Есіл ауданында бизнестің әлеуметтік жауапкершілігі аясында 67 меморандумға қол қойылды. Мұндағы ерікті түрдегі өзара тиімді ынтымақты мәміле бизнес өкілдерінің аймақтағы маңызды мәселелерді шешуге мүдделігін көздейді.
Қазірдің өзінде жергілікті кәсіпкерлер әлеуметтік саланы дамытуға 45 миллион теңге бөліп отыр. Бұл қаржының 12,8 миллион теңгесі білім беру мекемелерінің, 4,9 миллион теңгесі – денсаулық сақтау, 1,7 миллион теңгесі мәдениет пен спорт, 651 мың теңгесі әлеуметтік қорғау жүйесінің игілігіне жаратылады. Ортақ мәміледегі негізгі жобалар бастауыш сынып оқушыларын ыстық тамақпен қамтамасыз ету, шағын орталықтардың жұмысын үйлестіру, елді мекендерді абаттандыру мен санитарлық тазалығын қадағалау шараларына, әлеуметтік мекемелерге жөндеу жүргізу және мұндағы қызметкерлерге қаржылай қолдау көрсетуге бағытталған.
Маңызды инфрақұрылымдарды дамыту ісінде «Ново-Приречное», «Заречное», «Агро-Олдиви», «Есіл-МАН», «Құмай-Есіл», «Қалқаман-Ел», «Қаракөл АФ» жауапкершілігі шектеулі серіктестіктері мен «Тіней», «Қымбат», шаруа қожалықтары елеулі үлес қосуда. Мәселен, «Ново-Приречное» ЖШС өткен бес айда 33,3 миллион теңгенің 12 меморандумына қол қойып, өз міндеттемелерін жауапкершілікпен атқара білді. Ауылда күрделі жөндеуден өткізілген медициналық пункт, «Солнышко» балалар бақшасы, қоғамдық монша жұртшылықтың көз қуанышына айналды.
Бақберген АМАЛБЕК,
«Егемен Қазақстан».
Ақмола облысы.
