Өңірдегі 442 мектептің барлығы жоғары кең жолақты интернет желісіне қосылған. Сонымен қатар 435 білім беру ошағы Wi-Fi желісімен қамтылған. Оның ішінде 334 мектеп жергілікті бюджет есебінен, 73 мектеп электронды оқыту жүйесін енгізу есебінен, 32 мекеме демеушілер есебінен жабдықталған. Аталған бағдарламаның маңызын ескере отырып, Жамбыл облысының инвесторларға қызмет көрсету, жобалық басқару және цифрландыру орталығының басшысы Дамир Егізбаев жыл соңына қарай мектептерді Wi-Fi желісімен қамту 100 пайызды құрайтынын жеткізді.
Сондай-ақ өңірдегі барлық мектепке «Bilimland» сандық білім беру қоры енгізілген. «Жол картасына» сәйкес 2018-2020 жылдары адами капиталдың сандық экономикасын дамыту үшін мектептердің 50 пайызы роботтехника кабинетімен жарақтандырылады екен. Сонымен қатар Тараз қаласында №41 гимназия базасында қауіпсіздік мақсатында «SMART-мектеп» қанатқақты жобасы іске қосылған. Оқушыларды қабылдау ақпараттық жүйесі облыстағы мамандандырылған мектептерге енгізілген. Айталық, ерекше дарынды балаларға арналған облыстық «Дарын» мектеп-интернатына 443 өтініш беріліп, 60 бала электронды қабылданған. Дарынды балаларға арналған мамандандырылған ІТ лицей-интернатына 355 өтініш беріліп, 40 бала электронды қабылданыпты.
Бос жұмыс орындарын және педагогтарды жұмысқа қабылдау жүйесін басқарудың автоматтандырылған жүйесі өңірдегі барлық мектепке енгізіліп, бұл жүйе «е – еңбек биржасы» порталымен ықпалдастырылған. Іске қосылған уақыттан бері 2485 вакансия жарияланып, 504 қызметкер мен кіші қызметкер жұмысқа қабылданған.
«Тараз қаласында 1 қарашада «TarazHub» IT инкубаторы ашылды. 5 қабатты инновациялық IT-орталықтың аумағы 1 000 шаршы метрді құрайды. Орталықтың міндеті – дәстүрлі және инновациялық IT-технологияларды оқыту, болашақ IT-мамандар мен жаңа идеяларды іздеу, IT-стартаптарды қолдау. Ғимарат құрылысы 100 пайыз аяқталды, қазір мамандарды іріктеу жұмыстары жүргізілуде. Биыл 37 IT-сынып ашу жоспарлануда», дейді Дамир Егізбаев. Сонымен қатар «Қауіпсіз мектеп», «Қауіпсіз колледж» жобасы аясында да тиісті жұмыстар атқарылуда.
Тараз қаласы мен аудан орталықтарында 391 медициналық мекеме бар. Оның ішінде медициналық ақпараттық жүйеге қосылуға тиіс мекеме саны – 370. Облыстағы 4952 медициналық жұмыс орны 100 пайыз компьютермен қамтамасыз етілген. Сонымен қатар 49 медициналық ұйым төрт медициналық ақпараттық жүйе бойынша жұмыс істейді. Денсаулық сақтау аясында мобильді қосымша құрылып, оған 49 928 адам тіркелген. Медициналық құжаттаманы қағазсыз жүргізу үшін 1 069 079 электронды денсаулық паспорты құрылған. Бұл ақпараттық жүйеге тіркелгендердің 94,2 пайызын құрайды. Жыл соңына дейін 100 пайыз қамту жоспарлануда. Сонымен қатар 12 медициналық мекемеге «е-Kezek» электронды кезегін енгізу үшін жергілікті бюджеттен 73,8 миллион теңге бөлініп, оны «Stending» компаниясы 100 пайыз іске асырды. Қазіргі таңда цифрлы сауаттылықты арттыру үшін ашылған цифрлы бекеттер, жедел медициналық көмекті басқару бойынша да бірқатар жұмыстар атқарылуда.
Жамбыл өңірінде тұрғын үй-коммуналдық шаруашылықты цифрландыру бойынша «е-Shanyrak» бірыңғай зияткерлік ақпараттық жүйесін құру, «Ақылды квартал» қанатқақты жобасын іске асыру, қалалық сумен жабдықтауды автоматтандыру, ортақ жылу энергиясын есептеу құралдарымен жабдықтау, «Ақылды жарықтандыру» қондырғысын орнату және үйлердің кіреберістеріне бейнебақылау камераларын орнату сияқты 6 жоба қолға алынған. Қаланы сумен жабдықтауды автоматтандыру аясында «Тараз су» мекемесінің мәліметі бойынша, «Цифрлы Қазақстан» мемлекеттік бағдарламасын іске асыру негізінде ITRON фирмасының FLOSTAR маркалы 448 қашықтан есептеу құралдары бюджеттік мекемелерге орнатылуда. Бүгінгі таңда, орнатылған қашықтан есептеу құралдарын бірыңғай ақпараттық жүйесіне қосу жұмыстары жүргізілуде, ол биылғы жыл желтоқсан айында толық аяқталатын болады.
