Реформалар оза шабуды көтермейді

Бұл байламға сайлауалды бағдар­ла­ма­сында қойылған мәселелерге байланысты келіп отырмыз. Президент елді одан әрі дамыту мен мемлекетіміздің болашағына қатысты қадау-қадау мәсе­лелерді атап көрсеткені белгілі. Бүгін­гі күн биігінен көз салғанда сайлауалды платформада қойылған міндеттер өзі­нің мүмкіндігіне қарай орындала баста­ға­ны­на куәміз.

«Мен халыққа берген уәдемді мін­дет­ті түрде орындаймын», деп мәлім­деді Қасым-Жомарт Кемелұлы Қазақ­стан халқына арнаған Жолдауында. Бұл Мемлекет басшысының ақ адал шын сөзі, жүрегінің қалауы екені анық. Кез келген мемлекетте саяси реформаларды жүзеге асырудың тек өзіне тән иірімдері мен ерекшеліктері болатыны белгілі. Мұндай жағдайда асығып, аптығып алға оза шауып кетуге де, орынсыз аялдап, малтығып қалуға да болмайды. Осы жайтты Парламент палаталарының бірлескен мәжілісінде Қ.Тоқаев орынды ескертті деген ойдамыз. Бұл кез келген қоғамдық құбылыстың іске асуының өз уақыты болатындығын терең түйсінуден туындағаны сөзсіз.

Саяси реформаларды іске асыру кезінде нақты нәтижелер мен жетіс­тік­терге жетудің басты бір тетігі – азаматтық қоғамды дамыта отырып, оның толыққандылығын қамтамасыз ету болса керек. Оған ең алдымен аза­мат­тық және қоғамдық үнқатысулар арқы­лы қол жеткізуге болатынын атап көрсетті Мемлекет басшысы Қазақстан хал­қына арнаған Жолдауында. Бұл көше­де байбалам салып, айқай-шу көтеру секілді арзан саяси ұпай жинауға әрекеттенушілердің іс-қимылдарымен мүлдем сыйыспайтын сындарлы аза­мат­тық ұстанымға жетелейді.

Сондай-ақ Президенттің елімізде көппартиялық жүйені одан әрі дамыту жолдарын ұсынғаны да қоғамдық-саяси өмірдің бүгінгі талаптарынан туындайтын қадамдар деуге болады. Азаматтық және қоғамдық үнқатысулардың басты бағыты ашықтық пен жариялылыққа арқа сүйеген жағдайда ғана мәнді бол­мақ. Мемлекеттік органдардың аза­мат­тардың арыз-шағымдары мен та­лап-тілектеріне түсіністікпен құлақ асуының қажеттілігі де осында. Мұның өзі қоғамдық келісімді нығайту мен ел бірлігін еңселендіруге септігін тигізе алатын тұтқаның бірі. Ел бірлігі туралы әңгіме қозғаған кезде қазақ халқының мемлекет құраушы ұлт ретіндегі орны айқын көрініс табуы тиіс. Сонымен бірге алдағы уақытта мемлекеттік тіл – ұлтаралық қарым-қатынас тілі мәрте­бесіне жетуі керектігі жөніндегі жүрек­жарды пікір де Президент аузынан айтылды. Осы орайда бұл істе басты жауапкершілікті мемлекет құраушы ұлт арқалайтыны назардан тыс қалмаса екен дегім келеді.

Ең бастысы, жылдың басты құжаты еліміздің саяси-экономикалық және мә­дени-тұрмыстық бағыттарын, оның шешімін табуға тиісті өзекті мәсе­ле­ле­рін толықтай қамти алуымен құнды демекпіз.

Роман РАХИЕВ,

Ақтөбе облыстық денсаулық сақтау саласы қызметкерлері ардагерлер кеңесінің төрағасы