Қаладағы 113 жылдық тарихы бар Хероним Лопачинский атын­дағы воеводтық кітапханада «Ұлы даланың ұлы ойшылдары: Қазақстанның тарихы мен мәдениеті» атауымен жұмысын бастаған көрме Қазақстанның Польшадағы елшілігінің бастамасымен, сонымен қатар «Польша-Шығыс» және «Mój Kazachstan» (ауд. «Менің Қазақстаным») бірлес­тік­терінің қолдауымен ашылған.

Салтанатты шараға Люблин воеводтығының вице-маршалегі (басшысының орынбасары) – Збигнев Войчеховский, Қазақстанның Польшадағы ел­ші­сінің кеңесшісі – Данияр Сей­далиев, Польшаның 2004-2007 жж. Қазақстан мен Қыр­ғызстандағы елшісі, «Менің Қазақстаным» бірлестігінің тө­рағасы – Владыслав Соколов­ский, Люблиндегі Хероним Ло­­па­чинский атындағы воевод­тық кітапхананың директоры – Тадеуш Славецкий, «Польша-Шығыс» бірлестігінің басқарма мүшесі – Эдвард Валевандер, сонымен қатар жергілікті тұрғын­дар мен студенттер қатысты.

Еліміздің тарихы мен мәде­ние­тінен, әсем табиғатынан ха­­бардар ететін көрмеге қазақ та­рихын кәсіби зерттеуші Вла­дыслав Соколовскийдің жеке коллекция­сы, Қазақстанның Поль­шадағы елшілігі ұсынған фо­тосуреттер қойылған.

Шара барысында алғашқы болып сөз алған Елшінің кеңесшісі Данияр Сейдалиев бүгінде қазақ-поляк қарым-қатынастарының қарыштай дамып келе жатқан­дығын, оған экономикалық ын­ты­мақ­тастықпен қатар, Поль­шада білім алып жатқан мың­­нан астам қазақстандық студент­тің және еліміздегі саны 30 мыңнан асып жығылатын эт­ностық поляктардың да сеп болып отырғандығын жеткізді. Соны­мен қатар дипломат тә­уел­сіздік жылдарындағы сая­си трансформациясы да ұқсас жағ­дайда өткен қос мемлекеттің қазір­гі уақытта етене жақын ын­­ты­мақтастықта екендігін, атап айтқанда, Польшаның елі­міз­дің Орталық және Шығыс Еуропа аймағындағы, тиісінше, Қазақстанның Польша үшін Орта­лық Азия аймағындағы негізгі серіктестердің бірі екен­дігін тілге тиек етіп, Люблин вое­водтық кітапханасына мем­ле­кетіміздің тарихы, мәде­ниеті мен экономикасынан, туризм әлеуетінен хабардар ететін қо­мақты кітап қорын сыйға тартты.

Люблин воеводтығының ви­це-маршалегі Збигнев Вой­чехов­ский өз сөзін түрлі саяси нау­қандар кезінде елімізге жер ауда­рылып, арып-ашып келген поляктарға қол ұшын созып, барымен бөліскен қазақ хал­қына алғыс айтудан бастады. Атал­ған тарихи факторлардың ықпа­лымен қос мемлекет халық­тарының арасында қазіргі күні ерекше жақындықтың, рухани байланыстың бар екендігіне тоқ­талып, бұл шараның өз жерлес­терін қазақ халқының тарихы мен мәдениетіне жақындастыра түсе­тіндігін айтып өтті.

Ал Хероним Лопачинский атындағы воеводтық кітапхана­ның директоры сөзін «Ежелден Ұлы Жібек жолының бойында орын тепкен тарихы іргелі, таби­ғаты әсем, мәдениеті бай қазақ елі туралы не білеміз?» деген сауал­дан бастап, Қазақстанда пар­ламент депутаты және мем­лекеттік қызметші ретінде ұзын-саны жеті рет болғандығын айта ке­ле қос мемлекеттің мәде­ни,­ туристік саладағы байла­ныс­­­­та­рын нығайтуға аталған ша­ралардың оң ықпалын тигі­зетіндігін жеткізді.

