Алматы облысындағы апатта зардап шеккендерге медициналық, әлеуметтік көмек көрсетіледі

Қоғам • 16 Қыркүйек, 2019

Алматы облысындағы апатта зардап шеккендерге медициналық, әлеуметтік көмек көрсетіледі - Р. Скляр

Алматы облысында орын алған кешегі жол көлік оқиғасының мән-жайын Ішкі істер министрі Ерлан Тұрғымбаев және Индустрия және инфрақұрылымдық даму министрі Роман Скляр Орталық коммуникациялар қызметіндегі брифингте айтып берді.

Egemen Qazaqstan

Кеше кешкі сағат жетілер шамасында «Алматы-Қостанай» бағытымен шыққан №43 поезы «Алматы-Қаскелен» бағытындағы №456 автобусқа соғысып, апат соңы автобус жүргізушісі қайтыс болып, 3 жолаушы зардап шеккен. Оқиғаның мән-жайына тоқталған Роман Склярдың айтуынша поезд 2434 метр қашықтықта келе жатқанда-ақ, автоматты түрде дабыл белгілері қосылған. Бағдаршамның қызыл түсі жанып, теміржол өткелінің тосқауы толықтай жабылмаған. Себебі, жол бойындағы көлік кептелістен автобус темір жолдың үстіне шығып кеткен.

Роман Скляр: «Поезд машинисінің көлікті ерте тоқтату әрекеті болғанымен, іске аспаған. Сағатына 97 км жылдамдықпен келе жатқан. Ал поезд ішінде зардап шеккендер жоқ. Бүгінгі таңда ем қабылдап жатқан барша зардап шеккендерге медициналық, әлеуметтік көмек көрсетіледі», - деді.

Ал Ішкі істер министрі Ерлан Тұрғымбаевтың айтуынша, мұндай жағдайлар жүргізушілердің ережені сақтамауынан жиі орын алады екен. Нақты кешегі оқиғаға қатысты тергеу амалдары жүргізіліп, жауапты адамдарға тиісті жаза қолданылады деді.

Бүгінде елімізде, темір жол мен авто жолдар 1058 жерде тоғысқан. Оның 467-сі күзетіледі. Әр тоғысқан орында дабыл белгілері орнатылып, теміржол өткелінің тосқаулары жаңа қондырғылармен жабдықталған.