Шаңырағы биіктің – мемлекеті берік

Ұлт болып сақталуымызға, иірімге түсіп жұтылып кет­пеуімізге кепіл болатын ұлт­тық кодтың тізгіні ана­ның қо­лын­да тұр, қурап кет­пеуі үшін ұлттық тамырды суару да ананың қасиетті мін­деті екен. Бұл айтуға оңай нәр­­се, ал тарқатар болсаң атан көтер­мес ауыр жүк. Қос­та­най­да Қазақстан халқы ассам­­блея­сы республикалық ана­­­лар кеңесінің кеңейтілген оты­­­ры­­сындағы талқыланған мәсе­­ле­­лердің де темірқазығы осы еді.

Президент Қасым-Жомарт Тоқаевтың «Сын­дар­лы қоғамдық диалог – Қазақ­­станның тұрақтылығы мен өр­кен­деуінің негізі» атты Қ­а­зақ­­стан халқына Жол­дауын­да және Елбасының «Рухани жаң­ғыру» бағдарламасын­да белгі­лен­ген міндеттерді шешу­дегі ана­лар кеңестерінің рөлі» атты тақырып аясында әң­гі­ме өрбіген шараға Қазақ­стан Халқы ассамблеясы төрағасының орынбасары – Қазақстан Республикасы Пре­зиденті Әкімшілігінің Хат­шылық меңгерушісі Жан­сейіт Түймебаев, облыс әкі­мі Архимед Мұхамбетов қа­тыс­ты. Жалпыұлттық жоспардың іске асырылуына жауапты ор­та­лық мемлекеттік орган­дар­дың қызметкерлері, сондай-ақ Нұр-Сұлтан, Алматы, Шым­кент қалалары мен облыстар ассамблеялары аналар кеңестерінің, этномәдени бірлестіктерінің төрағалары мен мүшелері де шақырылды.

– Ана – қасиетті сөз. Отан­ды анаға теңейміз, тілді де ана тілі дейміз. Отбасының қазығы – аналар. Отбасы бере­келі болса, мемлекеттің ірге­тасы мықты болады. Бала­ның тәрбиесінде де ана­ның маңызы ерекше. Бала – бола­шақ. Ал болашақтың қан­дай болары да анаға байла­ныс­ты екен. Ұлтты тәрбие­лейтін де ана, – деді Жансейіт Түймебаев.

Әсіресе әлеуметтік мәсе­ле­лер өзектілігі жүйкені тоз­ды­ратын бүгінгі қоғамда әйел­дер белсенділігі қажет­тілік­ке айналып отырғаны рас. Қоғамда қандай әлеуметтік мәселе көтерілсе де, бір ұшы анаға келіп тіреледі. Оның үстіне ұрпақты да, ұлтты да тәр­биелейтін ананың өзіне қам­қорлық керек. Статистика бойынша әйелдердің 70 па­йызы өмірінде бір рет болса да түрлі, тұрмыстық зорлық-зомбылықты бастан кешеді екен. Отбасының ажырасуы да соңғы жылдары өте жиіледі, жастар арасында отбасылық құндылықтардың көмескі тартуы байқалады. Тас­танды баланың азаймауы, балаға қарсы қылмыстың өріс алуы қоғамдағы аса ауыр көрі­ністің бірі. Жан­се­йіт Қан­­сейітұлы облыстар­да осы­ған орай жұ­мыс жүр­гізіп отыр­ған аналар кеңес­терін, со­ның ішінде Қост­анай облы­сын­дағы аналар кеңесі­нің «Отбасын қол­даудың ре­сурс­тық орта­лығы» жобасы жұ­мы­сын ризашы­лықпен атады.

Қоста­най облыстық Қазақ­стан халқы ассамблея­сы жүр­гізіп отырған жұмыс­тар­д­ы облыс әкімі Архимед Мұ­хам­бетов те атап өтті. Үстіміздегі жылдың 9 айында облыста 127 ірі шара өткізілген. Ана­лар кеңесі облыстағы қайы­рым­дылық ісін дамытуға үлес қосып отыр. Олардың бас­та­масымен өткен «Ыстық нан», «Ашық жүрек», «Таза ойын», «Буккросинг», «Мере­келік түстік ас» сияқты қайы­рым­дылық акциялары 4 мыңға жуық адамды қамтыған.

