Медицина • 02 Қазан, 2019

Алматылықтар медициналық сақтандыру жарнасын төлеуде алдыңғы орында тұр

90 рет
көрсетілді
1 мин
оқу үшін

Алматы қаласы медициналық сақтандыру жарнасын төлеу жағынан алдыңғы орында тұр. Қорға түскен қаржының бестен бір бөлігі бұрынғыша оңтүстік астаналықтарға тиесілі.

Алматылықтар медициналық сақтандыру жарнасын төлеуде алдыңғы орында тұр

Жүйе іске қосылған 2017 жылдың 1 шілдесінен 2019 жылдың 6 қыркүйегіне дейінгі аралықта барлығы 1 млн 373 мың алматылық тұрғынның атына 42,6 млрд теңге аударылған. Бұл туралы МСҚ Алматы қалалық филиалының баспасөз қызметі хабарлайды.

«Бұл соманың ішінде бірыңғай жиынтық төлем де бар. Атап айтқанда, жыл басынан бері өзін-өзі жұмыспен қамтыған 3,5 мыңнан астам алматылық 10,1 млн теңге көлемінде бірыңғай жиынтық төлем төлеген», – деді Алматыда өткен брифингте МСҚ қалалық филиалы директоры Тілеухан Әбілдаев.

Оңтүстік астанадан түскен түсімдердің негізгі бөлігі немесе 40,1 млрд теңгесі – жұмыс берушілердің қарамағындағы жұмыскерлерінің атына аударған аударымдары. 2017 жылдан бастап жарна аударуға міндеттелген бұл санат жұмыскерлерді сақтандыруды тоқтатқан жоқ.

Сақтандыру енгізілген кейін, 2017 жылдың екінші жартысында өзі үшін жарна аударған жеке кәсіпкерлер мен азаматтық-құқықтық келісімшарт негізінде еңбек ететін тұлғалар соңғы екі жылда сақтандыру төлемдерінен босатылған болатын. Олар жарнаны өзге санаттармен бірге 2020 жылдың қаңтарынан бастап аудара бастамақ.

Естеріңізге сала кетсек, Қорға түскен қаражат Ұлттық банкінде сақталады және 2020 жылдан бастап МӘМС шеңберінде көрсетілетін қызметтердің ақысын төлеуге жұмсалады.