Аймақтар • 15 Тамыз, 2019

Төрт түлік тірідей жанып кетті

21 реткөрсетілді

Биылғы аптап ыстық талайды әбігерге салды. Соңғы кездері Жамбыл облысының әрбір ауданында өрт оқиғасы тіркеліп, төтенше жағдай жиіледі. Алайда апат айтып келмейді. Тілсіз жау­дың тұтқынында қалған талай жер күлге айналды.

Жуырда ғана Жамбыл ауданы, Жамбыл ауылдық окру­гі­не қарасты Қоңыртөбе елді ­ме­кенінде болған алапат өрт­тен «Ғалымжан» шаруа қожа­лығы­ның төрт түлігі отқа оранды. Тө­тенше жағдайлар қызметінің мәлім­деуінше, өрт электр желі­лерінің тұйықталуы салдарынан шамамен түнгі сағат 00-01 ша­масында тұтанған. Түн ортасында асқынған өрт аталған шаруа қожалығының жалпы 90 бас малын шарпыған. Атап айтсақ, қожалық басшысы Нұр­лан Жұмағұловқа тиесілі 5 бас жыл­қы, 18 бас қой және 67 бас сиыр малы түгелдей өртеніп кеткен.

Кәсіпкер мал шаруашылы­ғымен талай жылдан бері айналысып келеді екен. Жақында ғана «Ғалымжан» шаруа қожа­лы­ғын ашып, ол мұнда мал бор­дақылауды қолға алған. Алайда төтеннен келген тілсіз жаудың салдарынан мұндағы барлық мал басы тірідей жанып кетті. Қораның әр бұрышында жатқан малдың өлі денелеріне қарағанда, жануарлардың басы шынжырмен мық­тап байланған. Электр желі­лері­нің тұйықталуынан тұтан­ған қы­зыл жалынның ұш­қы­ны қа­мыспен жабылған қора­ның ша­ты­рына тиіп, одан мал тұр­­ған жерге түсіп, одан әрі жа­қын маңға жиналған шөпке түс­­кен. Түн ортасында тілсіз жау­­мен арпалысуға шыққан жұ­мыс­шылар әуелі өртті өздері сөн­дір­­мек болыпты. Алайда сәт санап күш алып бара жатқан өртті ауыз­дықтау мүмкін болма­ған­дық­тан, олар амалсыз құтқару­шы­лар­дың көмегіне жүгінген. Со­ның өзінде 600 шаршы метр жер­ді өрт жайлаған.

Жамбыл ауданы әкімі­нің орынбасары Ерлан Қыдыр­әлі­ұлы­ның айтуынша, жергілік­ті әкімдік бұл мәселеге бейжай қарамай, тиісті көмек көрсеткен. Қоңыртөбе елді мекенінде болған өртті сөндіру үшін ауданнан 20-дан астам адам және 5-6 техника күші тартылған. Сонымен қа­тар шаруаларға медициналық қыз­мет те көрсетілген. Соның өзін­де абай­сызда тұтанған алапат жа­лын­ның беті 4 сағаттық арпа­лыс­тан соң әрең қайтқан. Бірақ өкінішке қарай төрт түлік мал тілсіз жаудың құрбанына айналды. Сондай-ақ 200 тонна шөп күлге айналған. Аудан әкімдігі тарапынан от тиіп, опат болған малдардың өлі­гін толығымен оқшаулап көму жұ­мыс­тары жүргізілді. Әкімнің орын­басары тағы да тиісінше көмек көрсетілетінін айтты.

 

Жамбыл облысы

 

Баннер
Соңғы жаңалықтар

Байсал тартқан балалар өлеңі

Әдебиет • Бүгін, 08:30

Күзетшіге мұқтаж елміз

Қоғам • Бүгін, 08:25

Қыңыр кісі – бір жақ...

Аймақтар • Кеше

Айдаһар үңгірі

Аймақтар • Кеше

Ұқсас жаңалықтар