Сайлауға жоғары жауапкершілік қажет
Сейсенбі, 11 маусым 2013 2:09
Қостанайда Қазақстан Республикасындағы аудандық маңыздағы қалалар, ауылдық – округтер, ауылдық округтерге кірмейтін кенттер мен ауыл әкімдерін сайлауды ұйымдастыру мен өткізу мәселелері жөніндегі семинар-кеңес болып өтті.
Сейсенбі, 11 маусым 2013 2:09
Қостанайда Қазақстан Республикасындағы аудандық маңыздағы қалалар, ауылдық – округтер, ауылдық округтерге кірмейтін кенттер мен ауыл әкімдерін сайлауды ұйымдастыру мен өткізу мәселелері жөніндегі семинар-кеңес болып өтті.
Оған Қазақстан Республикасы Орталық сайлау комиссиясының хатшысы Бақыт Мелдешов, Орталық сайлау комиссиясы ұйымдастыру бөлімінің меңгерушісі Наталья Вишнякова, аудан, қала әкімдері, аудандық, қалалық мәслихаттардың хатшылары, аудандық, қалалық әкім аппаратының жетекшілері, аудандық, қалалық сайлау комиссияларының төрағалары мен хатшылары, облыстық сайлау комиссиясының мүшелері, сондай-ақ облыстық прокуратура, ішкі істер департаментінің, салық департаментінің, экономика және бюджеттік жоспарлау мен Мемлекеттік қызмет істері жөніндегі агенттік басқармасының өкілдері қатысты. Семинар-кеңесте Б.Мелдешов сайлаудың маңызы мен ұйымдастыру, өткізу реті туралы егжей-тегжейлі айтып берді. Басқосуда жергілікті жерлерде өтетін сайлаудың барынша мөлдірлігін қамтамасыз ету қажеттігі атап көрсетілді.
Қазақстан Республикасы Президентінің «Аудандық маңыздағы қалалар, ауылдық округтер, ауылдық округке кірмейтін кенттер мен ауылдар әкімдері сайлауын өткізудің бірқатар мәселелері туралы» Жарлығына сәйкес, Қостанай облысы аумағында 245 ауыл әкімі сайланады. Сайлау 2013 жылдың 7 тамызында өткізіледі деп белгіленген. Осы мәселе бойынша облыста бірнеше семинар-кеңестер өткізіледі.
Антонина Маркова басқаратын облыстық сайлау комиссиясының бұрынғы сайлаулардағы біліктілігін Б.Мелдешов жоғары бағалады. Ол жауапкершілігі мол алдағы сайлау да табысты өтетініне сенім білдірді.
Нәзира ЖӘРІМБЕТОВА,
«Егемен Қазақстан».
ҚОСТАНАЙ.
