Атажұрттағы әріптестерімен кездесуге Түркиядағы «Қазақ елі» журналының шығарушы редакторы Ертолқын Гайретуллах, баспагер Серхан Динчтүрк, Ирандағы Pars Today агенттігі қазақ редакциясының журналисі Гаухар Жұмағазықызы, Өзбекстанда таралатын «Нұрлы жол» газетінің бас редакторы Ғұламзәкір Юсупов, өзбекстандық журналист Қатира Нұрбаева, Моңғолияның Баян-Өлгей аймақтық радиосының тілшісі Қуат Уатхан, Ресейден шығатын «Шүйдің нұры» газетінің редакторы Арқалық Солтанов келді. Олар биыл жүз жылдығын атап өтіп жатқан «Egemen Qazaqstan» газетінің ұжымын мерейтойымен құттықтады. Сонымен қатар өздері қызмет ететін БАҚ пен ел газетінің өзара ынтымақтастығы жөнінде пікір алмасты, ұсыныстарын жеткізді. Өзбекстанда тұрып жатқан қандасымыз, журналист Қатира Нұрбаева Өзбекстандағы қазақ жастарын атажұртқа тағылымдамаға, тәжірибе алмасуға жіберуге қолғабыс етуге өтініш жасады.
«Egemen Qazaqstan» республикалық газеті» акционерлік қоғамының Басқарма төрағасы Дархан Қыдырәлі арнайы келген меймандарға алғыс айтып, ел газетінің жүз жылдық мерейтойы аясында атқарылып жатқан іс-шаралар туралы қысқаша баяндады. «Egemen Qazaqstan газеті халықаралық баспасөз каталогына енгендіктен, газетімізге енді Ресей жеріндегі оқырмандарымыз да жазыла алады. Соңғы жылдары ізденіс жұмыстары нәтижесінде «Ұшқын» редакциясы орналасқан тарихи ғимарат анықталды. Ресейдегі Қазақстан елшілігінің тікелей қолдауымен осы ғимаратқа ескерткіш тақта орнатуға қол жеткіздік», деді Дархан Қыдырәлі.
Сондай-ақ әріптестер тарапынан айтылған ұсыныс-тілектер алдағы уақытта ескерілетінін, қандастарымыз қызмет ететін шет елдердегі ақпарат құралдарымен өзара ынтымақтастықта жұмыс істеуге дайын екенін жеткізді және қандастарымыз тұрып жатқан өзге елдердегі баспасөз өкілдерін «Егеменде» тағылымдық тәжірибеден өтуге шақырды.
