Вице-министр атап өткендей, егер азаматтар қандай да бір электронды процедурадан табыс табатын болса, оған да салық салынуға тиіс. Ол салықтың мөлшері де әртүрлі болуы керек. Айталық, жеке кәсіпкер электронды қаржы аударымынан табыс тапса – жеке табыс салығы салынады. Заңды тұлға болса, тиісінше корпоративтік табыс салығы, қосымша құн салығы және тағы басқалары төленуге тиіс.
– Мәселен, егер сіз коммуналдық есепшотты төледіңіз делік. Оны тексеруге болады. Аталған қаржыны алушы бар, оған Салық комитеті мониторинг жүргізеді. Ал түрлі жеке тұлғалардан төлем түсетін болса, онда ол адам кенеттен табыс таба бастады ма деген сауал туындайды. Әрине сіз әкеңізге ақша жіберсеңіз, оның кіріс емес екені де түсінікті, – дейді Б.Шолпанқұлов.
Вице-министр халықтың біреуге көмектесу үшін қайырымдылық мақсатта жасалатын қаражат аударымына да тоқталды. Б.Шолпанқұловтың айтуынша, оның бәрін салық қызметі тексеріп отырады.
– Ондай төлемдердің түрін айқындап алу керек. Айталық ақша аударымы тауарға немесе қайырымдылыққа аударылды деген сияқты саралау жүргізіліп, барлық төлемдер белгіленіп отыруы керек, – деді вице-министр.
Қаржы министрлігі Kaspi.kz-пен бірлесіп қолма-қол есеп айырысудың жаңа заңды жолын жасауды қолға алып жатқанын да айта кетейік. Таяуда министрлік өкілдерінің брифингінде Қаржы вице-министрі Руслан Еңсебаев еліміздегі ірі банктердің бірінің клиенттері қолма-қол ақшасыз есеп айырысуды комиссиясыз жүргізетініне тоқталды.
– Kaspi Gold қазір өте танымал құрал. Төлем жүйелері туралы заң тұрғысынан келсек, барлық талаптарға сай. Бірақ Салық кодексі мен фискалдандыру тұрғысынан келсек, талапқа сай келмейтін тұстары бар. Біз оған тыйым салуды ойластырғанбыз, бірақ онда экономикаға кері әсер етуі мүмкін. Мұндай оңай құрал бірінші кезекте тұтынушылар үшін ыңғайлы. Екіншіден, қолма-қол ақшасыз төлемдердің үлесін айтарлықтай көбейтті, – деді ол. Сол себепті қазіргі таңда Қаржы министрлігі мен Kaspi.kz бірлесіп жұмыс істейтін бағдарлама әзірлеуде.
