Жыл сайын тұрақты өтіп тұратын дәстүрлі форум инвестициялық жобалар көрмесінен басталды. Еліміз бен шетелден келген кәсіпкерлер, инвестициялық компания жетекшілері, ғылыми-зерттеу институттары өкілдері көрмеде осы бағыттағы облыс мүмкіндігімен танысты.
Облыс әкімі Қуанышбек Ысқақов форумның облыс экономикасына тигізген пайдасы жайлы айтып өтті.
– Осыған дейінгі өткен форумдарда 130-дан астам меморандумға қол қойылып, облыс экономикасына 1 трлн теңгеден астам инвестиция тартылды. Ал өткен жылғы форум «жасыл экономика» тақырыбына арналып, жаңғырмалы энергия көздері, инвестициялық жобаларды дамыту және «жасыл технологияларды» енгізу саласындағы ынтымақтастық мәселелері талқыланды. Соның нәтижесінде қазір Жалағаш және Шиелі аудандарында күн-электр стансалары салынуда, – деді облыс басшысы.
Қызылорда облысы тиімді логистикалық жағдайға ие өңірдің бірі. Сырдария өзені бүкіл облысты көктей өтіп жатыр, теміржол және «Батыс Еуропа – Батыс Қытай» халықаралық магистралінің 800 шақырымнан астам бөлігі осы өңір аумағымен өтеді. Инвесторлар үшін керегі де осы.
«Талап» қолданбалы зерттеулер орталығының директоры Рақым Ошақбаев модераторлық еткен форумда шетелдік дипломатиялық корпус өкілдері, кәсіпкерлер, инвестициялық компаниялар басшылары да пікірлерін білдірді. Иран Ислам Республикасының Қазақстандағы Төтенше және өкілетті елшісі Маджид Самадзаде Сабер екі ел арасындағы экономикалық байланыстарға тоқталды. Соңғы жылдары Иранның Гүлістан, Мазендеран аймақтарымен Қазақстанның оңтүстік өңірлері арасында барыс-келіс, алыс-беріс ұлғайғанын атап өтті.
Нидерланды Корольдігінің Төтенше және өкілетті елшісі Андре Карстенс «Шелл» компаниясы экономикалық байланыстың негізіне айналғанын айтты. Мұнай-газ саласынан бөлек ауыл шаруашылығы өнімдерін экспорттаудан алдыңғы қатарлы мемлекет саналатын Нидерланды инвестициясымен Ақтөбеде ірі жылыжай кешені салынды. Сондай кешеннің бірін алда Қызылордада салу жоспарлануда.
Қазақстандағы Корея Республикасының елшісі Ким Дэ Сик Корея мен біздің ел арасындағы «Самал жел» атты экономикалық ынтымақтастық бағдарламасы жайлы айтты. Көлік және логистика, құрылыс, өнеркәсіп, инфрақұрылымды дамыту, тау-кен металлургия және жер қойнауын пайдалану, сауда-экономикалық ынтымақтастық, энергетика, инновация, ауыл шаруашылығы, қаржы, денсаулық сақтау мен мәдениет, туризм және білім беру салаларын қамтитын бағдарлама шеңберінде Сыр өңірінде аурухана салу жоспарда бар.
Бұдан бөлек Франция, Германия, Македония, Канада, Словения, ҚХР, Ресей Федерациясы инвесторлары қатысқан форумда облыстың әр саладағы мүмкіндігі сарапқа салынып, облыс, қала әкімдіктері мен инвесторлар арасында бірқатар меморандумға қол қойылды.
Билік пен бизнестің арасындағы диалог алаңына айналған форумда Байқоңыр арнайы экономикалық аймағын құру, ауыл шаруашылығында фермерлікті және мал шаруашылығы кластерін дамыту, мемлекет-жекеменшік әріптестікті дамыту перспективалары талқыланды.
ҚЫЗЫЛОРДА
