Егеменде жарияланған мақала бойынша депутаттық сауал жолданды

Қазақстан • 11 Қыркүйек, 2019

«Егемен»-де жарияланған мақала бойынша депутаттық сауал жолданды

Парламент Мәжілісінің депутаты, Nur Otan Фракциясының мүшесі Бақытбек Смағұл Нұр-Сұлтан қаласындағы көрнекті көшелердің біріне Жошы хан есімін беруді ұсынды.

Egemen Qazaqstan

Бақытбек Смағұл Президент Қасым-Жомарт Тоқаевтың Қазақстан халқына Жолдауында айтылған экотуризм мен этнотуризмді дамытуға экономиканың маңызды саласы ретінде баса мән беру туралы міндет қойғанын тілек тиек етіп, қоғам өкілдері мен журналистер тарапынан Жошы хан есімін ұлықтау жөнінде мәселе көтеріліп жатқанын айтты. Ол елеулілердің бірі ретінде «Egemen Qazaqstan» республикалық газетінде жарияланған Дархан Қыдырәлінің «Ұлық ұлыстың атасы» мақаласын атап өтті.

«2015 жылы Қазақстанда Елбасының бастамасы бойынша Қазақ хандығының 550 жылдығы кең ауқымда атап өтілді. Бұл – қазақ мемлекеттілігінің бастауы болса, ал Жошы ұлысы мен Алтын орда – қазақ ұлтының қалыптасуында шешуші рөл атқарды. Қазақ хандарының Ұлы Атасы саналатын Жошы ханға және Ұлық ұлысымыз болып есептелетін Алтын ордаға лайықты құрмет көрсету – біздің қасиетті парызымыз» деді Бақытбек Смағұл.

Бұдан соң депутат Үкімет басшысы Асқар Маминге Нұр-Сұлтан қаласындағы көрнекті көшелердің біріне Жошы хан есімін беруді және ол көше бойына ұлық ұлыс ханының еңселі ескерткішін орнатуды, сондай-ақ, Жезқазғанның солтүстік-шығысында 50 шақырымдай жердегі Жошы хан кесенесі жанынан ескерткіш-белгі тұрғызуды ұсынды.

«Жезқазғанның солтүстік-шығысында 50 шақырымдай жердегі Жошы хан кесенесі – Шыңғыс хан мен оның әулетінен жер бетінде қалған жалғыз белгі. Сондықтан оның жанынан бұл мазардың дүниежүзі тарихын өзгерткен дара тұлғаға тиесілі екенін алыстан әйгілеп тұрар айбынды ескерткіш-белгі тұрғызу маңызды. Шыңғыс ханның үлкен ұлына арналған тарихи кешен тек Шығыс елдері үшін ғана емес, сондай-ақ бүкіл әлемдегі саяхатшылар мен зерттеушілер үшін зор қызығушылық тудырып, туристік тартымды орынға айналары сөзсіз» деді ол.

Бұдан әрі депутат Алтын орданың 750 жылдығы аясында Жошы хан, Алаша хан кесенелеріне кешенді түрде археологиялық, этнографиялық зерттеу жұмыстарын жүргізуді, отандық және шетелдік білгір ғалымдардың қатысуымен бірлескен экспедициялар мен халықаралық конференциялар ұйымдастыруды және зерттеу жұмыстарын әртүрлі тілдерде шетелдік ақпарат құралдарында жариялауды ұсынды. Оның айтуынша, Ұлы Дала елінің қойнауында тұнған адамзат құпиясын жаһанға насихаттау арқылы Қазақстанның әлемдегі бедел-имиджі нығаяды.

Сонымен қатар Бақытбек Смағұл Жошы хан кесенесін келешекте ЮНЕСКО-ның «Дүниежүзілік мәдени мұра тізіміне» енгізу керек екенін айтты.

«ХІІІ ғасырдың ескерткіші және планетамыздағы Шыңғыс хан әулетінен қалған жалғыз белгі ретінде Жошы хан кесенесін келешекте ЮНЕСКО-ның «Дүниежүзілік мәдени мұра тізіміне» енгізу жолдарын қарастырған жөн. Себебі, халықаралық беделді туристік операторлар, жеке саяхатшылар сапарын жоспарлағанда, көбіне ЮНЕСКО тізіміне енген ескерткіштерге қарап, бағыт-бағдар түзеді. Қазақ хандарының ұлық бабасы Жошы ханды ұлықтау – халқымыздың ұлт рухының ұлы бастауларынан қуат алуына жол салу деген сөз» деді ол.