің негізінде емес, нақты қажеттілік пен тұтыну жылдамдығы негізінде жүзеге асырылады», деп түсіндірді «СҚ-Фармация» басшысы.
Қазіргі таңда Бірыңғай дистрибьютор дәрі-дәрмектерге қосымша қажеттілікке арналған өтінімдерді тұрақты негізде қабылдап, өңдейді. Осы өтінімдердің негізінде жөнелтуге рұқсат қағаздарды ресімдейді және соған сәйкес дәрі-дәрмектерді өңірлерге таратады.
Бірыңғай дистрибьютордың дәрі-дәрмек сатып алу жөніндегі мәліметіне қарағанда, бірінші жартыжылдықта амбулаториялық пациенттерді тегін қамтамасыз ету үшін ең көп медициналық препараттар Алматы қаласының емханаларына келіп түсті. Алматыға шамамен 7,8 млрд теңге сомаға дәрі-дәрмек тиелген, ал пациенттер қазірдің өзінде 5,3 млрд теңгеге тегін дәрі-дәрмек алған. Жыл соңына дейін мегаполиске медициналық ұйымдардың өтінімдері бойынша 12,3 млрд теңгенің медициналық өнімі түседі.
Көлемі бойынша екінші тегін дәрі-дәрмек алған Шығыс Қазақстан облысында 9,8 млрд теңгеге тапсырыс берілген. Яғни жылдық көлемнен 5,7 млрд теңгеге дәрілік заттар алынды. Осы өңірдегі емделушілер қазіргі таңда 5,3 млрд теңгеге тегін рецепт бойынша дәрі-дәрмек алды.
Елордалық медициналық ұйымдарға бірінші жартыжылдықта 6,2 млрд теңгелік жалпы жылдық өтінімнен 5,6 млрд теңгеге тегін дәрі-дәрмек келіп түсті. Оның ішінде 1 шілдеге дейін Нұр-Сұлтан қаласының амбулаторлық емделушілеріне 3,2 млрд теңге көлемінде дәрі-дәрмек берілді.
5 млрд теңгеге дәрі-дәрмектер Қарағанды облысына, 4,4 млрд теңгеге Түркістан облысына және 4,1 млрд теңгеге Алматы облысына жөнелтілді. Қостанай облысы диспансерлік есепте тұрған амбулаторлық емделушілер үшін 2,9 млрд, Жамбыл – 2,8 млрд, Атырау – 2,7 млрд және Қызылорда – 2,6 млрд теңгеге дәрі-дәрмек алды. Батыс Қазақстан облысы және Шымкент қаласына дәрі-дәрмектер 2,5 млрд, Солтүстік Қазақстан облысына – 2,4 млрд, Ақмола облысына – 2,3 млрд, Ақтөбе облысына – 2,1 млрд, Павлодар облысына – 1,8 млрд және Маңғыстау облысына 1,3 млрд теңгеге түсті.
Естеріңізге сала кетейік, пациенттердің тегін дәрі-дәрмек алуын бақылау үшін Денсаулық сақтау министрлігі, Әлеуметтік медициналық сақтандыру қоры, Республикалық электронды денсаулық сақтау орталығы және «СҚ-Фармация» тұрақты негізде тегін дәрі-дәрмек алатын пациенттерге рецептінің нөмірі мен дәрі-дәрмек беру күні туралы ақпараты бар SMS-хабарламалар таратады. Бұдан басқа, дәрі-дәрмекпен қамтамасыз етуде іркіліс болған жағдайда емделушілер «СҚ-Фармация» байланыс орталығына тегін 1439 қысқа нөмірі бойынша хабарласа алады.