– Облыста Елбасының бас­тамасымен өмірге жолдама алған «Бақытты отбасы» жобасы қарымды жүріп жатыр. Қостанайлық кәсіп­керлердің қолдауымен 48 көп балалы ана баспаналы болды, – деді Архимед Бегежанұлы.

Қоғамдағы көптеген өзек­ті мәселелерді аналар бас­та­масымен қолға алған істер шешеді. Арқалық қаласын­дағы аналар кеңесін ардагер ұстаз Бақытжамал Қал­қаева басқарады. Олар бес ба­ғыт­та жұмыс жүргізеді, соның ішін­де жасөспірім қыз­дар тәр­бие­сімен айналыса­тын «Пара­сат» клубының жұ­мы­сын ерекше атауға болады. Соны­мен қатар аналар фо­румы­на қатысушылардың да әң­гім­есінен көптеген игі іс­тер бай­қалады. Ақмола об­­лысы ана­лар кеңесі төр­айы­мы­­ның орынбасары Зәу­ре Қоңқа­баева­­ның жеке автор­лық бағ­дар­­ламасы да назарға аларлық.

– Аналар кеңесінде түрлі бағытта жұмыстар жү­реді. Бәрі де жақсы, жас қыз­дар тәрбиесіне баса көңіл бө­­ле­міз. Дегенмен, тек айта беру­мен де іс өнбейді, үлгі­ні іс­пен көрсету керек. Менің жеке бағдарламам бойынша, екі жылдан бері балаларды қазақ ауылдарына апарып, он күн бойы қазақ тілін үй­рену­ге, қазақ халқының дәс­түр­лерін көруге, ұлттық та­ғам­­дардың жасалуымен та­ны­суға жағдай жасаймыз. Мағ­жан Жұмабаевтың, Ғабит Мү­сіреповтің ауылында, елі­міз­дің оңтүстік, батыс облыс­тарында болдық. Жиырма бес бала ауылға барғанда құрт қайнату, айран ашыту, қой қырқу, сиыр сауу сияқты жұ­мыс­тардың барлығын он күн бойы өздері атқарды. Бұл оқу­шы­лар тобында ұл-қызы, орыс, қазағы, басқа ұлттары да ара­лас болды. Жасөспірім, бала кезіндегі осы саяхат олар­­дың ғұмыр бойы есінен шық­­пайды, олар­дың бойында ұлт­­тық дәстүрге, Отанға деген пат­­риоттық сезім, құрмет қалып­та­сады, – дей­ді Зәуре Балуанқызы. 

 Екі күнге созылған ана­лар форумы бай бағдарлама­мен ере­кшеленді. Қатысушы­лар қайы­рымдылық акция­сын, А.Бай­тұрсынов атындағы Қос­танай мемлекеттік және Ө.Сұл­танғазин атын­дағы Қос­танай мемлекет­тік пе­даго­ги­ка­лық университет­тері­нің сту­денттерімен кез­де­­су­лер өткізіп, қала кітап­ха­на­лары­на Ассамблея атынан кітап­тар табыс етті. Соны­мен қатар әйелдер мен бала­ларды өмір­ге бейімдеу және өмірде қиын­дыққа тап болған балаларды қол­дау орта­лықтарында болды. Кешке І.Омаров атын­да­ғы облыстық қазақ драма театрын­да «Рухани жаңғы­ру» ба­ғ­­дар­ламасы мен Ассам­блея­­ның «Қазақтану» жоба­сы ая­сын­да аудармашы, ақын Ка­мал Әлпейісованың «Төр­кін­деу» атты шығармашылық ке­ші өтті. Форум қонақтары қол­­өнер шеберлері мен ана­лар­­дың өз қолымен жасаған бұйым­дарының көрмесін тамашалады.

ҚОСТАНАЙ