Руханият • 20 Қыркүйек, 2019

Әңгіме өзегі – әдебиеттің ертеңі

46 реткөрсетілді

Қарағандыда «Рухани жаңғыру» бағдарламасы аясында ақын-жазушы, мемлекет және қоғам қайраткері Сәкен Сейфуллиннің 125 жылдығына арналған жас ақындар мен жазушылардың республикалық форумы өз жұмысын бастады.

Алқалы жиынға қатысушылар алдында Қарағанды облысы әкімінің орынбасары Абзал Нүкенов құттықтау сөз сөйледі. «Әдебиет – бұл халықтың төл­құжаты», деп атап өткен ол жаңа технологиялар ғасырында кі­тап оқудың адам өмірінің бар­лық қырларында ма­ңызды рөл атқаратынына назар аударды.

– Заманауи әдебиет жастарға тартымды болуы керек. «Рухани жаңғыру» бағдарламасының көз­дегені де осы, – деді облыс әкімінің орынбасары.

Одан кейін сөз алған Қазақ­стан Жа­зушылар одағы төр­аға­сының орынбасары Бақыт Беделхан ұйым төрағасы Ұлық­бек Есдәулеттің құттықтау хатын оқып берді. Сонымен қатар ол жергілікті ақын Жанат Жаңқаш, Олжас Қасым және басқа да жас әдебиетшілерге Қа­зақстан Жа­зушылар одағының мүше­лік билеттерін табыс етті.

– Таяуда астанамызда Азия елдері жазушыларының үлкен форумы өтті. Қарағанды форумын соның жалғасы деп баға­лауға болады. Бұл жиынды әде­биетшілердің өте уақтылы ұйым­дастырылған және аса қажетті кездесуі деп сеніммен айтуға болады. Біз бәріміз бірге заманауи әдебиеттің болашағын анық­тай аламыз деп ойлаймын, – дей келе Бақыт Беделхан форумды ұйымдастырған облыс басшы­лығына алғыс сезімін білдірді.

Форумда сөз сөйлеген ақын Исраил Сапарбай «Рухани жаң­ғыру» бағ­дар­ламасының мән-маңызына баса назар аударды.

– «Рух» дегеніміз ол – адам­ның жан дүниесі. Біз оны дұрыс түсінуіміз керек. Бұл бүкіл халықтың рухани жаңғыруын білдіреді, – деді ақын.

Сондай-ақ алқалы жиында­ Сәкен Сей­фуллиннің 125 жыл­ды­ғы мен «Ege­men Qazaqstan» газетінің 100 жылдық мерейтойы­на байланысты басылым бас­­­шысы Дархан Қыдырәлі баяндама жа­­сады.

– Халқымыздың мақтанышы Сәкен Сейфуллиннің 125 жыл­дығы биыл өзінің 100 жылдық мерейтойы үстіндегі «Egemen Qazaqstan» үшін елеулі оқиға. Себебі ақын кезінде «Еңбекші қазақ» – қазіргі «Egemen Qazaq­stan» газетінде еңбек еткен. Ба­­сылым бетінде өзекті мәселе­лер­ді көтерді. Мысалы газетте «Қазақ» атын қайтару, қазақ ті­лінің мәр­тебесін көтеру туралы өткір материалдар жазғаны белгілі. Ахаңның – Ахмет Бай­тұр­сынұлының 50 жылдығын кең кө­лемде атап өтуге бастамашы бол­ған. Яғни, Сәкенді нағыз алаш­­шыл тұлға деп атауға әбден болады, – деді Дархан Қыдырәлі.

Алқалы жиынның ашылуында қонақтар алдында Жақсыкелді Кемалов, Сержан Мұсайын сияқ­ты белгілі өнер­паздар Сәкеннің, Қасымның әндерін шыр­қады.

Форумның салтанатты ашылуынан кейін «Қазіргі заман қазақ әдебиетінің бет-бейнесі және рөлі» атты тақырыпта дөңгелек үстел ұйымдастырылды. Мұн­да сөз сөйлеген ақындар Се­рік Ақсұңқарұлы, Гүлнәр Салық­бай, Бақыт Беделхан, Ма­рал­тай Райымбекұлы, Тана­көз Толқынқызы, «Egemen Qazaq­stan» газетінің басшысы Дархан Қыдырәлі, жазушы Аягүл Мантай, әдебиеттанушы Жан­сая Жарылғапов  қазіргі қазақ әдебиетіндегі қадау-қадау мә­се­лелерге тоқталып, өздерінің құнды ұсыныстарын айтты.

Мысалы Дархан Қыдырәлі әдебиетте сын жанрын дамыту керектігін қозғаса, ақын Серік Ақсұңқарұлы қаламақы мә­се­лесіне назар аударатын кез жет­кенін айтты. Танакөз Толқын­қызы аударма жанрының біздің әдебиет үшін аса ма­ңызды жанр екендігіне баса мән берді. Ал ғалым Жансая Жарылғапов осындай жиындарға әдебиеттанушы мамандар да қатысса деген тіле­гін білдірді.

Жалпы ақын-жазушылар бас қосқан жиын аса қызықты және пайдалы пі­кірталас үрдісімен өрбіді. Форум қонақ­тары айтқан көкейге қонымды идеялар мен ұтымды ұсыныстардың жиынның маңызын арттыра түскенін де атап өткен ләзім.

Бүгін форум қонақтары Қара­ған­дының маңындағы Долинка кентінде орналасқан саяси қуғын-сүргін құр­бандарын еске алу мұражайына экскурсия жасайды. Бұдан бөлек ақын-жазушылар кеншілер астанасындағы студент жастармен кездесулер өткізеді. Сондай-ақ форум қонақтары се­минарлар мен тренингтерге, шеберлік сабақтары және кітап тұсаукесерлеріне қатысады. Бағ­дарлама жоспары бойынша ал­қалы жиынның жұмысы жергі­лікті өнерпаздар күшімен қойы­латын гала-концертпен түйін­делмекші.

 

ҚАРАҒАНДЫ

 

Соңғы жаңалықтар

Ең қысқа әңгіме. Төреғали Тәшенов

Ең қысқа әңгіме • Кеше

Ең қысқа әңгіме. Құдияр Біләл

Ең қысқа әңгіме • Кеше

Ең қысқа әңгіме. Мади Сырымбетов

Ең қысқа әңгіме • Кеше

Ең қысқа әңгіме. Қойшыбек Мүбарак

Ең қысқа әңгіме • Кеше

Ең қысқа әңгіме. Жәудір Нартай

Ең қысқа әңгіме • Кеше

Ең қысқа әңгіме. Әлібек Байбол

Ең қысқа әңгіме • Кеше

Ең қысқа әңгіме. Болат Шарахымбай

Ең қысқа әңгіме • Кеше

Ең қысқа әңгіме. Асхат Өмірбаев

Ең қысқа әңгіме • Кеше

Күлкі керуені № 5

Руханият • Кеше

Меценаттың мырзалығы

Аймақтар • Кеше

Жазудың машақаты

Қоғам • Кеше

Әлемнің Әбдіжәмілі

Қазақстан • Кеше

Нан болса, ән болады

Қазақстан • Кеше

Белсене қатысу қажет

Қазақстан • Кеше

Ұқсас жаңалықтар