Ортақ жылу энергиясын есептеу құралдарымен жабдықтау мәселесі де өзекті. Өткен жылы табиғи монополиялар субъектілері жоспар бойынша үйлерге 1249 дана ортақ жылу энергиясын есептеу құралдарын орнатуға тиіс болатын, нәтижесінде 997 дана ғана орнатылған. Тараз қаласы жоспар бойынша 1072 дана орнатуға тиіс еді, орнатылғаны – 873 дана. Сол сияқты Жаңатас қаласы жоспар бойынша 98 дана орнату керек болса, бүгінге орнатылғаны 80 дана. Ал Қаратау қаласы жоспар бойынша 44 дана болу керек, оның орнатылғаны 10 дана және Шу қаласы жоспар бойынша 38 дана, ал орнатылғаны 34 дана болып отыр.
Жарықтандыру мәселесіне келсек, Тараз қаласындағы Төле би мен – әл-Фараби көшесінің қиылысында күн панелі мен жел генераторы негізінде жұмыс істейтін «Ақылды жарықтандыру» деп аталатын 4 көше шамның орнатылғаны белгілі. Сонымен қатар Тараз қалалық прокуратурасының «Қауіпсіз аула» бағдарламасы аясында 23 көпқабатты тұрғын үйдің аула алаңдарын жарықтандыру жұмыстары бойынша жалпы құны 29,159 миллион теңге болатын жобалық-сметалық құжаттары жасалған. Жоба бойынша тұрғын үйлердің аулаларына жарықдиодты шамдар мен темір бағаналар орнатылады. Тұрғындардың қауіпсіздігі үшін үй кіреберістеріне бейнебақылау камераларын орнату қолға алынып, бұлыңғыр бейнебақылау сервисіне 238 кіреберісте 476 камера қосылған. Жыл соңына дейін 350 кіреберісте 700 камера орнатылады деп жоспарлануда.
Өңірде көлік жүйесін цифрландыру аясында да бірқатар жобалар жүзеге асырылуда. Атап айтсақ орталық диспетчерлік қызмет құру, автобустарда GPS навигациялық жүйесін орнату және мобильді қосымша жасау, автоинформаторлар құру және электронды билет жүйесін енгізу күн тәртібіндегі мәселе болып отыр. Тараз қаласында «автобақылау» жолаушылар автобустарының мониторинг жүйесі мен 43 жолаушы маршрут, 670 автобуста GPS навигация енгізілді. Қоғамдық көліктерде автоматты түрде аялдамалар мен басқа да хабарландырулар жариялайтын 115 автоинформатор орнатылған. Енді ағымдағы жылдың соңына дейін қосымша 150 автоинформатор орнатылмақ.
Тараз қаласында 206 сыртқы бақылау бейнекамерасы және 40 фотофиксация бекеті мен жол бақылау жүйесі орнатылған. Бүгінде жергілікті бюджеттен жедел басқару орталығын қайта жаңартуға және Тараз қаласында жаңа 300 бейнекамера орнату үшін жобалық-сметалық құжат әзірлеуге тиісті қаражат бөлінген. Оларды сатып алу және орнату 2019-2020 жылдарға жоспарлануда. «Ақылды бағдаршамдар» өткен жылдың жоспарына сәйкес аталған облыс орталығындағы жеті жол қиылысында орнатылды.
«Цифрлы Қазақстан» мемлекеттік бағдарламасы аясында «Цифрландырылған ақпараттық орталықтар» жобасын іске асыру барысында Жамбыл облысы бойынша 2018-2019 жылдары ауылдық кітапханалар жанынан цифрландырылған ақпараттық және коворкинг орталықтары ашылды. Оның ішінде 125 «Цифрландырылған ақпараттық орталық», 18 коворкинг орталық бар. Жыл соңына дейін 50 кітапхана мен әкімдік базасында «Цифрландырылған ақпараттық орталықтар» құру жоспарланып отыр.
Жалпы алғанда, Жамбыл облысында «Цифрлы Қазақстан» мемлекеттік бағдарламасын жүзеге асыру бойынша бірқатар жұмыстар атқарылуда. Өткен жылы денсаулық сақтау, білім беру, әлеуметтік, ауыл шаруашылығы, жер қатынастары және тағы да басқа 9 мемлекеттік қызмет автоматтандырылса, биыл білім беру, сәулет және құрылыс, спорт, дін, экономика саласындағы барлығы 33 мемлекеттік қызметті автоматтандыру жоспарлануда. Осылайша, жыл соңына дейін электронды түрде көрсетілетін мемлекеттік қызметтердің үлесі 80 пайызды құрайтын болады.
Жамбыл облысы
