Сыйлықақылар ҮЕҰ-дың дамуына және әлеуетін, материалдық және кадрлық ресурстарын нығайтуға, қоғамдық пайдалы жобаларды іске асыруда мотивацияны арттыру үшін нақты мүмкіндік. Сыйақылар 2017 жылдан бастап ҮЕҰ-ды ынталандыру тетігі ретінде беріліп келеді.
Елордадағы «Редиссон» қонақ үйінде Ақпарат және қоғамдық даму министрі Д.Абаевтың қатысуымен 2019 жылдың үздік үкіметтік емес ұйымдарына сыйақы табысталды.
Сыйлықақы жеңімпаздары қатарында «Жаңғыру» қоғамдық қоры да бар. «Мәдениет пен өнерді дамыту» аталымы бойынша сыйақыны алған «Жаңғыру» қоғамдық қорының төрайымы Динара Жұмабайқызы бұл ҮЕҰ-ның жұмысына берілген баға әрі қолдау екенін айтады.
«2009 жылы құрылған «Жаңғыру» қоғамдық қорының басым бағыты – мәдениет пен өнерді, руханиятты дамыту. Қоғамдық әлеуметтік маңызы бар саланың бірі - қазақ халқының мәдениеті мен өнерін насихаттау мақсатындағы шараларды ұйымдастыру: ұлттық өнерді жаңғырту, көне дәстүрлі музыкалық шығармаларды рухани айналымға қосу, оның бүгінгі жай-күйін зерттеу мен қоғам назарына салу. «Жаңғыру» қоғамдық қоры мәдениет пен өнерді дамыту мақсатында: дәстүрлі өнерді насихаттау, асыл мұра - музыкалық өнеріміз бен оның белгілі өкілдерін насихаттау, Қазақстанның аймақтарының музыкалық мұрасын зерттеу, сол асыл мұраны сандық жүйеге көшіріп, СD дискілер жинағына шығару сынды шараларға басым бағыт беру, – дейді «Жаңғыру» қоғамдық қорының төрайымы Динара Жұмабайқызы.
