Қоғам • 10 Қазан, 2019

Қаламгерлер шекара заставасына барды

555 рет
көрсетілді
2 мин
оқу үшін

Қазақстан Республикасы Ұлттық қауіпсіздік коми­те­тінің Шекара қызметі әске­ри қызметшілерді рухани тәрбиелеу, олардың әдеби танымдарын кеңейту және отаншылдық сезімдерін одан әрі арттыру, сондай-ақ Халық Қаһарманы, жазушы Қасым Қайсенов атындағы шекара заставасымен және елдің шығыс шебімен ақындар мен жазушыларды таныс­тыру, шекара маңындағы халықты шекараны бірлесіп қорғауға шақыру мақсатында Зайсан қаласында орналасқан 2017 әскери бөлімінің қосындарына Қазақстан Жазушылар одағы мүшелерінің шығармашылық сапарын ұйымдастырды.

Қаламгерлер шекара заставасына барды

Шекара қызметі ұйыт­қы болып отырған шы­ғармашылық сапарға Қа­зақ­стан Жазушылар одағы басқарма төрағасының орын­басары, белгілі ақын Бақыт Беделхан бастаған ақындар мен жазушылар қатысты. Сапардың бірінші күні шығармашылық ұжым Зайсан шекара жасағының даңқ музейін, кітапханасын аралады. Сол күні кешқұрым аудандық мәдениет үйінде әскери қызметшілері және аудан халқымен шығармашылық кездесу ұйымдастырылды.

Сапардың екінші күні осындай шығармашылық кездесу «Ақжар» шекара комендатурасы орналасқан Ақ­жар ауылының мәдениет үй­ін­де жалғасын тапты. Бұл шығар­машылық ке­зе­де­суге де шекарашылар мен шека­ра маңындағы Тарбағатай ауданының халқы қатысты. Кездесуден соң шығармашылық топ Халық Қаһарманы, жазушы Қасым Қайсенов атындағы шекара заставасына арнайы ат басын бұрды. Заставаның тарихымен, тыныс-тіршілігімен танысқан ақын, жазушылар застава сарбаздары және Ойшілік ауылынан келген мектеп оқушыларына өз шығармаларын оқып, жауынгерлермен еркін сұхбаттасты.

Сапардың үшінші күні ақын-жазушылар «Қа­ра­тал» шекара комендатурасы орналасқан Қаратал ауы­лы­ның мәдениет үйінде ауыл халқымен және әскери қыз­метшілермен кездесті. Қаратал ауылынан Зайсан қала­сына қайтар жолда ақын­дар Жамбыл ауылына келіп, өмірден ерте кеткен талантты ақын Нұрлан Мәукенұлы атындағы сая­баққа аялдап, жиналған ауыл тұрғындарымен дидар­ласып, жыр шумақтарын оқы­ды. Осымен екінші жыл ұйым­дастырылып отырған іс-шараның әсерімен ақын-жазу­шылардың қаламынан туған патриоттық, соның ішінде ел шебін, туған жерді, Отанды қорғау тақырыбындағы шы­ғар­малар жинағын кітапқа басып шығару көзделген. Кі­тап­тар ел шебіндегі шекара заставалардың кітап­ха­наларына таратылып берілмек.

«Егемен-ақпарат»