Берік болыңдар, бекем болыңдар, бауырлар!

(Қызылағаштықтарға қайырымдылық көмек көрсету жөніндегі бүкіл қазақстандық акция күні Алматы телеарнасынан айтылған сөз) Қадірлі достар, бауырлар! Қымбатты қызылағаштықтар! Қазақта: “От пен су ­– тілсіз жау” деген сөз бар. Ол рас. Мен осыған тағы екі жауды қосар едім – соғыс пен жер сілкіну деген. Өрт пен су тасқыны, соғыс пен жер сілкінісі – адамзаттың ежелгі төрт жауы. Осы қас жауларға халық қасарысып, қарсы тұра білген. Мен осы тажалдың бірімен бетпе-бет жүздескен кісімін. Ол кешегі Ұлы Отан соғысы болатын. Қасымда осы Қызылағаш, Ақсудан Тәкен Майшынов, Әдікен Сейсенбеков, Нүсіпбек Дүйсекенов деген қаһарман достарым болған. Кеңес Одағы халықтарының ынтымағы, бірлігі арқасында ол зұлым жауды да жеңгенбіз. Биылғы қыс қатал болды. Абай айтқандай, кәрі құда – қыс әлегін асырып кетті. Шығыс Қазақстан облысы кісі бойы қардың астында қалды. Ол елдің ұйымшыл халқы аяз, боран, дүлей желмен қаһар­ман­дықпен күресіп, кәрі құда-қыс тажалды Алтай тауларынан асы­рып, қуа бастады, қуып шығады, әрине. Енді, міне, кешегі ұлы ақыны­мыз Ілияс Жансүгіровтің ауылы Қызылағашқа топан суы төгіліп, есіл ауылды тып-типыл етті. Оны естігенде Алматы қаласының халқы да есінен танғандай болды, теле­ди­дар алдында үнсіз егіліп, еңіреп отырдық. Теледидар экраны ұлы суретшілер салған қайғылы ғажап картиналардың біріне айналып кеткендей болды. Іштен тындық. Қымбатты қызылағаштықтар, бауырларым, балаларым, немере­ле­рім менің! “Қайғы келсе қарсы тұр, құлай берме” деп атамыз Абай айт­қан­дай, бұл апатқа да кешегі соғыс кезіндегідей ерлікпен қарсы тұ­рыңдар. Қайыспаңдар, қалқаларым! Бүкіл Қазақстан сендермен бірге. Әр облыс сендерге көңіл айтып, көмек жіберіп жатыр. Алматы қала­сының халқы да аянып жатқан жоқ. Мектеп, институт, универ­си­тет­тер, кәсіпорындар сендерге азық-түлік, киім-кешек жіберуде. Осы жерде отырған бәріміз сен­дер­ге жалақы, зейнетақымыздан жы­рып, қаражат жөнелттік. Өз басым қызылағаштық­тар­дың қорына деп зейнетақымнан тиісті қаржы аудардым. Жер сілкінісі болған апат кезін­де армяндарға да, өзіміздің Арал теңізін құтқару қорына да, “Семей-Невада” қозғалысы қорына, Зай­сан­да жер сілкінісі болып, Жамбыл облысының Тұрар Рысқұлов ауда­ны­на су жайылып кеткен кездерде де жіберген болатынмын. Өйткені, мен кешегі сұрапыл соғыс кезінде халық қасіретінің қандай болаты­нын көрген қарттардың бірімін ғой. Қымбатты достар, берік болың­дар, бекем болыңдар. Ес жиып, ерлене түсіңдер. Су апатынан опат болған жандарды кешегі соғыс кезінде қайтыс болғандар қатарына қосып, олардың орнын толтыруға тырысыңдар. Президентіміз Нұрсұлтан Әбіш­ұлы Назарбаевтан, Премьер-Ми­ни­стрі­міз Кәрім Мәсімовтен бас­тап, Үкіметіміз, Парламент, бүкіл халық сіздермен бірге, сіздердің қас­тары­ңызда, қызылағаштықтар. Солардың ішінде мен де сіздерге шын жүректен көңіл айтып, бас иемін. Қызылағаш қасіретін тартып, зәрелері ұшқан кішкентай бала­лар­дың – кешегі жауынгер жолдас­тарым­ның немерелерінің, шөбере­лер­інің бастарынан сипап, беттерінен сүйемін. Сәлем жолдаушы Әзілхан НҰРШАЙЫҚОВ, Ұлы Отан соғысының майдангер-ардагері, Қазақстанның халық жазушысы.