– Валюталық одақ құру және ортақ валютаны қолданысқа енгізу қарастырылып жатқан жоқ. Сонымен қатар ақша-несие саясатын жүргізетін орталық банк құру да қарастырылмайды. ЕАДБ Еуразиялық экономикалық одақтың жұмысшы органы емес, оның қызметі келісімшарт бойынша қарастырылмаған,– делінген Ұлттық банктің жауабында.
Бас банк ЕАДБ-ның қызметі одаққа мүше мемлекеттерде инфрақұрылымдық жобаларды қаржыландыру мен өнеркәсіптік өндірістерді қолдауға ғана бағытталғанын атап өтті.
ЕАДБ-ның интеграциялық зерттеулер орталығының басшысы Евгений Винокуров одаққа мүше мемлекеттер Ресеймен арадағы қаржылай операцияларды рубльмен жүргізетінін, ал өзара операцияларды доллармен жүргізетінін айта келіп, ортақ валюта осы олқылықты жоюға көмектеседі деген пікір білдірген болатын. «Аймақтық ақша бірлігі бірінші кезекте сауда ағындарына қызмет көрсетуге керек» делінген оның пікірінде.
Осы орайда, одақ елдеріне ортақ валюта енгізу туралы әңгіме бұған дейін де бірнеше рет көтерілгенін айта кетейік.
