Қоғам • 28 Тамыз, 2019

«Қайырымдылық керуені» жолға шықты

57 реткөрсетілді

Биыл екінші рет қолға алынған республикалық «Қайырымдылық керуені» байқауына өтінімдер қабылдау қыркүйектің 2-сінен басталмақ. Бұл туралы байқаудың ұйымдастырушылары Президент жанындағы Орталық коммуникациялар қызметінде мәлімдеді.

Баспасөз конференциясында алғаш­қылардың бірі болып сөз алған Тұңғыш Президент – Елбасы қоры атқарушы директорының орынбасары Игорь Рогов екінші жыл қатарынан өткелі отыр­ған бұл байқау арқылы Елбасы Қоры адамгершілік құндылықтарды, қайы­рымдылық және гуманизм идея­ларын насихаттайтынын жеткізді. «Біз жүрегі кең азаматтарымызды, өз за­манымыздың нағыз батырларын халық­қа көрсетіп, таныстырғымыз келеді. «Қайырымдылық керуені» жобасы аза­маттардың зор ықыласына ие бол­ғаны қуантады. Өткен жылы комис­сияның қарауына Қазақстанның барлық өңірінен 97 өтініш келіп түсті», деді И.Рогов. Оның айтуынша, еліміздің әр түкпіріндегі таланттарды іріктеп, же­ңімпаздарды анықтау үш айға, яғни осы жылғы 29 қарашаға дейін жалғасады.

«Бізде өмірдің қиын жағдайына түскен адамдарды қолтығынан демеп жі­беретін жомарт, қамқор жүректі жандар жетерлік. Бірақ олар өте қарапайым келеді және жақсылықты жария­лама­ғанды жөн санайды. Осы байқау­дың нәтижесінде ержүрек кейіпкер­лері­мізді олардан көмек алған адамдар арқы­лы анықтаймыз», дейді Тұңғыш Пре­зидент – Елбасы қоры атқарушы дирек­торының орынбасары. Сондай-ақ ол жо­баны іске асы­руға Қазақстанның іскер әйелдер қауым­дастығы, «Ха­бар» агенттігі, КТК телеарнасы және «Оқжетпес» емдеу-сауықтыру кешені қолдау көрсеткенін жеткізді.

Қазақстанның іскер әйелдер қауым­дас­тығының президенті Раушан Сәр­сембаева үміткерлерді әр но­ми­нацияға сай іріктеумен айналысатын жұмыс тобы құрылатынын айтты. Оның құрамына аталған қауым­дас­тықтың, өңірлердегі Ішкі саясат басқармаларының, БАҚ-тың өкілдері кіреді. Ал республикалық деңгейдегі комиссия іріктелген өті­німдерді жіті қарайды. «Биыл да назар аударарлық кейіпкерлер кезде­седі деп ойлаймыз. Әлбетте бар­лық үміт­кер ынталандыруға, наси­хаттауға және бағалауға лайық. Десе де байқау­дың белгілі бір шарттары бар», дейді Р.Сәрсембаева. Аталған байқауға әлеу­меттік мәселелерді шешуге үлес қосып жүрген, өздерінің игі істерімен бас­қалар­ды ынталандыратын жеке және заңды тұлғалар өтінім бере алады. Алайда қайырымдылық қызметін мемле­кеттік қолдаумен (мемлекеттік грант, мемлекеттік тапсырыс және т.б.) іске асы­ратын кәсіпкерлік субъектілер және жеке тұлғалар қатыса алмайды.

Ұйымдастырушылардың ха­бар­лауынша, «Қайырымдылық керуе­нінің» жеңімпаздары бес аталым бойынша анықталады: «Асар» (қайы­рымдылық қызметі халықтық салт-дәстүрлермен байланысты болуы керек), «Туған жер» (туған жерге білім, экология және абаттандыру мәдени нысандарды қалпына келтіру және т.б. салаларында көмек көрсеткендерге), «Батыл жүрек» (ерлік, қайсарлық та­нытқан адамдарға), «Мейірім жолын­да» (өз еркімен, өз қаражатына адамдарға көмек көрсеткен жеке және заңды тұл­ғаларға), «Қайырымдылық тарихы» (қоғамның назарын әлеуметтік пробле­маларға аударатын материалдарды ұсы­натын, БАҚ-та қайырымдылық тақы­рып­тарын үздік жариялаған журналис­терге немесе шығармашылық топтарға беріледі).

Айта кетейік, өтінімдерді іріктеу жұмысы биыл желтоқсан айында аяқталады. Ал байқау жеңім­паз­дарын марапаттау 2020 жылғы ақпан айының соңында – Алғыс айту күніне жоспарланып отыр.

Соңғы жаңалықтар

UFC турнирі өтпейтін болды

Спорт • Бүгін, 19:18

Жазығы жоқ көктемнің

Әдебиет • Бүгін, 15:36

Шымкентте 40 586 азамат әлеуметтік төлем алды

Оңтүстік Қазақстан • Бүгін, 14:37

Еріктілердің елеулі ісі

Аймақтар • Бүгін, 14:33

Ұқсас жаңалықтар