Аталған жиынға академик, Мемлекеттік сыйлықтың лауреаты Сейіт Қасқабасов, ақын Несіпбек Айт, жазушы Алдан Смайыл, профессор Марат Әбсәметов, тіл жанашырлары Мұхамбедия Ахметов, Камал Әлпейісова, қоғам қайраткері Сайлау Батыршаұлы сынды бірқатар зиялы қауым өкілдері қатысты.
«Тіл-Қазына» орталығының бас директоры Әлібек Асқар сөз алып, қазақ әліпбиін латын графикасына кезең-кезеңімен көшіруге арналған іс-шаралар жоспарына сәйкес атқарылып жатқан жұмыстар ретін таныстырып, орталықтың мемлекеттік тілдің мәртебесін көтеру, оны ғылым тіліне айналдыру, жаңа ұлттық әліпбиді халыққа насихаттау бағытында қоғамның әртүрлі әлеуметтік топтары арасында, ғылыми ортада, тіл мамандары, әдіскерлер, мемлекеттік қызметкерлер арасында түсіндіру жұмыстары жүйелі түрде өткізіліп жүргенін жеткізді. Сондай-ақ жазушы, Мемлекеттік сыйлықтың лауреаты, қоғам қайраткері Төлен Әбдік, Парламент Мәжілісінің депутаты Фахриддин Қаратаев, Мәдениет және спорт вице-министрі Нұрқиса Мұратұлы оқыту сыныптарының сапалы, нәтижелі жұмыс жасауына сенім білдіріп, ұлттық жазудың негізін қалыптастырып берудің болашақта тіл саламаттығын сақтауда туындайтын кез келген мәселені шешуде аса маңызды екенін атап өтті.
Қазақстан Республикасы Мәдениет және спорт министрлігі Тіл саясаты комитеті төрағасының орынбасары Айнұр Мырзабекова оқыту сыныптарын ашудың негізгі талаптарына тоқтала отырып, Тұңғыш Президент – Елбасы Нұрсұлтан Әбішұлының қазақ тілін жаңа әліпбиге көшіруге байланысты Жарлығынан кейін Премьер-Министр өкімімен «Қазақ тілі әліпбиін латын графикасына 2025 жылға дейін кезең-кезеңімен көшіру жөніндегі іс-шаралар жоспары» бекітілгенін атап өтті.
– Үкімет қаулысымен «Тіл-Қазына» ұлттық ғылыми-практикалық орталығы» құрылып, еліміздегі латын әліпбиін енгізуге байланысты жұмыстар осы мекеме арқылы жүзеге асырылуда. Атап айтқанда, Ұлттық комиссия жанынан құрылған жұмыс топтарының жұмысын үйлестіру, латын әліпбиін енгізуге бағытталған мемлекеттік тапсырмаларды іске асыру. 2019 жыл – «Әдістеме жылы». Жаңа емле ережелерін оқыту бойынша Нұр-Сұлтан қаласында 72 сағаттық біліктілік арттыру курстары, өңірлерде дәрістер мен 12 сағаттық семинарлар ұйымдастырылуда, – деді Тіл саясаты комитеті төрағасының орынбасары Айнұр Мырзабекова. Оның айтуынша, «Тіл-Қазына» орталығынан білімін жетілдірген филолог мамандар өз өңірінде тіл үйрету курстарын жалғастыратын болады. Аталған курс 2025 жылға дейін жүргізілмек. Сондай-ақ орталық мамандары бүгінге дейін республика бойынша 500-дей адамға жаңа әліпбидің емле ережесін үйреткен.
– Жаңа әліпбиге көшу барысында біз оқыту сапасына ерекше мән беруіміз қажет. Қазіргі кезеңде оқытудың қай түрі болсын жаңа инновациялық технологияларға құрылғаны жөн. Осы реттен келгенде, бүгін ашылатын оқу ғимараты осындай жаңа талаптармен жабдықталған. Сонымен бірге оқу ғимаратындағы техникалық құрылғылар онлайн семинар өткізуге де мол мүмкіндік береді,– деп сөзін түйіндеді ол.
Ашылған оқыту сыныптары курс өткізуге қажетті құралдармен, техникалармен тегіс жабдықталған. Дәрісханаларда республика бойынша, сонымен қатар шетелдегі ғалымдар, әдіскерлермен байланыс орнатуға, онлайн семинар өткізуге мүмкіндік бар. Семинар, курстарды жаңа қазақ әліпбиінің емле ережесін әзірлеген ғалымдар өткізеді.
Заманауи жобаларды жүзеге асыруға күш жұмылдырып отырған «Тіл-Қазына» орталығының мемлекеттік тілді және латын графикасы негізіндегі қазақ тілінің әліпбиі мен жаңа емле ережесін таныстыру, үйрену, жазу және оқу дағдыларын қалыптастыру мақсатында кешенді іс-шаралар жоспарын тұрақты іске асырып келеді. Сондықтан республика көлемінде жаңа латын графикасымен жазылған жазба тіліміздің жүйесін, емле ережелерінің құрылымын, емле нормаларының ғылыми негіздерін түсіндіре алатын білікті мамандар дайындау – күн тәртібінде тұрған өзекті мәселелердің бірі.
