Ел назарына алғаш рет ұсынылып отырған «Ұлы дала мұрасы» жобасы өрісі кең мәдениеттің алтын қазынасымен қауыштырып, мәңгілік туындылармен жалғасқан халық шығармашылығымен табыстырды.Ұлттық музей директорының орынбасары Алмас Нұразхан мұнда ел игілігі үшін айтулы жиын жиі өткізіліп тұратынын, сондай-ақ мұражайдың халық қазынасы екендігін атап өтті. Ал Қазақ Ұлттық өнер университетінің тәрбие ісі жөніндегі проректоры Қымбат Тілеуова аталған оқу орнының ректоры, Қазақстанның Еңбек Ері Айман Мұсақожаеваның ыстық ықыласын жеткізді.
– Отан, туған жер, ел, атамекен туралы түсініктер оқу-тәрбие үдерісінде сабақтан тыс іс-шараларда кең насихатталып келеді. Қазақстанның Тұңғыш Президенті күні мерекесіне орайлас Ұлттық музей мен Ұлттық өнер университеті студенттері бірлесіп ұйымдастырған бал кеші осының бір айғағы іспеттес, – деді Қымбат Тілеуова тың бастамаларға ұйытқы болып жүрген музей басшылығына алғыс білдірді. Салтанатты ашылу мәдени мұраларды кеңінен насихаттайтын қызғылықты бағдарламаларға ұласты. Шеру барысында суретші, гиперреалист-мүсінші, «100 жаңа есім» жобасының «Мәдениет» номинациясы бойынша жеңімпазы Айдос Есмағамбетовтің шеберлік сыныбы өтті. Қазақстанның еңбек сіңірген әртісі, «Құрмет» орденінің иегері Меруерт Өтекешованың жетекшілігімен «Қайырлы кеш» театрландырылған көрінісі қойылып, кештің көрігін қыздыра түсті.
– Ғылым мен өнердің үйлесімділігі бізді өркениеттің шыңына шығарады. Ал мәдени таным арқылы жақсы мен жаманды айырамыз. Бүгінгі музей шеруінің әсіресе келешек ұрпақ үшін маңызы зор деп білемін. Тарихын білген адам отаншыл болады, – дейді қазақтың «Қыз Жібегі» Меруерт Өтекешова.
Туған өлке тарихын кең таныту мақсатында «Ежелгі және орта ғасырлар тарихы» залында «Жанданған базар: «Абай» көрінісі сахналанды. Сондай-ақ Қазақ Ұлттық өнер университетінің талантты бишілерінің әсем биімен жалғасып, цирк әртістерінің шоуы кішкентай қонақтарды мәз-мейрам етті. «Мысыр – Ұлттық музейде» және «Quintessence» атты топтық көрмелері ашылып, этно-коллекция бойынша дефиле, қол күрес, «Асығың алшысынан түссін!» ұлттық ойындары ойнатылып, келген қонақтар ептілігі мен шеберлігін сынап көрді. Дәуір тарихы мен этнографиясын жинақтап, ел мәдениеті мен бүгінгі тыныс-тіршілігінен хабар беретін жан-жақты ұйымдастырылған арнаулы бағдарлама тақырыптық экскурсиялармен толықты. Музей экспозициясында нақты бір тапсырмаларды орындауға құрылған тарихи квест-ойындар ұйымдастырылып, қонақтарды зал экспозициясын өз бетінше меңгеруге үйретеді. Қазақстанның жаңа заманғы тарихын түсіну үшін ғана емес, күллі әлем дамуының бүгінгі үдерісін ұғынуды мақсат еткен шеру қатысушыларының ықылас-қошеметімен музей кеші шынайы мерекеге айналғандай!
