Қазақстан Республикасының Малайзиядағы Уақытша сенімді өкілі Данияр Сарекенов Дүниежүзілік ислам экономикалық форумның (ДИЭФ) Бас хатшысы Тан Сри Ахмад Фузи Абдул Разакпен кездесті, деп хабарлады ҚР СІМ-нің баспасөз қызметі.
Кездесу барысында Қазақстан мен Форум арасында қалыптасқан тиімді ынтымақтастық атап өтілді. Тараптар ғаламдық экономикада Азия елдерінің рөлі арта түскенін назарға ала отырып, алдағы уақыттағы қарым-қатынастардың перспективаларын талқылады.
ДИЭФ Бас хатшысы Қазақстанды Форумның сенімді әріптесі және белсенді қатысушы ретінде атап өтіп, қазақстандық тарапты 2013 жылы 29-31 қазанда Лондонда өтетін «Ауыспалы әлем: жаңа қатынастар» атты 9-шы сессиясына қатысуға шақырды.
А.Фузи Лондон форумында Таяу Шығыс, Оңтүстік пен Оңтүстік-Шығыс Азия және Африка елдерінен мемлекет және үкімет басшыларының қатысуы күтілетіні туралы айтты.
ДИЭФ мұсылман елдерінің іскерлік әріптестігінің әлеуетін дамытуға арналған үнқатысу алаңы ретінде 2003 жылы Путражаяда (Малайзия) өткен Ислам ынтымақтастығы ұйымы Мемлекет басшыларының 11-ші саммиті барысында құрылған болатын.