Сондай-ақ көрме барысында антикалық авторлардың мұрасының кейінгі Еуропа ға­лым­дарына жетуіне зор ықпал еткен – Әбу Насыр әл-Фарабидің қа­зақ жерінің тумасы екендігі ай­тылды. Алтайдан Еділге дейін­гі аралықты кең жайлаған қазақ­тың бірлігін сақтап, қой үстіне бозторғай жұмыртқалаған заман орнатқан әйгілі Тәуке ханның ірі саясаткер, дипломат болуымен қатар, заманында озық заң жү­йесін қалыптастырған реформатор болғандығы таныстырылды.

В.Соколовский баяндамасын­да дәуірінен оза туған, алда­ғы уа­қыт­та халықаралық дең­гейде 175 жылдығы аталып өткелі отырған хакім Абай­дың тұлғасы, ақындық, ой­шыл­дық, ағартушылық және аудармашылық қырлары ай­шық­­талып, поляк тіліне өзі тәр­жімалаған ақынның «Интер­натта оқып жүр, талай қазақ баласы» атты өлеңі оқылды.

Мәдени шараға келген көрер­менді сөзге тартып, көрмеден алған әсерлерін сұраған едік.

Елжбета Сендейевич, қала тұр­ғыны: Елдеріңізде түрлі белдеулерді қамтитын та­биғаты әсем жерлер көп екен. Қандай әдемілік, керемет! Ал қойылған ұлттық на­қыштағы бұйымдардың ерек­ше­лігін айтыңыз... Нет­кен мұ­қияттылықпен әрі шы­ғар­­ма­шылық шабытпен жа­сал­ған десеңші! Өз басым біздің ха­лықтарымызды жақын­дас­тырып, тың дүниелерді тану­ға мүмкіндік беретін мұндай шара­лардың өткізілуін қолдаймын.

Ирена Ивашкевич, кәсіпкер: Мен кәсіпкер ретінде Қазақстан аумағында іссапарларда жиі боламын. Қайда болмасын, қазақ халқының тарапынан мейірімді, қажет кезінде қол ұшын созатын азаматтарды кездестіремін. Сіздердің елшілік өткізетін бар­­лық шараға ұдайы қатысып келемін. Жыл өткен сайын қос мемлекет арасындағы қарым-қатынастың атап айтқанда, мә­­дени-гуманитарлық байланыс­тардың нығая түскендігі қуан­тады.

Арайлым Аманжолқызы, Люб­лин қаласындағы Экономика және инновация университеті, Менеджмент мамандығының ІІ курс студенті: Мұрагері біз болып табылатын көшпенділер өркениеті әлемдік өркениеттің ажырамас, құрамдас бөлігі. Еліміздің тарихы мен мәде­ниеті бай. Соны тиісінше ха­лық­аралық дәрежеде таныта білуіміз керек. Біз, студенттер, елдің айнасымыз. Шетелде жүр­ген кезде Қазақстанның өкіл­дері ретінде өзімізге екі есе жа­уап­кершілік аламыз. Себебі әр­­бір қадамымыз еліміз туралы көз­қарасты қалыптастырады. Қай жерде, қай елде жүрсең де туған елдей ел болмас! Мұндай кездесулердің елден жырақта жүргенде өткізілуі, туған еліңнің бір бөлшегін сезіну тіптен ерекше, тіптен ыстық болады екен.... Мұндай шаралар біздің ұлттық құндылықтарымызды дәріптеуге зор үлесін қосады.

Осылайша, «Ұлы даланың ұлы ойшылдары: Қазақстанның тари­хы мен мәдениеті» атты көр­ме өз жұмысын бастады. Люблин қаласындағы Х.Лопачинский атын­дағы вое­водтық кітапханада ашылған көрме қазан айының ортасына дейін жалғасады.

Жандос Әуелбекұлы,
арнайы «Egemen Qazaqstan» үшін

Люблин (Польша)