– АҚШ-тың баж салығы Қытайға қиын соғып жатыр. Соның салдарынан Бейжің ұлттық валютасының бағамын төмендетіп, экономикасына ақша құюға мәжбүр», – деді АҚШ басшысы. Ал өзге мәліметтерге сенсек, Вашингтон Бейжіңнен империялық Қытай кезіндегі америкалықтардың сатып алған құнды қағаздарын төлеуді талап еткелі отыр. Оның көлемі 1 триллион долларды құрайды.
Жалпы, бұл процесс былтырдан бері Қытай мен Америка арасындағы сауда соғысының келесі деңгейі десек, қателеспейтін шығармыз. Өйткені 1 қыркүйектен бастап Қытай Америка Құрама Штаттарынан импортталатын тауарларға жалпы құны 75 миллиард доллар болатын қосымша баж салығын 5 пайызға өсірді. Дәл осынша пайызға Америка 300 миллиард доллар тұратын қытайлық тауарға салығын көбейтті.
Биыл мамыр айында аталған сауда текетіресінің аясында Вашингтон Бейжіңнен келетін 200 миллиард долларлық тауарларға баж салығын 10 пайыздан 25 пайызға өсірген еді.
Бұл сауда қақтығысы екі елдің де экономикасына зиянын тигізіп отырғанын сарапшылар айтып келе жатыр. Сондай-ақ Америка Құрама Штаттары және Қытай экономикасымен тығыз байланысты өзге елдер де шығын көре бастады.
