Кезінде «Әлемдегі №1 лаңкес» атанған, осыдан біршама уақыт бұрын арнайы операция барысында оққа ұшқан атақты Усама бен Ладен жеке қолданған АК-47 автоматы Американың Верджиния штатында орналасқан орталық барлау басқармасының штаб-пәтеріндегі мұражайға қойылды. Бұл туралы британдық «Дейли телеграф» газетінің ақпарына сілтеме жасаған ИТАР-ТАСС хабарлады.
Автомат 2011 жылдың мамыр айында Пәкстанның Абботтабат қаласында өткен АҚШ арнайы жасағының террористің көзін жою іс-шарасы барысында қолға түсті. Теңіз жаяу әскерінің сарбаздары өздерімен бірге бен Ладеннің өлі денесінен бөлек, оның көптеген құжаттарын, жеке заттары мен қаруын Америкаға алып келген болатын. Қазір АК-47 автоматы орталық барлау басқармасының мұражайына қойылды. Бұл музейге тек орталық барлау басқармасының қызметкерлері мен арнайы шақырылған азаматтар ғана кіре алады.
Айдар Өрісбаев.
